1 Corintios 13

Jie̱ꞌe̱ꞌ tu̱ꞌun ya̱ ñúnúúnꞌ‑ó táꞌán‑ó

1Chi retánꞌ kúvi káꞌánꞌ ni̱ꞌ rá tu̱ꞌun ya̱ ntu jiáku̱ꞌun iniꞌ ni̱ꞌ ya̱ káꞌánꞌ rá ñɨvɨ ñɨ̱vɨ́, áxí jín rá tu̱ꞌun ya̱ káꞌánꞌ rá najiáꞌáꞌ ííꞌ Ndiosíꞌ, jee retú ntu̱ví ñúnúunꞌ ni̱ꞌ rá ñɨvɨ, saájee rá tu̱ꞌun ya̱ káꞌánꞌ ni̱ꞌ kúvi‑i kuéntáꞌ ɨɨn ka̱a ya̱ káxín naxín saɨn, áxí ɨɨn platillo káxín naxín saɨn. 2Jee retánꞌ kúvi nakani ni̱ꞌ tu̱ꞌun kéne yuꞌú máá maá Ndiosíꞌ, jín retánꞌ jíníꞌ va̱ꞌa ni̱ꞌ ntáká rá tu̱ꞌun yɨ́yuꞌuꞌ re̱ꞌ, jín retánꞌ jíníꞌ ni̱ꞌ kua̱íyó ya̱ íyó, jee retánꞌ kúneí nasɨ́kuitɨꞌ nijia iniꞌ ni̱ꞌ Ndiosíꞌ ne̱ kuvi tatúníꞌ ni̱ꞌ nu̱u̱nꞌ ɨɨn yuku ya̱ kuiyo‑o nu̱u̱nꞌ íñɨ́‑ɨ jee kuiyo‑o, soo retú ntu̱ví ñúnúunꞌ ni̱ꞌ rá ñɨvɨ, saájee ntu̱náꞌ tiñu kuitɨꞌ ni̱ꞌ. 3Jee súnika̱ꞌ retánꞌ tasáva ni̱ꞌ nɨꞌɨ kuitɨꞌ ni̱ꞌ rá nantíñú kúmí ni̱ꞌ sajiaꞌ ni̱ꞌ maa nu̱u̱nꞌ rá ñɨvɨ nóꞌo láꞌví, jee súnika̱ꞌ retánꞌ ku̱ꞌva ni̱ꞌ maáníꞌ ne̱ teñuꞌunꞌ #13:3 Sava tutuꞌ káchíꞌ: sáva káꞌánꞌ téyɨ́ɨ́ ni̱ꞌ. rá ñɨvɨ yɨkɨkúñu ni̱ꞌ, jee retú ntu̱ví ñúnúunꞌ ni̱ꞌ rá ñɨvɨ, saájee ni ntu̱náꞌ va̱ꞌa nániꞌinꞌ ni̱ꞌ. #13:3 Áxí káchíꞌ: ni ntu̱náꞌ tiñu nu̱u̱nꞌ ni̱ꞌ.

4Chi ñɨvɨ ya̱ ñúnúunꞌ‑u ɨɨn inka rá táꞌán‑a jee káꞌnú iniꞌ‑i, jee ñɨvɨ ya̱ ñúnúunꞌ‑u inka ñɨvɨ jee va̱ꞌa iniꞌ‑i, jee ntu̱ví u̱ꞌvi̱ꞌ iniꞌ‑i, jee ñɨvɨ ya̱ ñúnúunꞌ‑u inka ñɨvɨ jee ntu̱ví káꞌánꞌ téyɨ́ɨ́‑ɨ, jee ntu̱ví jiáni téyɨ́ɨ́ iniꞌ‑i, 5jee ntu jiáꞌnu kánéꞌén‑e, jee ntu kuásɨ́n iniꞌ‑i ya̱ ntu̱ví núkú‑u kua̱chi ya̱ váꞌa kuvi maáa, jee ni ntu̱ví xéénꞌ iniꞌ‑i jee ni ntu̱ví ñúꞌún xíniꞌ‑i jie̱ꞌe̱ꞌ rá tiñu níváꞌa nsa̱ꞌá inka ñɨvɨ jín‑i, 6jee ni ntu̱ví kúsɨ́ɨꞌ iniꞌ‑i jie̱ꞌe̱ꞌ tiñu níváꞌa, chisaꞌ kúsɨ́ɨꞌ iniꞌ‑i jie̱ꞌe̱ꞌ tiñu váꞌa ya̱ íyó na̱a̱ꞌ. 7Jee ñɨvɨ ya̱ ñúnúunꞌ‑u táꞌán‑a, jee ntáká nu̱u̱nꞌ jiéꞌnéꞌ iniꞌ‑i nóꞌo‑o, jín ntáká ni kúneí iniꞌ‑i Ndiosíꞌ, jín ntáká ni íyó tu̱ꞌun neí iniꞌ‑i ya̱ na̱a̱ꞌ sikúnkuvi Ndiosíꞌ jín ñɨvɨ vá, jín ntáká ni kínóo kutú jín Ndiosíꞌ.

