USOLWELO 5
5
1Namwene ha kwoko lia chindume lia yoze Watwamine ha ngunja mukanda unasonewa muchima ni hanyima, wa kujika chikolo ni yijikilo shimbiali. 2Namwene mungelo wa ngolo kanambujola ni liji linene ngwenyi, Iya unatela kupakula mukanda, ni kupatula yijikilo yawo? 3Mba niumwe wahashile mwilu chipwe hashi, chipwe kushi lia hashi, kupakula mukanda, chipwe kutalamo. 4Mba nalilile chikolo, mumu niumwe kamuwanyine watela kupakula mukanda ni kutalamo: 5mba umwe wa kuli makulwana yamba kuli yami ngwenyi, Kanda ulila; tala, mwe Ndumba yoze wa ku vungu lia Yunda, chikota cha David, hanakumbu kupakula mukanda ni yijikilo yawo shimbiali.
6Mba namwene mukachi ka ngunja ni akwa mwono awana, ni mukachi ka makulwana, mwana-panga kanamana ngwe hamushiha, kali ni mbinga shimbiali, ni meso shimbiali, eno maspiritu shimbiali a Zambi a kutumiwa hashi heswe. 7Iye wayile, wawanjile ku kwoko lia chindume lia yoze watwamine ha ngunja.
8Mba muze te handa mukanda, akwa mwono awana ni makumi aali a makulwana ni makulwana awana afulamanyine kumeso ja mwe Mwana-panga, mweswe ni kalialia ni misenge ya oru ya tò ni insensu, yenayo yilemba ya asandu. 9O yemba mwaso waha, ngwo,
Yena kuwatela kwanda mukanda, ni kupakula yijikilo yawo:
mumu akushihile, walanjile kuli Zambi ni manyinga je,
amwe a ku mavungu eswe, ni ku malimi eswe, ni kuli atu eswe, ni ku minyachi yeswe,
10mba Waapwishile kuli Zambi yetu wanangana ni asasendote,
o kumakayula hashi.
11Namwene, nevwile liji lia angelo anji ha kujingilika ngunja, ni akwa mwono awana ni makulwana; ni chize aalwile ngwo, Chihuji cha yihuji ni tununu twa tununu. 12Kanambe ni liji linene ngwo, Mwe Mwana-panga yoze hanamushihi katela kutambula tachi, ni upite, ni mana, ni ngolo, ni ulemu, ni uhenya, ni lufuma. 13Ni yuma yeswe ya kutangiwa, yize yili mwilu, ni hano hashi, ni kushi lia hashi, ni mu kalunga-lwiji, ni yuma yize yeswe yilimo, naavwile ngwo, Lufuma, ni ulemu, ni uhenya, ni ndundo yikapwe kuli yoze watwama ha ngunja ni kuli mwe Mwana-panga ndo ku miaka yeswe ya mutolo. 14Ni akwa mwono awana ambile ngwo, Amene; ni makulwana afulamanyine, awayilile.
Currently Selected:
USOLWELO 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
