खास-चैले के काँम 18

संत्त-पौलुस कुरिन्थियों नंगर दे

1तबे संत्त-पौलुस एथेंस नंगर छुड़ियों कुरिन्थियों दा आया। 2तेथै तेसी अक्विला नाँव का ऐक यहूदी भेटा, जेस्की जंन्म-भोम्मीं पुन्तुस नंगर दी थी। से भे आप्णी तिरंई प्रिसकिल्ला की गईलो अचकालिऐं इटली देश शा आया अंदा थिया, किन्देखे के महाँ राजा क्लौदियुस ऐ ऐजी अज्ञाँ देऐ थंऐ थी, के बादे के बादे यहूदी लोग रोम शे नींक्ल़ी ज़ाव, तबे संत्त-पौलुस तिन कैई शा भेंट करदा तेथै आया। 3अरह् तेस्की गंईलो काँम-काज़ कर्णों वाल़ा, तेस्का साथी आप्णाँ काँम-काज़ करदा रूवा; किन्देंखे के से दुईन्नें ऐक ही काँम-काज़ करह् थिऐ, ताँम्बू बाँण्णों का। 4संत्त-पौलुस हर ऐक बिषाँव के देसे यहूदी च़ौत्रें दा बाद-बिबाद करह् थिया; अरह् यहूदियों अरह् यूनानियों के बादे लोग बिषाँव के देसे शंक दूर कर्णो खे सहम्झाँव थिया। 5जबे सीलास अरह् तीमुथियुस मकीदुनिया शे आऐ, तबे संत्त-पौलुस बचन शुँणाँणों की लगंन दा यहूदियों खे गुवाऐ-शाज़्त्त देंदा लागा, के यीशू ही मसीया असो। 6परह् जबे सेजे लोग संत्त-पौलुस का बिरूध अरह् नीदया कर्दें लागे, तबे तेने आप्णे खट्णों की धूड़ झाड़ियों तिनखे बुलो, “तुवाँरो लह्ऊँ तुवाँरें ही मुँडे हों! हाँव नि-र्दोष-बै-कसूर असो। ऐबे हाँव गऐर-यहूदी कैई ज़ाँऊबा।” 7तबे: से तेसी यहूदी च़ौत्रें शा नींक्ल़ी गुवा, अरह् हाँडियों तितुस-युस्तुस नाँव के गऐर यहूदी पंण्मिश्वर के भगत्त कागी हुटा; जेस्को घरह् यहूदी च़ौत्रें के नंजीक थियों। 8तबे यहूदी के चौत्रे का ढिमेंदार क्रिस्पुस ऐ आप्णे बादे टाबरे समेत प्रभू गाशी बिश्वाष करा, अरह् भहीते कुरिन्थ के रंहणों वाल़े; ऐ भे संत्त-पौलुस की बातो शुँणियों बिश्वाष करा, अरह् नहाँण-नहाँव। 9प्रभू ऐ ऐक रात्त दर्शण देऐयों संत्त-पौलुस खे बुलो, “डरे ने, परह् बुल्दा ज़ा, चुप्पी ने रूऐ; 10किन्देंखे के हाँव तेरी गईलो असो, अरह् कुँऐ भे तेरो किऐ ने करी बल़्दा; किन्देंखे के ऐसी नंगर दे बैजाऐ लोग मेरे आप्णें असो।” 11संत्त-पौलुस लोगों कैई शे पंण्मिश्वर के बचन शिखाँदे रूऐ, अरह् से तेथै ढेढ साल्ह तोड़ी रूऐ। 12जेसी बख्त्ते गल्लियों अखाया देश का हाकम थिया, तअ तबे यहूदी लोगे ऐ आपु मुँझी ऐका करियों संत्त-पौलुस गाशी च़ूटियों पड़े; अरह् तेसी नियाव के सिंगास्हणों के सहाम्णिऐ आँणियों बुल्दे लागे। 13“ऐजा आदमी पंण्मिश्वर के ऐशी आरार्धना कर्णो का निय्म शिखाँव, जुण्जा ऋषी मूसा खे भेटे गुऐ अज्ञाँ निय्म के बिरूध दे असो।” 14जबे संत्त-पौलुस के बुल्णों ही थियों, तअ हाकम गल्लियों ऐ यहूदियों खे बुलो, “हे यहूदियों! जे किऐ अ-नियाँई के बात हंदी, तअ ठीक थियो, के हाँव तुँवारी शुँण्दा। 15परह् जे ऐजी बोल-चाल की बातो, अरह् नाँमों, अरह् तुवाँरे ईथै के निय्म-रूवाजो के बारे दो असो, तअ तुँऐं ही जाँणों; किन्देंखे के हाँव ईयों बातो का नीयाँईच़ू बण्णों ने चहाँदा।” 16अरह् तिन्ऐ संत्त-पौलुस नियाँव के सिंगास्हणों के सहाम्णें शा नींकाल़ी दिता। 17तबे सोभी लोगे यहूदी चौ़त्रे का ढिमेंदार सोस्थिनेस थाँहम्बड़ियों यहूदी च़ौत्रें के सहाम्णें माँरा-पीटा; परह् हाकम गल्लियो ऐं तिन्दी झ़ैठ ही ने पाई।

