1 Corintios 5

Káchíꞌ Pablo tu̱ꞌun jie̱ꞌe̱ꞌ tiñu néꞌí sáꞌá ñɨvɨ

1Jee ya̱ nááꞌ kúvi nijia ya̱ nni̱ꞌi̱nꞌ ni̱ꞌ tu̱ꞌun ya̱ íyó ɨɨn te̱e nteñu ránú ya̱ sáꞌá re̱ꞌ tiñu téní néꞌí, ya̱ nákusuꞌ re̱ꞌ jín nánáꞌ u̱vi̱ꞌ re̱ꞌ. Jee ne̱ rá inka ñɨvɨ ya̱ ntu tɨ́ɨn ráa Tu̱ꞌun Ndiosíꞌ jee ntu sáꞌá ráa ñujiínꞌ téní víꞌí suꞌva. 2Jee súka̱ꞌ sukuán kúvi, jee ránoꞌó chi jiáni téyɨ́ɨ́ iniꞌ rán. ¿Á ntu váꞌa ka̱ꞌ retánꞌ jiáni iniꞌ rán tu̱ꞌun ñúkuíꞌyáꞌ iniꞌ, jín ya̱ tavaꞌ rán te̱e vá nteñu rán ya̱ nsa̱ꞌá tiñu yaꞌá résa? 3Jee súnika̱ꞌ ntu̱ví nééꞌ máá maáníꞌ jín ránoꞌó, soo ñúꞌúnꞌ iniꞌ ánímaꞌ ni̱ꞌ ránoꞌó, ya̱ íyó kuéntáꞌ íyó ni̱ꞌ jín rán ntañúꞌún, jee saáva íyó nijia ya̱ ya nsa̱náaꞌ ni̱ꞌ si̱kɨ̱ꞌ te̱e yukuán ya̱ nsa̱ꞌá re̱ꞌ tiñu néꞌí ya̱ íyó sukuán. 4Sáá nútútú rán jee ñúꞌúnꞌ iniꞌ ánímaꞌ ni̱ꞌ ránoꞌó kuéntáꞌ íyó ni̱ꞌ jín rán, jee fuersáꞌ níꞌin ííꞌ I̱toꞌoꞌ‑ó Jesús íyó‑o jín ránoꞌó, jee nu̱u̱nꞌ súví I̱toꞌoꞌ‑ó Jesús 5tavaꞌ rán nteñu rán te̱e vá ya̱ sáꞌá sukuán jee suꞌva naku̱ꞌva rán maa xi̱ntíín kui̱ꞌna̱ꞌ kúñáꞌnú Satanás, sáva kɨ̱naanꞌ ñujiínꞌ ya̱ níyo néꞌén iniꞌ re̱ꞌ, jee nakani iniꞌ re̱ꞌ, sáva natavaꞌ Jesús re̱ꞌ nu̱u̱nꞌ kua̱chi re̱ꞌ nanitáꞌvíꞌ re̱ꞌ ki̱vɨ̱ꞌ niji tuku I̱toꞌoꞌ‑ó Jesús.

6Ntu̱ví íyó va̱ꞌa ya̱ káꞌánꞌ téyɨ́ɨ́ rán, chi, ¿á ntu jíníꞌ rán ya̱ “sú máá lúlí ni levadura chíꞌi‑ó ñujien, jee náa nɨꞌɨ ñujien vá sáꞌá‑a” résa? 7Tavaꞌ rán kua̱chi rán ya̱ kúvi kuéntáꞌ levadura túꞌú sáva kuvi rán ñujien jiáá ya̱ ntu yɨ́ꞌɨ́ levadura, sánikua̱ꞌ kúvi nijia rán. Chi íyó nijia ya̱ ni̱ꞌi̱ꞌ Cristo nso̱ko̱ꞌ re̱ꞌ maáréꞌ sáva nakani núne re̱ꞌ yó nkɨ́ꞌɨ‑ó ka̱ꞌ nu̱u̱nꞌ kua̱chi, kuéntáꞌ sókóꞌ ráníꞌ lanchi laꞌlɨꞌ rá viko Pascua. 8Saájee saꞌá‑ó viko vá soo nsú jín levadura túꞌú jín nsú jín levadura ya̱ kúvi ya̱ sáꞌá úꞌvi iniꞌ jín ya̱ niváꞌa, chisaꞌ jín i̱xta̱tíláꞌ ya̱ ntu yɨ́ꞌɨ́ levadura ya̱ kúvi ya̱ saɨn jiáꞌnu‑ó jín na̱a̱ꞌ jiáꞌnu‑ó.

