MIKA 1
1
1Liji lia Yehova lize liejile kuli Mika wa ku Morese ha matangwa ja Yotame, ni Ahaze, ni Hezekia mianangana ja Yunda, lize amwene lia kutwala ku Samaria ni Yerusaleme.
2Ivwenu enu eswe akwa mavungu;
panjika ena hashi ni yuma yeswe yiliho,
hanga Mwene Yehova akapwe chela wa kunushindakenya,
mwe Mwene ku tembele yenyi yisandu.
3Mumu nyingikenu, Yehova kanakatuka kuma kwenyi,
kumakahulumuka ni kuliata ha milundu ya hashi.
4Milundu muyikasangunuka kushi lia yiliato yenyi,
ni yikulo muyikapulika
ngwe sera kumeso ja kahia,
ngwe meya akuzujila homa ha kupalumuka.
5Chino cheswe mumu ha Utanguko wa Yakomba
ni milonga ya munyachi ya Izalele.
Utanguko wa Yakomba uka?
Hi Samaria ko?
Mulonga wa munyachi wa Yunda uka?
Hi Yerusaleme ko?
6Kashika mungupwisa Samaria mulumba mu chifuchi cha washi,
kuma kwa kulimina minda ya uva.
Munguzukula mawe jenyi mu chikulo
ni kufukula fundamentu jenyi.
7Tuponya twenyi maapalwola yipalupalu;
fweto yeswe ya ukoi wenyi mayocha;
mahamba jenyi eswe maenyeka.
Mumu yakatukile ku fweto ya ukoi,
kashika ku fweto ya ukoi muyikaya.
8Ha chuma chino mungulinyenga ni kulila mbimbi;
mungwenda wa kufukula, ni uselesele;
mungulila lungungu ngwe mikuza;
nikulishimwoka ngwe yikungulu.
9Mumu mbandu jenyi kechi kahasa kujiwuka;
hijaheta ndo ku Yunda,
hijaheta ndo ku chikolo cha atu jami,
kwe ku Yerusaleme.
10Kanda nuchambulula mu Ngata,
kanda nulila chipwe hakehe.
Lilangumunenu mu fufuta mu Mbete-le-Afara.
11Enu akwa Shafiri,
palikenu jila yenu ni Uselesele ni sonyi.
Enu akwa Zanana,
kanda nutuhuka.
Kulila mbimbi cha Mbete-Ezele
muchinuchiza umanyino.
12Akwa Marote kanatwaminyina nikutalatala chimwe chipema,
mumu chuma chikalu hichahulumuka mwilu kuli Yehova ndo ku chikolo cha Yerusaleme.
13Enu akwa Lakishi kashilenu tuvwalu ku matemba,
enu nwapwile uputukilo wa uvulumunyi kuli mwana-pwo Zaione,
mumu muli yenu awanyine Utanguko wa Izalele.
14Kashika munuhana yawana ya kulishika kuli Moreshete-Ngate;
mazuwo ja Akaziba mapwa kwonga kuli mianangana ja Izalele.
15Cheka nawa munguneha mukwa kukumba hali yenu akwa Maresa;
uhenya wa Izalele muwiza ku Ndulame.
16Lipwisenu ni lwole; litewulenu kambu jenu
ha mukunda wa ana ja uwahililo wenu.
Litewulenu ngwe makuyu,
mumu manukatuka nikuya ku unjize.
Currently Selected:
MIKA 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
