MATEU 26
26
1Muze te Yesu hamanununa maliji ano eswe, wambile kuli tumbaji twenyi, ngwenyi, 2Nunanyingika kulutwe lia matangwa aali, Chizomboka muchipwa, mba makakunjika mwe Mwana Mutu akamuhachile ha kulusu.
3Hohene asasendote akwa lutwe, ni makulwana ja atu, akungulukile ku yize ya sasendote mukwa lutwe, yoze ngwo, Kayafwa. 4Atwamine punga hanga akakwate Yesu ni kalimbalimba, akamushihe. 5Alioze ambile ngwo, Hi ha chiwanyino ko, kuchina zungo mulipwa hakachi ka atu.
6Achi, muze Yesu apwile mu Mbetaniya, mu zuwo lia Semone mukwa mbumba. 7Pwo wejile kuli iye ni kasaji ka yitumbo ya vumba lipema, yilemu chikolo, neye wayitehwine ha mutwe wenyi shimbu atwamine ku mesa. 8Alioze muze tumbaji twenyi achimwene, evwile kupiha ngwo, Umbulungunya uno waka? 9Mumu mahasa kulanjisa yitumbo yino ha ndando yinene, akayihane kuli yiswale. 10Alioze Yesu ha kuchinyingika, wambile kuli ayo ngwenyi, Kuchi te nunapikalisa pwo? Mumu halinga chitanga chipema hali yami. 11Mumu yiswale nuli no matangwa eswe hamwe ni yenu; alioze kunushi ni yami matangwa eswe. 12Mumu te hatehuna yitumbo yino ha mujimba wami, hachilinga ha kungufunda. 13Pundu ngwami, Kweswako makambujola sango lino lipema hashi heswe, chize nawa yono pwo halinga, kumakachambulula hali iye, hanga akamwiwuluke.
14Hohene umwe wa kuli kumi ni aali, jina lienyi, Yundase, Ka-Keriote, wayile kuli asasendote akwa lutwe, 15ngwenyi, Kuchi munungwaha kachi mungumukunjika kuli yenu, no apezalishile hali iye makumi atatu a mbongo ja prata. 16Chize ku ola yize wafupile mwaka upema hanga akamukunjike kuli ayo.
17Achi, ha tangwa litangu lia mbolo yize kuyishi futunwiso, tumbaji ejile kuli Yesu ngwo, Kulihi unazange yetu tululike hanga ukalie Chizomboka? 18Aye ngwenyi, Yénu kwimbo kuli Sanganji, ngwenu, Longeshi kanambe ngwenyi, Mwaka wami uli hakamwihi, mungufunga Chizomboka mu zuwo lie hamwe ni tumbaji twami. 19Tumbaji alingile ngwe Yesu waatumine, no alulikile Chizomboka.
20Muze hapwile chingoloshi, watwamine ku mesa hamwe ni kumi ni aali. 21Shimbu machilia, wambile ngwenyi, Pundu ngwami, Umwe wa kuli yenu makangukunjika. 22Evwile chinyengo chinji, aputukile kwamba kuli iye, mweswe wa kuli ayo ngwenyi, Mwene, yami nyi? 23Iye wakumbulwile, ngwenyi, Yoze unatate kwoko lienyi hamwe ni yami mu chenga, mwenawo mangukunjika. 24Mwe Mwana Mutu maya chamwenemwene, nikulita ngwe chinasonewa hali iye; alioze lamba kuli yoze mutu makunjika mwe Mwana Mutu! hapwa hali yoze mutu kachi kasemukineko. 25Yundase yoze wamukunjikile, wakumbulwile ngwenyi, Longeshi, yami nyi? Yamba kuli iye ngwenyi, Yena wachamba.
26Shimbu machilia, Yesu wanjile mbolo, wayiwahishile, wayipalwile; wahanyine kuli tumbaji twenyi, ngwenyi, Wenu, nulie; mbolo yino mujimba wami. 27Wanjile musenge, wasakwilile, wauhanyine kuli ayo, ngwenyi, Nuunwe eswe; 28mumu musenge uno manyinga jami a usendo waha waze anamwangana hali anji ha ukonekeno wa milonga. 29Alioze ngunambe kuli yenu ngwami, Chichi kanwa nichimwe ku yino mihuko ya vindera, chize ku haliapwila ndo ku tangwa lize muze munguyinwa chaha hamwe ni yenu mu wanangana wa Tata.