9Ya ntee ni̱ꞌ nu̱u̱nꞌ rán nu̱u̱nꞌ inka tutuꞌ jee nkachiꞌ ni̱ꞌ ya̱ koto kútáꞌán rán jín rá ñɨvɨ ya̱ sáꞌá tiñu téní. 10Soo nsáꞌ nkachiꞌ ni̱ꞌ ya̱ ichi kusɨ́ɨ́n rán nu̱u̱nꞌ rá ñɨvɨ íyó ñɨ̱vɨ́ yaꞌá ya̱ sáꞌá téní, áxí jín rá ñɨvɨ uꞌvi iniꞌ‑i, áxí jín rá ñɨvɨ kuíꞌná, áxí jín rá ñɨvɨ ya̱ néñu̱ꞌun ráa rá nantíñú ya̱ nsú Ndiosíꞌ tékúꞌ ví‑i. Chi retánꞌ kusɨ́ɨ́n rán nu̱u̱nꞌ rá ñɨvɨ sáꞌá ráa sukuán jee íyó rán ya̱ kene rán iniꞌ ñɨ̱vɨ́ nééꞌ‑ó yaꞌá nékúvi. 11Soo ntañúꞌún tée ni̱ꞌ tu̱ꞌun nu̱u̱nꞌ tutuꞌ yaꞌá jee nkachiꞌ ni̱ꞌ ya̱ koto kútáꞌán rán jín ni ɨɨn ñɨvɨ ya̱ káchíꞌ‑i kúvi‑i ñanitáꞌán‑ó ya̱ jínúꞌ iniꞌ‑i Cristo, ya̱ sáꞌá téní‑i, áxí u̱ꞌvi̱ꞌ iniꞌ‑i, áxí néñu̱ꞌun‑u rá nantíñú ya̱ nsú Ndiosíꞌ tékúꞌ ví‑i, áxí kákuíyuꞌú‑u, áxí ka̱ꞌva‑a, áxí sákuíꞌná‑a. Jee koto kútáꞌán rán jín ñɨvɨ ya̱ sáꞌá sukuán, ne̱ koto yájíꞌ kuitɨꞌ rán xi̱ta̱ꞌ jín‑i. 12-13Chi, ¿á tiñu nuꞌuꞌ kúvi ya̱ sánáaꞌ ni̱ꞌ keꞌneꞌ ni̱ꞌ kua̱chi si̱kɨ̱ꞌ ñɨvɨ ya̱ ntu̱ví yɨ́ꞌɨ́ ráa naꞌá Ndiosíꞌ nu̱u̱nꞌ yɨ́ꞌɨ́‑ó rúja? Ntu̱ví chi maá Ndiosíꞌ ví ya̱ sanáaꞌ keꞌneꞌ kua̱chi jie̱ꞌe̱ꞌ rá ñɨvɨ ya̱ ntu̱ví yɨ́ꞌɨ́ naꞌá re̱ꞌ. Soo ránoꞌó ví ya̱ sanáaꞌ keꞌneꞌ kua̱chi jie̱ꞌe̱ꞌ rá táꞌán nteñu rán ya̱ yɨ́ꞌɨ́ ráa naꞌá Cristo. Saáva íyó tavaꞌ rán te̱e néꞌí vá nteñu rán.

Currently Selected:

1 Corintios 5: meh

Highlight

Copy

Compare