8Jee ñɨvɨ ya̱ ñúnúunꞌ‑u táꞌán‑a, jee ni nsáꞌ ji̱nu ñúnúunꞌ‑u. Vitan jee nákani ñɨvɨ rá tu̱ꞌun kéne yuꞌú máá maá Ndiosíꞌ, soo kenta ki̱vɨ̱ꞌ ya̱ sijínu re̱ꞌ maa. Áxí jiáꞌa re̱ꞌ ta̱ꞌvi̱ꞌ ya̱ káꞌánꞌ ñɨvɨ inka nu̱u̱nꞌ rá tu̱ꞌun ya̱ ntu jiáku̱ꞌun iniꞌ ráa, soo kenta ya̱ xinɨ́ꞌɨ re̱ꞌ maa. Áxí jiáꞌa re̱ꞌ ta̱ꞌvi̱ꞌ nu̱u̱nꞌ ñɨvɨ ya̱ jíníꞌ va̱ꞌa víꞌí‑i jee xínéꞌénꞌ‑e vá, soo sijínu re̱ꞌ maa. 9Chi yakuꞌ ni ví ya̱ jíníꞌ‑ó jie̱ꞌe̱ꞌ Ndiosíꞌ vitan, jee suni yakuꞌ ni kúvi nákani‑ó yakuꞌ ni tu̱ꞌun kéne yuꞌú re̱ꞌ. 10Soo sáá kiji ya̱ sikúnkuvi noo Ndiosíꞌ nɨꞌɨ kuitɨꞌ ya̱ nkuna̱a̱ꞌ iniꞌ re̱ꞌ saꞌá re̱ꞌ, jee sijínu Ndiosíꞌ rá ta̱ꞌvi̱ꞌ ya̱ sáꞌá‑a ya̱ jíníꞌ‑ó yakuꞌ vitan.

11Chi sáá nkuvi ni̱ꞌ ɨɨn su̱chí lúlí jee nkaꞌanꞌ ni̱ꞌ kuéntáꞌ su̱chí lúlí, jee ñani iniꞌ ni̱ꞌ kuéntáꞌ súchí lúlí, jee ñúkúꞌvá iniꞌ ni̱ꞌ kuéntáꞌ súchí lúlí. Soo sáá ñaꞌnu ni̱ꞌ jee nkenta kuvi ni̱ꞌ te̱e jee nxi̱nóo ni̱ꞌ ya̱ta̱ꞌ rá tiñu ya̱ kúvi ñujiínꞌ su̱chí lúlí. 12Chi vitan jee nsú nɨꞌɨ jíníꞌ‑ó jie̱ꞌe̱ꞌ Ndiosíꞌ, chi íyó kuéntáꞌ retánꞌ néꞌyá‑ó nu̱u̱nꞌ ɨɨn espejo ya̱ túvi neenꞌ, soo tiempúꞌ ichinúúnꞌ jee kune̱ꞌyá‑ó nu̱u̱nꞌ máá maá Ndiosíꞌ jín nchinúún‑ó. Vitan jíníꞌ ni̱ꞌ yakuꞌ ya̱ nstúvi Ndiosíꞌ nu̱u̱nꞌ‑ó, soo tiempúꞌ yukuán kuniꞌ noo nɨꞌɨ kuitɨꞌ, kuéntáꞌ sánikua̱ꞌ jíníꞌ noo maá Ndiosíꞌ nuꞌuꞌ. 13Jee saáva íyó u̱ni̱ꞌ tu̱ꞌun ya̱ kínóo kutú‑u jín‑ó nɨ́ɨ́nkání: ya̱ kúneí nijia iniꞌ‑ó Ndiosíꞌ, jín íyó tu̱neí iniꞌ‑ó ya̱ síkúnkuvi Ndiosíꞌ ya̱ nchi̱sóyuꞌú re̱ꞌ, jín ya̱ kunu̱u̱nꞌ‑ó táꞌán‑ó. Soo ya̱ ñáꞌnú ka̱ꞌ nu̱u̱nꞌ ni núníꞌ rá yaꞌá ví ya̱ kunu̱u̱nꞌ‑ó rá ñanitáꞌán‑ó.

Currently Selected:

1 Corintios 13: meh

Highlight

Copy

Compare