USOLWELO 20
20
1Mba namwene mungelo kanahulumuka mwilu, kali ni sapi ya jondo, ni lenge linene mu kwoko lienyi. 2Iye wakwachile ndragau, mwe kapela wa shakulu, mwenawo Ndiapu kanda Satana, wamukashile kanunu ka miaka. 3Wamunyashine mu jondo, waliajilile, walijikile ni Chijikilo helu lienyi, hanga kechi kapiangula nawa mavungu ndo kanunu ka miaka mamanunuka: kulutwe lia yino yuma, chatamba kumutusula ha shimbu likepe.
4Mba namwene ngunja ni waze atwamineho, mba aahele upatwilo: namwene alma ja waze aatapile ha Shindakenyo ya Yesu, ni ha liji lia Zambi, ni waze kawayilile ngongo, chipwe kaponya kenyi, ka, katambwile mufunda ha mahuma jo ni ha moko jo; o atwamine ni mwono, ayulile hamwe ni Kristu kanunu ka miaka. 5Ni afu aze asalile katwamine ni mwono ndo haze kanunu ka miaka mamanunuka. Uno we Uhindukilo utangu. 6Kawaha ni musandu yoze uli ni chihanda mu Uhindukilo utangu; hali wano kufwa chamuchiali kuchishi chiyulo nichimwe; aiioze makapwa asasendote a Zambi ni a Kristu, makayula hamwe nenyi kanunu ka miaka.
7Mba muze kanunu ka miaka hamanunuka, makatusula Satana ku zuwo lienyi lia ususu, 8makatuhuka mukupiangula mavungu waze ali ku mbango jiwana ja hashi, Ngoke ni Mangoke, mukwakungulula ku jita: ha kwaalula kanapu ngwe masekeseke a ku kalunga-lwiji. 9O afutunukine ha kuzazuluka cha hashi, o ajingilikile chilombo cha asandu, ni limbo lize analizange chikolo: ni kahia kahulumukine ka kuli Zambi mwilu, kaalesele. 10Ni Ndiapu yoze waapiangwile amunyashine mu Chitende cha kahia ni fundanga, muze ali nawa ngongo ni profeta wa kwonga; kumakaamwesa lamba mwalwa ni ufuku ndo ku miaka yeswe ya mutolo.
11Namwene ngunja yinene yitoma, ni yoze watwamineho, kumeso jenyi lilu ni hashi yachinyine; kuyawanyine chihela. 12Namwene afu, anene ni akepe, kanamana kulutwe lia ngunja; apakwile mikanda, mba apakwile mukanda ukwo, uze wa mwono: apatwilile afu ku yuma yize yasonewene mu mikanda, nikulita ni yitanga yo. 13Ni kalunga-lwiji wechele afu aze apwilemo; ni kufwa ni Heteze yechele afu aze apwilemo: aapatwilile, mutu ni mutu nikulita ni yitanga yo. 14Ni kufwa ni Heteze aanyashine mu Chitende cha kahia. Chino che kufwa chamuchiali, che Chitende cha kahia. 15Nyi kachi umwe kamuwanyine wa kusoneka mu mukanda wa mwono, amunyashine mu Chitende cha kahia.
Currently Selected:
USOLWELO 20: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
