ZEKARIA 14
14
1Limwe tangwa lia Yehova kulineza muze upite wenu wa kupupa makaupangila hakachi kenu. 2Mumu mungukakonga mavungu eswe akungulukile kulimika ni Yerusaleme ni jita. Makatambula che chihunda; makapupa mazuwo nikupikapika mapwo. Chihanda cha ha muchima cha chihunda muchiya ku unjize alioze masalila ja atu kechi kaateta ku chihunda. 3Mba Yehova makatuhuka mukwasa jita ni mavungu aze ngwe akulinga ha tangwa lia jita. 4Ha tangwa lize yiliato yenyi muyikamana ha mulundu wa Olevwe uze uli kulutwe lia Yerusaleme sali lia ku Chivumbuko. Mulundu wa Olevwe muukapulika yihanda yiali chize ku sali lia Chivumbuko ndo ku sali lia Chitokelo ngwe mungulunga unene chikolo, chocho chihanda chimuwika cha mulundu muchisetuka ku Norte ni chihanda chikwo ku Sule. 5Mba mungulunga wa milundu yami makaujika, mumu mungulunga wa milundu muukakwata kwe ku lumbu liawo, mba munukachina ngwe nwachinyine ku munyiko ha matangwa ja Uzia mwanangana wa Yunda. Henaho Yehova Zambi yenu kumakeza ni asandu jenyi eswe hamwe nenyi.
6Ha tangwa lize kukuchi kapwa chishika chipwe chiwe. 7Kumukukapwa mwalwa tangwa lieswe nganganga (Yehova kanachinyingika) hi mwalwa ko, hi ufuku ko, mumu ha chingoloshi kumukukapwa pangu.
8Ha tangwa lize meya a mwono makatuhukila mu Yerusaleme; chihanda cha ha muchima muchikatalikisa ku kalunga-lwiji wa ku Chivumbuko, chihanda cha ha muchima muchikatalikisa ku kalunga-lwiji wa ku Chitokelo. Makapalika ha lushiho ni ha lwiza.
9Yehova makeza kupwa mwanangana wa hashi heswe. Ha tangwa lize Yehova makapwa umuwika ni jina lienyi limuwika.
10Chifuchi cheswe muchikalumuka chana chize ku Ngeba ndo ku Rimone sali lia Yerusaleme ku Sule. Alioze Yerusaleme muyikanangama ha chihela chayo chize ku chikolo cha Mbenjamine ndo kuze kwapwile chikolo chikulu, ndo ku chikolo cha mbango, ni chize ku kaposhi ka Hananele ndo ku ukamino wa vinyu wa mwanangana. 11Atu makatwamamo mumu kukuchi kapwa nawa shingo. Yerusaleme muyikatwama kawape.
12Yehova makalamba ni musongo mavungu aze eswe makasa jita ni Yerusaleme.
Musunya wo muukapola shimbu anachimana ha molu jo; meso jo makapola mu mitwe yo; malimi jo makapola mu makanwa jo. 13Ha tangwa lize umwe mwongo unene wa kuli Yehova muukaakwata, chocho mutu mweswe makwata ku kwoko lia mukwo, ni kwoko lia umwe mulikazunduka kulimika ni kwoko lia mukwo. 14Chipwe Yunda makasa jita ni Yerusaleme. Ni yikumba ya mavungu eswe a kujingilika makayikunga ya kulumbama, ya oru, ni prata, ni uzalo. 15Musongo umwe wa kulifwa ni uno muukakwata tuvwalu, ni mula, ni tumelu, ni yimbulu, ni yimuna akwo eswe waze makapwa mu yilombo yize.
16Waze eswe makasala ni mwono hakachi ka mavungu eswe akwasa jita ni Yerusaleme makakanduka mwaka ha mwaka kuwayila Mwanangana, mwe Yehova-wa-Tujita, ni kufunga chiwanyino cha yisakila. 17Nyi kachi amwe hakachi ka yisemuko ya hashi kayile ku Yerusaleme kuwayila Mwanangana, Yehova-wa-Tujita, vula kechi kaanokena. 18Nyi akwa chisemuko cha Engitu kechi kaya kusoloka mba makakwachika ni musongo uze Yehova kakutumina hali mavungu aze kayile kufunga chiwanyino cha yisakila. 19Chocho makalamba Engitu, chocho makalamba mavungu eswe waze kayile kufunga chiwanyino cha yisakila.
20Ha tangwa lize makola ha ngizo ja tuvwalu ngwo, Asandu kuli Yehova. Ni ndeho ja mu zuwo lia Yehova mujikapwa ngwe misenge ya kulutwe lia chilumbilo. 21Ndeho jeswe mu Yerusaleme ni mu Yunda mujikapwa jisandu kuli Yehova-wa-Tujita, kashika akwa kulambula eswe mahasa kwiza ni kujitambula, ni kutelekelamo yifwo ya milambu. Kukuchi kapwa nawa umwe mukwa negocio mu zuwo lia Yehova-wa-Tujita ha tangwa lize.
Currently Selected:
ZEKARIA 14: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
