USOLWELO 3
3
1Kuli mungelo wa chikungulwila cha ku Sarte Soneka ngwe, Yino yuma kanambe yoze uli ni maspiritu shimbiali a Zambi, ni matongonoshi shimbiali ngwenyi,
Ngunanyingika yitanga ye, jina uli nalio ngwe, mwono ukwete, aiioze kuunafu. 2Lako, utakamise yuma yize yinasala, yize yinambe kufwa: mumu chawanyine yitanga ye yingunu kumeso ja Zambi yami. 3Iwuluka kashika ngwe watambwile, ni chize wevwile; uchifunge, Ulikonyeke. Kashika nyi kuchi kulá, mungukeza ngwe mwiji, kuchi kunyingika ha ola yize mungwiza hali yena. 4Alioze majina akehe uli no mu Sarte, waze kachishile mazalo jo: o kumakenda hamwe ni yami mu mazalo atoma; mumu kanatela.
5Yoze makumba, chocho kumamujika mazalo atoma. Chichi kajimuna nichimwe jina lienyi mu mukanda wa mwono, aiioze mungukatayiza jina lienyi kumeso ja Tata, ni kumeso ja angelo jenyi. 6Yoze uli ni matwi, evwe chize anambe Spiritu ku yikungulwila.
7Kuli mungelo wa chikungulwila cha ku Filadelfia Soneka ngwe, Yino yuma kanambe mwe musandu, mukwa umwenemwene, yoze uli ni sapi ya David, yoze wakwazulula mba niumwe kechi kájila, wakwájila mba niumwe kechi kázulula, ngwenyi:
8Ngunanyingika yitanga ye, (tala, hingunase kumeso je pito lia kwazulula, lize niumwe mahasa kwájila), ngwami, Tachi jikepe ukwete, hiunafungu liji liami, kwalikalile jina liami. 9Mungukahana waze a ku sunangonga ya Satana, waze akwamba ngwo, Yetu tuli A-Yunda, ni hi A-Yunda ko, aiioze kanahanjika mahuza; mungulinga hanga akeze, akawayile kulutwe lia yiliato ye, makanyingika hingunakuzange. 10Mumu hiunafungu liji lia uhumikizo wami, yami nawa kumungukakufunga ku ola ya cheseko, yize muyiza ha yifuchi yeswe ya hashi mukweseka waze akutwama hashi. 11Nguneza nikawashi: lalaminya ku chize uli nacho, hanga niumwe kechi katambula chipangula che. 12Yoze makumba, mungumupwisa nguji mu tembele ya Zambi yami, iye kechi katuhukamo nawa nichimwe: mungusoneka hali iye jina lia Zambi yami, ni jina lia limbo lia Zambi yami, lia Yerusaleme yaha, yize muyihulumuka mwilu, ya kuli Zambi yami, ni jina lia yami mwene liaha. 13Yoze uli ni matwi, evwe chize anambe Spiritu ku yikungulwila.
14Kuli mungelo wa chikungulwila cha ku Laotisea Soneka ngwe, Yino yuma kanambe mwe Amene, chela wamwenemwene keshi mahuza, we uputukilo wa kutanga cha Zambi ngwenyi,
15Ngunanyingika yitanga ye, yena hi uli mukekema ko, chipwe hi uli muhiluka ko, ngunazange kachi wapwa mukekema hanji muhiluka, 16aiioze se uli musaluka, ni hi mukekema ko, chipwe hi mufuluka ko, mungukusaza mu kanwa liami. 17Mumu yena wakwamba ngwe, Nguli pichi, hingunapichi upite, chishi kuhona nichimwe; kwanyingikine yena uli mwe mukwa kulungajala, ni mukwa hunya, ni chiswale, ni kapuputa, ni uselesele uli nawo. 18Ngunakwehe mana ngwami, Ulande kuli yami oru ya kusaya ku kahia, hanga ukapwe pichi, ni mahina atoma hanga uzale, hanga sonyi ja uselesele we kujichi kusoloka; ni yitumbo ya meso ya kukwita meso je, hanga umone. 19Waze eswe ngunaazange nakwaámbila, nakwalamba ha kufumba: sako mbunge yeswe kashika, Ulikonyeke. 20Tala, ngunamana ku pito, ngunangongwela: kachi umwe mevwa liji liami, mázulula pito, mungunjila kuli iye, mungulia hamwe nenyi, neye hamwe ni yami. 21Yoze makumba mungumwaha mukutwama hamwe ni yami ha ngunja yami, chizechene ngwe ni yami nawa hingunakumbu, hingunatwama hamwe ni Tata ha ngunja yenyi. 22Yoze uli ni matwi, evwe chize anambe Spiritu ku yikungulwila.
Currently Selected:
USOLWELO 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
