एहुन्‍ना 17

ईसु अनेज लगाडिय बिनती एना

1हेना वरी ईसु नआँ टेबोईय कहनी केड राः बाद रे सरग हन तको केते नआँ घयतेय बिनती एना, “ओ अपा, अम तोलकेडा समय मेजियाना। अब इंञ अम होपोन तीमिन बडे गिआंञ मेनाआँ होड़कुम तिःवा, ताकि इंञ हो होड़कुंञ तिःवा कि अम तीमिन बडे गिआमू। 2कहेकि जे होड़कू, अम इंञ ती रेम एमकेड कुआ, हेंकू सींड़कू अनन्त जीवन ओवाकू राः हँक इंञ मी ओवाडा। 3जे जे अम मिनियें टंगाअय सिरीतय भगवान कू पपाड़िआ, अवुर ईसु मसीह मतलोब जे अम कुलकेडिञाँ, इंञ कू चिन्हों, हेनकू अनन्त जीवन कू ञाँमा। 4अवुर जे काम इंञ मी ओवाडा, हेना इंञ पूरा केडते दुनिया रेनकू होड़कुंञ तिःवाड कुआ कि अम तीमिन बडे गिआमू। 5ओ अपा, न धरती बनोः वरी पहील ते इंञ अम सुदांञ दोहोएन रे इंञ तीमिन मान मरजाद ञँमुः दोहो एनु, इंञ अम सुदांञ दोहोन रे, हे-ना मान मरजाद इंञ फेर सेतेम ओवाञूँ।”

अनेज रेनकू चेलाकू लगाडिय बिनती एना

6ईसु फेर बिनती रेय कहनी तेडा, “ओ अपा, नआँ धरती रेनकू वरी गोटाचार होड़कू इंञ ती रेम एमकेड कुआ। अवुर इंञ हेंकू अमाः बारे तेंञ लाय वडकुआ। अवुर इंञ मी ओवाडिञाँ हेंकू अनामाःकू होड़कू हवे। अवुर हेंकू अमाः बचन कू मनो केडा। 7अवुर जे-ना अम इंञ मी ओवाडा, हेना सींड़ अम हनवरिआ मेनाअकू पपाड़ियाना। 8कहेकि जे खभेर इंञ मी लाय वडा, हेना इंञ हेंकुंञ लाय वडकुआ, अवुर हेंकू हेना कू सरी वडा, अवुर डिटोह तेकू पपाड़ियाना कि इंञ अम वरिंञ मेजकेना मेनते। अवुर अनाम कुलकेडिञाँ मेना अहोकू बिसवास केडा। 9निहों इंञ सींड़ दुनिया रेनकू लगड मेनेंञ बिनतीः तना, बल्कि इंञ थरे जे जेम एमकेडा हेनकू लगाडिंञ बिनतीः तना, कहेकि हेंकू अमाःकू हवे। 10अवुर जे ईंञाःकू हवे, हेंकू सींड़कू अमाःकू हवे, अवुर जे अमाःकू हवे, हेंकू सींड़कू ईंञाःकू हवे। अवुर होड़कू, इंञ तीमिन बडे गिअंञ मेनाआँ, हेंकू राः दोवारा तेकू पपाड़िआ। 11इंञ बगरा दिन नआँ दुनिया रे एरोंञ दोहो एना, लेकिन नेकू नआँ रेकू दोहोना, अवुर इंञ अम थरेंञ सेनुः तना। ओ पवितरय अपा, अम इंञ मी ओवाडा सक्‍ति ते नेकुम बंचो ता, ताकि नेकू हो अलंग घयते एक जुट तेकू दोहोनू। 12#एहुन्‍ना 13:18इंञ नेकू सुदांञ दोहोएन रे अम इंञ मी ओवाडा सक्‍ति तेंञ ञेंल अँजोम तेडकुआ। अवुर हेंकू मेंडे मिनियें होड़ बिलोः हेना होर तेय चलो यना, हें-नी भर नास एना, धरमग्रंथ रे लिखल इदान हेना पूरा होयाः लगड नआँ घयते होया एना#सिरिंग 41:9। 13ओ अपा, अब इंञ अम थरेंञ सेनुः तना, अवुर इंञ नेन दुनिया रे दोनोहोन रेंञ बिनतीः तना, जे घयते इंञ खुसी तेञाँ, हेन घयते ईञाःकू चेलाकू अखीर तेकू खुसीऊ। 14इंञ अमाः टेबोः हेंकुंञ लाय वडकुआ, हेनाते दुनिया रेनकू होड़कू हेंकू मेनेकू बेस वकुआ। कहेकि जे घयते इंञ दुनिया रेनिय न लगे, हेन घयते हेंकू हो दुनिया रेनकू न लगे। 15इंञ नेकू नआँ दुनिया वरिम रिम गोःकू मेनते मेनेंञ बिनतीः तना, बल्कि ईञाः बिनती हवे कि नेकू हेंय सयतान वरिम बंचो कू। 16कहेकि जे घयते इंञ दुनिया रेनिय न लगे, हेन घयते हेंकू हो दुनिया रेनकू न लगे। 17अमाः टेबोः सत गिआ, हेनाते अमाः सत बचन तेम सुद्ध कू। 18अवुर जेयसे अम दुनिया रेम कुलकेडिञाँ, हेन घयते इंञ हो हेंकू दुनिया रेंञ कुलयड कुआ। 19अवुर हेंकू लगड अम थरे ईनीञिंञ जिमा यडा, ताकि हेंकू हो इंञ लाय वडकुआ, हेना सत टेबोः लगड अना कुकू जिमा।”

