ZEFANIA 3
3
1Lamba kuli chihulia yoze halichisa,
chihunda cha kupinjisa akwo!
2Kapanjikile ku liji nilimwe,
katayile kumufumba,
kafulielele Yehova,
kakundamine kuli Zambi yenyi.
3Akwa kuyula muchima lienyi
kapwa ngwe ndumba a kuhiohia.
Ngaji jenyi ngwe tungunga a ha chingoloshi
waze kahichikile nichimwe ndo chimene.
4Aprofeta jenyi alelu, akwa mafwefwe;
asasendote jenyi kakuchisa yuma yisandu ni kutangula shimbi.
5Yehova muchima lienyi mukwa ululi,
kalingile nichimwe chipi.
Tangwa ha tangwa chimene upatwilo wenyi wa kulita unasoloka;
ha kucha cha tangwa keshi kuhona,
alioze akwa uhenge keshi sonyi.
6Hinasutula mavungu;
yipanga yo ya mawe yinapuzuka.
Hinenyeka matapalo jo,
chocho niumwe keshi kwendelamo.
Yihunda yo hiyalumuka ya hululu;
kumushi mutu; kumushi mwenyayo.
7Nambile ngwami, Manguvwila woma,
matayiza kumufumba,
chocho chichi kamuteta kuma kwa kutwama
chipwe namwaha kastigu.
Alioze akalishile mbunge jo
nikuchisa yitanga yo yeswe.
8Kashika Yehova kanambe ngwenyi,
Ngutwaminyine ndo tangwa lize mungumana ngwe chela.
Mumu chize hinapatula mu mbunge
ngwami, Kukunga mavungu
nikukungulula mawanangana
hanga ngukaazukwile ufwatulo wami;
kusasaminya cheswe cha utenu wami.
Mumu akwa hashi eswe makajimuka
mu kahia ka ufwatulo wami wa ukwa.
9Ha mwaka uze mungwalumuna kuhanjika cha mavungu
chikapwe kuhanjika chipema
hanga eswe akatongole jina lia Yehova
nikumulingila ni mbunge yimuwika.
10Sali lize lia njiji ja Etiopia
akwa kungwita, mwana wa pwo atu jami a kumwanga
makaneha mulambu wami.
11Ha tangwa lize kechi kunukolesa sonyi
ha mukunda wa yitanga yize nwangukatukilile nayo;
mumu ha mwaka uze munguchiza hakachi kenu
waze akulisamba ni kulengumuka cho,
ni yenu kunuchi kulizata nawa
mu mulundu wami usandu.
12Mumu munguhichika hakachi kenu
atu akulikehesa ni kushimbika.
O makafupa chiswamo mu jina lia Yehova.
13Waze malisalaho mu Izalele
kechi kalinga chipi nichimwe.
Kechi kahanjika mahuza;
chipwe kuwana mu makanwa jo limi lia kwonga.
Mumu makawana kelo; makapomba;
niumwe makaakolesa woma wakuhi.
14Ena mwana-pwo Zaione, imba ni liji linene.
Ena Izalele, kololoka!
Ena mwana-pwo Yerusaleme
wahilila ni kulikwiza ni mbunge ye yeswe.
15Yehova hachiza uhiso uze wa kulimika ni yena;
hambila akwa kole je.
Mwanangana wa Izalele, mwe Yehova mwali muli yena;
kuchi kevwa nawa woma wa yuma yipi.
16Ha tangwa lize makamba ku Yerusaleme ngwo,
Ena Zaione, kanda wivwa woma;
moko je kanda ahonga.
17Yehova Zambi ye mwali muli yena,
mwe ka jita yoze wakuhana kukumba.
Kumakevwa kuwaha ni yena ni chiseke chinji;
kumakakuhuzulula mu zango lienyi;
kumakalikwiza ni yena ni miaso ya tachi
18ngwe ha tangwa lia chiwanyino.
Mungukachiza lamba kuli yena
chocho kuchikevwa nawa luchoko walio.
19Ha mwaka uze mungukasopesa waze eswe akukupinjisa.
Mungukalamwina mukwa kupalita;
mungukakungulula waze aahumine.
Waze aakolesele sonyi hashi heswe,
mungwapwisa uhaliso, ni jina lia lufuma.
20Ha mwaka uze mungukanunjisa;
mungukanukungulula;
mumu mungukanupwisa jina lia lufuma ni uhaliso
hakachi ka mavungu eswe a hashi
muze mungukuhilwisa kuwaha chenu ku meso jenu.
Chocho kanambe Yehova.
Currently Selected:
ZEFANIA 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
