MIKA 3
3
1Yingwamba ngwami,
Ivwenu, enu akwa lutwe mu Yakomba,
akwa kuyula mu munyachi wa Izalele!
Te kuchanutambile kunyingika upatwilo wa kulita?
2Enu, chipema chanupihila; nwakuzanga chipi.
Nwakuzununa kowa lia atu jami,
ni musunya ha yifwaha yo.
3Enu nwakulia musunya wa atu jami,
ni kwazununa makowa,
ni kumakwona yifwaha yo,
nikwatetateta ngwe yifwo mu ndeho;
ngwe musunya mu lundeho.
4Mba kumakateta kuli Yehova
alioze aye kechi kaakumbulula.
Kumakaaswekela meso jenyi ha mwaka uze
mumu yitanga yize halinga yipi.
5Ha kutwala kuli aprofeta aze akupiangula atu jami,
waze akwamba ngwo, Sambukila,
muze maaha yuma ya kulia,
alioze masa jita ni yoze kasele chuma mu makanwa jo,
Yehova kanambe ngwenyi,
6Kashika kumukukapwa kuli yenu ufuku kuushi usolwelo;
milima kuli yenu, ni kutaha chakuhi.
Tangwa mulikanjila hali aprofeta;
tangwa lize mulikapwa lilá hali ayo;
7akwa munanyi makasauka;
tahi mevwa sonyi;
eswe makafuka ku mivumbo yo
mumu kumbululo liakuhi lia kuli Zambi.
8Alioze ha kutwala kuli yami hananguzalisa ni tachi,
ni Spiritu wa Yehova,
ni ululi, ni ndundo,
ngukalumbunwine Yakomba uvulumunyi wenyi
ni kuli Izalele shili yenyi.
9Panjikenu, enu akwa lutwe mu munyachi wa Yakomba,
ni akwa kuyula mu munyachi wa Izalele.
Enu upatwilo wa kulita wanupihila,
nwakuhengesa ululi weswe.
10Nwakutungisa Zaione ni manyinga,
nwakutungisa Yerusaleme ni uhenge.
11Akwa lutwe jako kakupatula ha chindo;
asasendote jako kakulongesa ha fweto;
aprofeta jako kakutaha ha mbongo;
hindu kakujamina hali Yehova nikwamba ngwo,
Yehova hwali hakachi ketu;
nichimwe chipi muchikatuwana.
12Kashika ha mukunda wa yenu
Zaione muyikapwa ngwe munda wa kuchipa;
Yerusaleme muyikalumuka mulumba wa yipuzupuzu
ni mulundu wa lie zuwo muukapwa mulundu wa usaki.
Currently Selected:
MIKA 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
