रोमियों 16

आप्णी ढबे शा धन्यबाद

1हाँव तुँओं शी आप्णी बऐणी फीबे खे, जू अमाँरी बईण अरह् किंख्रिया की कलीसिया की सेविका असो, तियों खे हाँव तुँओं शी डालो करू 2के जेष्णाँ पबित्र लोगो का स्वागत् हुवा चेंई, तेष्णा ही तियाँरा भे प्रभू दा स्वागत् करह्, तैष्णी ही माँनों; अरह् जियों कोसी बातो दी तियाँरे तुँवारी जरूरत असो, तियाँरी साऐता-मंद्द करह्, किन्देंखे के से भे भहिते की मतल्व मेरी भी मदत्तगार कर्णो वाल़ी असो।

3बंईण प्रिस्का अरह् तियारा घरवाल़ा भाऐ अक्विला खे जू मसीया यीशू दे मेरे साजी असो, तिन्खे नमंष्कार। 4तिन्ऐ मेरे प्राँण खे आप्णी ही जियाँन खतरे दी पाँऐ दिती; अरह् सिर्फ हाँव ही ने, परह् गऐर यहूदी की बादी कलीसिया भे तिनका धन्यबाद करह्। 5तियों कलीसिया खे भे नमंष्कार, जू तिनके घर दी असो। मेरे प्यारे इपैनितुस खे, जू मसीया खे आसिया का आगला फल़ असो, नमंष्कार।

6मरियम खे, जिऐं तुँओं खे बैजाऐ मेंह्न्त करी, नमंष्कार। 7अन्द्रुनीकुस अरह् यूनियास खे जू मेरे कुड़्बे के असो, अरह् मेरी गईलो कय्द हुऐ थिऐ, अरह् प्रभू यीशू के खास-चेलै मुझी माँने-गीणें असो, अरह् मुँह शे आगे मसीही बंणें थिऐ, नमंष्कार। 8अम्पलियातुस खे, जुण्जा प्रभू दा मेरे प्यारा असो, नमंष्कार। 9उरबानुस खे, जू मसीया दा अमाँरा साजी असो, अरह् मेरा प्यारा इस्तखुस खे नमंष्कार। 10अरिस्तुबुलुस खे, जू मसीया दा साच्चा-पाका नींक्ल़ा, नमंष्कार। अरिस्तुबुलुस के घराने खे नमंष्कार। 11मेरे कुड़्बे के हेरोदियोन खे, नमंष्कार। नरकिस्सुस के घराने के जू लोग प्रभू दे असो, तिनखे नमंष्कार। 12त्रूफेना अरह् त्रूफोसा खे जू प्रभू दी मेह्न्त कर्दी रंह्, नमंष्कार। प्यारे पिरसिस खे, जेने प्रभू दी बैजाऐ मेह्न्त करी, नमंष्कार। 13रूफुस खे, जू प्रभू दा चूणाँ-छाँटा अंदा असो, अरह् तेस्की माँ खे, जू मेरी भे माँ असो, दुई खे नमंष्कार। 14असुंक्रितुस अरह् फिलगोन अरह् हिर्मेंस अरह् पत्रुबास अरह् हिर्मास अरह् तिनकी गईलो के भाऐ बंईणों खे नमंष्कार।

15फिलुलुगुस अरह् यूलिया अरह् नेर्युस अरह् तिनकी बऐणें, अरह् उलुम्पास अरह् तिनकी गईलो के बादे पबित्र लोगो खे, नमंष्कार। 16आपु मुँझी पबित्र खुप्टी देऐयों नमंष्कार करह्। तुँओं खे मसीया की बादी कलीसिया की ढबे शी नमंष्कार।

आखरी अज्ञाँ

17ऐबे हे भाऐ बंईणों, हाँव तुँओं खे ढाल-अरज करू के जू लोग तियों शिक्क्षा के बिरूध असो, जुण्जी तुँओं भेटी रंई, फूट पाँणों खे अरह् ढैस-ठूकर का कारण बंणों, तिनू ताड़ी पाव, अरह् तिन्शे दुर्के रूऐ। 18किन्देंखे के ऐष्णे लोग अमाँरे प्रभू मसीया के ने, परह् आप्णे पेटो के सेवा करह्; अरह् लट-पटी बातो लई सिधे-साधे मंन के लोग बह्काऐ दियों। 19तुवाँरे अज्ञाँ माँन्णों की चर्चा बादे लोगो मुझी फऐली रंऐ, ईन्देंखे हाँव तुँआरे बारे दा आँनन्द करू परह् हाँव ऐशो चहाँऊ, के तुँऐं भलाई खे बुद्धी-मान, परह् बुराई खे भोल़े बंणे अंदें रूऐ। 20शाँण्त्ति का पंणमिश्वर शैतान तुँवारी लातो थाँई शिघा घिंज्णों खे पाँदा। अमाँरे प्रभू यीशू मसीया की कृपा तुँओं गाशी हंदी रंह्।

21मेरा साजी तीमुथियुस का, अरह् मेरे कुड़्बे के लूकियुस अरह् यासोन अरह् सोसिपत्रुस का तुँओं खे नमंष्कार। 22मुखे पत्री के लिखणों वाल़े तिरतियुस का, प्रभू दा तुँओं खे, नमंष्कार।

23गयुस जू मेरी अरह् कलीसिया का पाऊँणाई कर्णो वाल़ा असो, तेस्का तुँओं खे नमंष्कार। इरास्तुस जू नगर का भडारी असो, अरह् भाऐ क्वारतुस का तुँओं खे नमंष्कार। 24हमारे प्रभू यीशू मसीया की कृपा तुँओं सोभी आरी हों (आमीन)

25ऐबे जू तुँओं मेरी खुषख्बरी मतल्व प्रभू यीशू मसीया के शिक्क्षा के प्रचार के मुँताबिक शे पाक्के करी सको, तेसी भेद् के प्रकाष के मुँताबिक जू ज़ूगौ शा चुप्पी रूआ, 26परह् ऐबे पर्गट हऐयों ज़ूगौ के पंणमिश्वर की अज्ञाँ शे जू ऋषियों की कताबे के जाँणें सोभी जात्तियों खे बुली गई, के से बिश्वाष शे अज्ञाँ माँनणों वाल़े हऐ ज़ाँव,

27तेसी ही सिर्फ ऐक बुद्धीमाँन पंणमिश्वर की यीशू मसीया के जाँणें; ज़ूगौ-ज़ूगौ तोड़ी बड़ियाऐं हंदी रंह्। आमीन।

Currently Selected:

रोमियों 16: sri

Highlight

Copy