अन्ताकिया खे पाछू ज़ाँणों

18संत्त-पौलुस बैजाऐ देसो तोड़ी कुरिन्थियों दा रूआ। तबे बिश्वाषी भाऐ-बंईणों कैई शी बिदाऐं लंऐयों, प्रिस्किल्ला अरह् अकिवला की गईलो, पाँणीं के जहाजों दे सीरिया देश खे हुटे; तिन्ऐ कंसी बरंत्तो के कारण किंख्रिया टापू गाशी; आप्णों मूँढ लुणाँऐयों ख्रूमुँण्डी बंणाँऐ दिती, किन्देंखे के तिनकी सेजी मंन्त्त-हीछ़ा करी अंदी थी; 19जबे से इफिसुस नंगर दे पंह्ऊँचे, तअ संत्त-पौलुस ऐं प्रिस्किल्ला अरह् अकिवला तैथी छ़ोड़ी दित्ते; अरह् आपु यहूदी च़ौत्रें दे ज़ाऐयों यहूदियों की गईलो बात-च़ीत्त करदा लागा। 20जबे तिन्ऐं संत्त-पौलुस ढह्लियाऐया, के “अमाँरी गईलो कुछ देसो तोड़ी हजो ईथी रंह्।” परह् तेने सेजी बात माँनी ने; 21अरह् ऐजो बुलियों तिनू् कैई शा बिदा हुवा, के “जे पंण्मिश्वर ऐ चहाँव तअ हाँव तुँओं कैई हजो पाछू आँऊबा।” तबे से इफिसुस शो जहाज खुलियों चाली पड़ा; 22अरह् कैसरिया के टापू दा ऊदा ऊत्रियों (यरूशलेम खे) हुटा, अरह् कलीसिया खे नमंष्कार करियों महाँ-नंगर अन्ताकिया खे हुटा।

संत्त-पौलुस की च़ीज़ी प्रचार की यात्रा

23तबे कुछ देसो संत्त-पौलुस महाँ-नंगर अन्ताकिया दा रूवा, अरह् तबे से तेथै शे भे चाली पड़े; अरह् गलातिया अरह् फ्रूगिया के ईलाके बाटी नंगर-नंगर दे घुम्दे-फीर्दे बादे चैले बिश्वाष दे पाक्कै कर्दे रूऐ।

इफिसुस नंगर दा अपुल्लोस

24तेसी बख्त्ते अपुल्लोस नाँव का ऐक यहूदी, जेस्का जंन्म सिकन्दरिया दा हऐ रूआ थिया; से परभाव वाल़ा प्रचारक अरह् पबित्र-ग्रन्थों का ज्ञाँनी धिया। 25तेस्खे प्रभू के बाटो की मुँख्ह जबाँनी शिक्क्षा देऐ थंऐ थी, से बैजाऐ हिमम्त्त-हंस्लै वाल़ा आदमी थिया; अरह् प्रभू यीशू के बारे दी तेस्की शिक्षा साफ थी, परह् तेस कैई सिर्फ ज्ञाँन अरह् जाँण कारी संत्त-यूहन्ना के नहाँण-नहाँणों तोड़ी ही थी। 26से यहूदी चौत्रें दा नींडर हऐयों बुल्दा लागा, परह् प्रिसकिल्ला अरह् अकिवला ऐ तेस्की बातो शुँणियों तेसी आप्णें कागी नीयाँ, अरह् पंण्मिश्वर की बाट तेस कैई शी हजो भे ठीक-ठीक संहम्झाऐ अरह् बुली। 27जबे तेने अपुल्लोस ऐ संमुँन्द्रों गाशी यूनान देश खे जाँणों चहाँव, तअ बिश्वाषी भाऐ-बंईणों ऐ तेस्खे दीड़-हिमम्त्त दित्ती; अरह् चैले के नाँव दी पत्री देंऐयों, तिन शी बीनन्ती करी; के से ऐस्का सु-स्वागत्त् करह्; तबे तेने अपुल्लोस ऐ यूनान पंह्ऊँचियों, लोगों के बैजाऐ सहाँऐता करी; जुण्जे लोग प्रभू की कृपा के कारण बिश्वाषी बंणी रूऐ थिऐ। 28किन्देंखे के से पबित्र-ग्रन्थों शा परमाँण देऐ देऐयों, के यीशू ही मसीया असो; बैजाऐ प्रभाव आरी, यहूदी लोग सोभी के सहाँम्णें बै-जबाब करी दियों थिया।

Currently Selected:

खास-चैले के काँम 18: sri

Highlight

Copy