ROMA 5
5
Kasimadago muni pai Pue Ala
5:1-11
1Seʼi-seʼi kita simadago muni pai Pue Ala, ua kita meayamo. Inceʼe puʼunya kita tuwu ri raya ngkasimadago pai i Pue Ala ua Pueta i Yesu Kerisitu. 2Ua kita meaya ri Yesu Kerisitu, inceʼe mawai jaya ri kita tuwu ri towe mPue Ala, ri raya ntowemo setu katuwuta wawaseʼi. Inceʼe puʼunya da mawongko rayata maka kita tuwu ri pampomata-mata ri kalindo ndaya anu ndawai i mPue Ala. 3Banya podo inceʼe, da mawongko rayata ri raya ngkapari, maka taincani kapari setu mampakaroso rayata. 4Karoso ndaya inceʼe mampakaroso kita ri pura-pura pompebutuka; inceʼemo anu mampapebete pampomata-mata. 5Pampomata-mata seʼe bareʼe da melewa maka rayata buke pai towe mPue Ala, inceʼe ndawai i mPue ua potetala Inosa mPue Ala anu ndawaimo ri kita.
6Ri sindara kita bereʼe rosota, i Kerisitu mate tilata singkono pai tempo anu ndapakanoto i mPue Ala; ntanoka kita anu lawa ungka ri Pue Ala. 7Sako mamponcuruka tau anu mayoa bara bereʼe tau anu mampokono da mate. Paikanya bara da reʼeja yau tau anu mantaha da mate ua mamponcuruka tau anu madago. 8Paikanya i Pue Ala mampatongawa katowe ndaya-A ri kita ri kapate i ngKerisitu tilata sindara kita ntongo tuwu ri raya ncalaa! 9Seʼi-seʼi kita simadago muni pai Pue Ala ua kapate i ngKerisitu inceʼe mampakanoto kita tesorepaka ungka ri karau ndaya mPue Ala, ua i Kerisitu. 10Ane ri tempo kita ntongo moʼiwali pai i Pue Ala, kita ndapasimadago mampojaya kapate Ana-A, pagonya wawaseʼi mokentamo muni kita pai i Pue Ala, manoto kita da ndasorepaka ua katuwu i ngKerisitu. 11Meruu pai inceʼe da mawongko rayata woʼu kono kapande ndaya mPue Ala anu tongawa ri Pueta i Yesu Kerisitu. Maka mampojaya i Yesu Kerisitu, kita wawaseʼi reʼemo ri pokenta anu meawa pai i Pue Ala.
I Adama pai i Kerisitu
5:12-21
12 #
Pal. 3:6
Mampojaya tau sambaʼa salaa mesuamo ri lino, pai ungka ri salaa setu mebete kapate. Ungka njairia melelemo kapate natoalemo pura-pura tolino, maka pura-pura tolino masalaa. 13Ri kabareʼepanya ndawai waʼa mpadika agama nto Yahudi, reʼemo riunya salaa ri lino seʼi. Paikanya salaa seʼe bareʼe ndapepalisi, maka bereʼe padika anu ndalewa. 14Mau ewanceʼe, montepuʼu ungka ri tempo i Adama rata ri tempo i Musa, kapate mangkuasai tolino. Mau waʼa ntau bareʼe mowia ewa pelewa i Adama, tau setu woʼu nakuasai ngkapate. I Adama inceʼemo limbayo Ncira anu nepa da rata. 15Paikanya tau radua seʼe bareʼe siwia; maka towe ndaya i mPue Ala maʼai mperuunya ane ndapasintolio pai peewa anu napowia i Adama. Ua peewa ntau sambaʼa naponcuruka sondo tau mate. Meruu ngkabangke woʼu towe ndaya i mPue Ala ua kapande ndaya ndapepombaika ngkabongo katesorepaka ri tau maria mampojaya tau sambaʼa, inceʼemo i Yesu Kerisitu. 16Pombai mpuru i mPue Ala woʼu meruu ngkabangkenya ungka ri salaa ntau anu sambaʼa setu. Maka ri karoonya tau sambaʼa setu mampareʼe peewa, ndabotusi, “Masalaa.” Paikanya ri karoonya sondo tau mowia salaa ratamo pombai mpuru i mPue Ala anu mampatongawa, “Bareʼemo masalaa!” 17Ua peewa ntau sambaʼa, melelemo kapate ri pura-pura tau, mampoliu tau sambaʼa setu. Meruu ungka njairia ua powia ntau sambaʼa anu ntaninya i nceʼemo i Yesu Kerisitu, tila ntau maria. I Pue Ala mawai gana-gana ri tau seʼe kapuru ndaya, podo ndawai ngkabongo mewali jaya ngkasimadago muni pai i Pue Ala; tau seʼe da makuasa ri lino seʼi mampoliu i Kerisitu.
18Mewali, ua peewa ntau sambaʼa mampapopuʼumo pura-pura tolino da ndahuku, ewanceʼe seʼe ua powia ntau sambaʼa anu malulu pepokono i mPue Ala, mampapopuʼu pura-pura tau tesorepaka ungka ri kasalaa pai ndawaika katuwu. 19Pai ewa kamaria ntau anu manawu ri raya ngkasalaa ua powia ntau sambaʼa anu bareʼe mepoʼinaya, ewanceʼe woʼu kamaria ntau da tuwu ri kasimadago muni pai Pue Ala ua sambaʼa tau anu mepoʼinaya ri Pue Ala.
20I Pue Ala ngkalio-A anu mawai padika agama nto Yahudi. Paikanya kakomompari-mpari tolino da mawianaka waʼa mpadika setu, kako nalewa ntau seʼe pai manawu ri kasalaa ri Pue Ala. Mau ewanceʼemo napampowia ntolino salaa, kako maʼai-ai pampotowe i mPue Ala tau seʼe. 21Mewali, mau kita seʼi da mate ua kita mampowia salaa, ewanceʼe seʼe i Pue Ala mawai ri kita jaya ngkasimadago muni pai Pue Ala ua Sira mampotowe kita. Pai ua madago muni pokentata pai Pue Ala, Sira woʼu anu da mawaika kita katuwu anu bareʼe da reʼe kapusanya, ua i Yesu Kerisitu Pueta.
Currently Selected:
ROMA 5: LAIPMF
Highlight
Copy
Compare
Share
Want to have your highlights saved across all your devices? Sign up or sign in