ZEFANIA 1
1
1Liji lia Yehova lize liejile kuli Zefania mwana Kushi, mwana Gedalia, mwana Amaria, mwana Hezekia, ha matangwa a Josia mwana Amone mwanangana wa Yunda.
2Yehova kanambe ngwenyi,
Mungukakomba liakulu yuma yeswe hashi.
3Mungukakomba atu ni tushitu.
Mungukakomba tujila a mu tetela,
ni yishi a mu kalunga-lwiji,
ni yitalingiso, ni yingulungulu.
Mungukasutula e atu lume hashi.
Chocho kanambe Yehova.
4Mungukolola kwoko liami kulimika ni Yunda
ni kulimika ni akwa Yerusaleme eswe.
Mungukateta masalila ja Mbale kuma kwo kuno,
ni lie jina lia asasendote ja mahamba,
5waze ha mafulumba kakulihetamina ku mbunga ya mwilu;
waze akulihetamina nikulishinga ni Yehova,
hindu kakulishinga ni Malekame,
6waze hanalitwamina kukaula Yehova;
kafupile Yehova, chipwe kumuhula.
7Holenu kumeso ja Mwene Yehova,
mumu tangwa lia Yehova hiliakundama hakamwihi;
Yehova hanalulika yitapo ni kusela ku usandu ngeji jenyi.
8Mba ha tangwa lia chitapo cha Yehova—
munguhana kastigu kuli akwa chiyulo ni ana ja mwanangana,
ni waze eswe akuzala mazalo a tundaka.
9Ha tangwa lize mungulamba kastigu
mweswe mukwa kutumbuka chikuli
ni waze akuzalisa mazuwo ja akako
ni upupilo ni wiji.
10Yehova kanambe ngwenyi, Ha tangwa lize makevwa muteto ku chikolo cha yishi,
ni mbimbi ku chihanda chamuchiali,
ni zungo linene ku milundu.
11Lilenu mbimbi enu nwatwama ku Makateshi,
mumu akwa kusepa hahwako,
waze eswe akupezalisa prata haatetako.
12Ha mwaka uze mungupolongoza mu Yerusaleme ni ndeya.
Mungulamba kastigu malunga
waze anenguluka ni kutoha;
waze akwamba mu mbunge jo ngwo,
Chipwe chipema, chipwe chipi, Yehova kechi kalinga nichimwe.
13Mapunda yikumba yo;
menyeka mazuwo jo.
Chipwe matunga mazuwo
kechi katwamamo.
Chipwe matumba miuva,
kechi kanwa vinyu yayo.
14Tangwa linene lia Yehova linakundama;
linakundama fuji-fuji.
Chizungozungo cha tangwa lia Yehova chisasu;
kwenako akwa ndundo mateta ni lijilinene.
15Tangwa lize lia ufwatulo;
tangwa lia kupinda ni kulifwita;
tangwa lia kwenyeka ni kukuwisa;
tangwa lia milima ni kulendama;
tangwa lia malelwa ni milima pwi;
16tangwa lia liji lia chitavwi ni kukalumioka cha jita
kulimika ni yihunda ya kukolesa;
cha kulimika ni yipanga-ya-mawe yisuku.
17Hali atu mungukokela kupinda,
chocho kumakenda ngwe tupuputa,
mumu hanavulumuna Yehova.
Makazukula manyinga jo ngwe fufuta,
ni musunya wo ngwe tuji.
18Ha tangwa lia ufwatulo wa Yehova
kechi kahasa kulipulula chipwe ni prata yo,
chipwe ni oru yo.
Mu kahia ka ufwatulo wenyi wa ukwa
hashi heswe muhaliwa,
mumu makasulisa akwa hashi eswe
liakulu, susumuku lume.
Currently Selected:
ZEFANIA 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