ईसु सींड़ बिसवासिकू लगाडिय बिनती एना

20हेना वरी ईसु फे-रिय कहनी तेडा, “इंञ नेनकू लगड भर मेनेंञ बिनतीः तना, लेकिन नेकू राः बचन राः दोवारा ते इंञ थरे कू बिसवासेआ, हेंकू एक जूटुः लगाडिंञ बिनतीः तना। 21ओ अपा, चँवदीस रेनकू होड़कू अनाम कुलकेडिञाँ हेना कू बिसवास लगड, जेयसे अम इंञ थरे इदान मिआँ, अवुर इंञ अम थरे इदानिञाँ, हेन घयते नेकू हो अलँग थरे कू दोहोनू। 22अम ओवाडिञाँ मान मरजाद इंञ हेंकुंञ ओवाडा कि हेंकू हो अलँग एक जुट ते इदान लँगा, हेन घयते हेंकू हो एक जुट तेकू दोहोनू। 23इंञ हेंकू थरेञाँ अवुर अम इंञ थरे मिआँ, ताकि हेंकू पक्‍का कोःतेकू एक गुटुऊ, अवुर दुनिया रेनकू पपाड़िआ कि इंञ अनाम कुलकेडिञाँ, अवुर जेयसे अम इंञ मी परेम तेडा, हेन घयते हेंकू होंञ परेम तेडकुआ। 24ओ अपा, ईञाः मन इदाना कि इंञ मी ओवाडा, हेंकू हो इंञ सुदा इंञ दोहोना हेना रेकू दोहोनू। कहेकि धरती बनो तेड वरी पहील ते इंञ मी परेम केतेम मान मरजाद तेडिञाँ, हेना हेंकू होकू ञें-ले। 25ओ धरमिअय अपा, चँवदीस रेनकू होड़कू इंञ मेने कू थितो गडिञाँ, लेकिन इंञ आँमिंञ थितो केडमिआँ। अवुर ईंञाःकू चेलाकू अम कुलकेडिंञ हेना कू पपाड़िआ। 26अवुर अम ईया हवे मेनाआँ हेंकुंञ लाय वडकुआ, अवुर लाय वकू महल रेंञ दोहोना। ताकि जेयसे इंञ मी परेम तेडा, हेन घयते हेंकू होम परेम कू, अवुर इंञ हमेसा हेंकू थरेंञ दोहोनू।”

Currently Selected:

एहुन्‍ना 17: ksz

Highlight

Copy

Compare