USOLWELO 1
1
1Usolwelo wa Yesu Kristu, uze Zambi wamuhele mukulweza kuli ndungo jenyi chize chatamba kupwa nikawashi: iye watumine mungelo waulwezele ni yilayi kuli ndungo yenyi Yoano. 2Mwenawo washindakenyene ha liji lia Zambi, ni ha Shindakenyo ya Yesu Kristu, yuma yize yeswe amwene. 3Kawaha yoze matanga, ni waze mevwa maliji a uprofeto, waze mafunga yuma yize yinasonewamo: mumu mwaka hakamwihi uli.
4Yami. Yoano ngunasoneka ku yikungulwila shimbiali yize yili mu Eshia: Vumbi kuli yenu ni sambukila ya kuli yoze kwali, yoze wapwile, yoze meza kupwa: ni ya kuli Maspiritu shimbiali waze ali kulutwe lia ngunja yenyi; 5ni ya kuli Yesu Kristu, mwe Chela wamwenemwene, mwe Mutangu kuhinduka hakachi ka afu, ni mwe mukwa kuyula hakachi ka mianangana ja hashi.
Kuli yoze wakutuzanga, watutuswile ku milonga yetu mumu ha manyinga jenyi; 6watupwishile wanangana, asasendote kuli Zambi yenyi kanda Tato; uhenya ni ndundo yikapwe kuli iye ndo ku miaka ya mutolo. Amene. 7Talenu, kumeza ni malelwa; ni meso eswe kumakamumona, ni waze amutuwile; ni mavungu eswe a hashi kumakahia mbimbi hali iye. Chochene. Amene.
8Yami nguli mwe Alfwa ni mwe Omega, chocho anambe Mwene Zambi, yoze kwali, yoze wapwile, yoze meza kupwa, mwe Mukwa-Ndundo-Jeswe.
9Yami Yoano, ndumbwenu ni mukwa kulianyina-ni-mukwenu ha luyinda ni wanangana ni uhumikizo wa Yesu, napwile mu tungu lize ngwo, Patemu, mumu ha liji lia Zambi ni mumu ha Shindakenyo ya Yesu. 10Napwile mu Spiritu ha tangwa lia Mwene, nevwile kunyima yami liji linene, ngwe lia chitavwi, 11Unambe ngwo, Chize unamono, chisoneke mu mukanda, ukautume ku yikungulwila shimbiali: ku Efwesu, ni ku Semina, ni ku Perekamu, ni ku Tayatera, ni ku Sarte, ni ku Filadelfia, ni ku Laotisea.
12Natewulukile hanga ngumone liji lize liahanjikile ni yami; mba ha kutewuluka, namwene yikwachilo ya ndeya ya oru shimbiali; 13mukachi ka yikwachilo shimbiali ya ndeya umwe wa kulifwa ni mwe Mwana Mutu, unazala uzalo wa kuheta ku yiliato, kanalijichika ha tulo ni muya wa oru. 14Mutwe wenyi ni kambu jenyi japwile jitoma ngwe wanda, utoma ngwe neve; ni meso jenyi ngwe mulengi wa kahia. 15Yiliato yenyi yapwile ya kulifwa ni kengelia ya kulejima, ngwe ja kusaya mu lutengo munene; ni liji lienyi ngwe lundunjila wa meya anji eka ni eka. 16Iye, ha kwoko lienyi lia chindume wapwile ni matongonoshi shimbiali: ni mu kanwa lienyi mwatuhuka katana wa mukwale kanambuka: ni ku meso jenyi kunapu ngwe tangwa muze mulipanguka ni tachi jalio.
17Muze namumwene, nafulamanyine ku yiliato yenyi ngwe mufu; iye Wasayikile kwoko lienyi lia chindume hali yami, ngwenyi, Kanda wivwa woma, yami nguli mwe mutangu ni mwe kasula-songo; 18ni mwe mukwa mwono; napwile mufu, aiioze natwama ni mwono ndo ku miaka ya mutolo, ni sapi ja kufwa ni Heteze nguli najo. 19Soneka kashika yuma yize hiwamona, ni yuma yize kuyili, ni yuma yize muyipwa kulutwe lia yino. 20Chijimbikilo cha matongonoshi shimbiali waze hiwamona ha kwoko liami lia chindume, ni yikwachilo shimbiali ya ndeya ya oru ngwami, Matongonoshi shimbiali, angelo ja yikungulwila shimbiali; ni yikwachilo shimbiali ya ndeya, yikungulwila shimbiali.
Currently Selected:
USOLWELO 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