30Mba muze te hemba mwaso, atuhukile kuya ku mulundu wa Olevwe. 31Hohene Yesu yamba kuli ayo ngwenyi, Yenu eswe kumunukatalinga mumu hali yami ufuku uno: mumu chinasonewa ngwo, Mungulamba kafunga, mba mapanga a ku mbunga makamwangana. 32Alioze kulutwe lia uhindukilo wami, mungukanutetekela ku Ngalileya. 33Alioze Petulu wakumbulwile ngwenyi, Chipwe kachi eswe matalinga hali yena, yami chichi kutalinga nilimwe tangwa. 34Yesu ngwenyi, Pundu ngwami, Ufuku uno shimbu ndemba kanda achitambika, kumukalikala yami katatu. 35Petulu ngwenyi, Chipwe mungufwa hamwe ni yena, chichi kalikala yena nichimwe. Chizechene nawa ambile tumbaji eswe.
36Hohene Yesu yeza hamwe no kuma anavulukako ngwo, Ngetesemane, yamba kuli tumbaji twenyi ngwenyi, Twamenu hano shimbu yami munguya kuze mukutomba. 37Watwalile hamwe nenyi Petulu ni ana aali a Zembendeu, mba waputukile kwivwa chinyengo nikulema chikolo mu mbunge. 38Hohene yamba kuli ayo ngwenyi, Mbunge yami yinevu chinyengo chahiana, ndo ku kufwa: salenu kuno, nulé hamwe ni yami. 39Wasosolokele kulutwe hakepe, wafulamanyine nikulemba ngwenyi, Tata, nyi muchitá, musenge uno ukatuke kuli yami: hindu kanda chikapwa ngwe yami ngunapale, alioze ngwe yena unapale. 40Yeza kuli tumbaji twenyi, yaawana mu tulo, yamba kuli Petulu ngwenyi, Kuma! kunwahashile kulá hamwe ni yami ola yimuwika, nyi? 41Lenu, lembenu, hanga kunuchi kunjila mu cheseko: spiritu chamwenemwene yatakama, alioze musunya ulelu. 42Cheka nawa chisuho chamuchiali wasosolokele, walembele ngwenyi, Tata, kachi musenge uno kuushi kuhasa kukatuka kuli yami, shina munguunwa, upale we ulingiwe. 43Wejile cheka nawa, yaawana mu tulo, mumu meso jo alemene. 44Waahichikile cheka nawa, wayile, walembele chisuho chamuchitatu, nikwamba maliji wo ene. 45Hohene yeza kuli tumbaji, ngwenyi, Fungunukenu haliapwila, nuhwime; ola yinakundama, makunjika mwe Mwana Mutu ku moko ja yivulumunyi. 46Katukenu, tuyenu: yoze mangukunjika kanakundama.
47Shimbu machihanjika, Yundase, umwe wa kuli kumi ni aali, wejile, ni hamwe nenyi mbunga yinene ni tutana ni mbwechi, a kuli asasendote akwa lutwe ni makulwana ja atu. 48Achi, yoze wamukunjikile hanahe chilayi, ngwenyi, Mweswawo mungumumbeja, mwe iye: Mukwatenu. 49Haze hene wejile kuli Yesu, ngwenyi, Vulie, Longeshi! mba wamumbejele chikolo. 50Alioze Yesu wambile kuli iye ngwenyi, Mukwetu, linga chize unejila. Hohene ejile, amukwachile. 51Kumanyi, umwe wa kuli waze apwile hamwe ni Yesu wolwele kwoko lienyi, watomwene katana kenyi, walambile ndungo ya sasendote mukwa lutwe, wamutetele twitwi lienyi. 52Hohene Yesu yamba kuli iye ngwenyi, Tomeka katana ke mu chindalo: mumu waze eswe manda katana kumakatoka ku katana. 53Hanji unashinginyeka ngwe Chahashile haliapwila kuliumba kuli Tata, neye mangutumina ahiana kumi lia tununu ni tununu aali a mbunga ja angelo nyi? 54Ngwe kuchi kevwe yisoneko muyimanunuka ngwo, Chocho chatamba kupwa? 55Ha ola yize yene Yesu wambile ku mbunga ngwenyi, Nunatuhuka ngwe hali muhuza ni tutana ni mbwechi mukungukwata, nyi? Natwamine tangwa ha tangwa hamwe ni yenu nikulongesa mu tembele, mba kunwangukwachile. 56Alioze yino yuma yeswe yapwile, hanga yisoneko ya aprofeta yikamanunuke. Hohene tumbaji eswe amwehukile, achinyine.
57Waze akwachile Yesu amutwalile kuli sasendote mukwa lutwe Kayafwa, kuze akungulukile akwa kusonyeka ni makulwana. 58Petulu wamukawile kanonajila, ndo ku yize ya sasendote mukwa lutwe, neye wanjilile, Watwamine hamwe ni tupita, akamone songo. 59Asasendote akwa lutwe ni makulwana ni akwa kuyula eswe afupile yela a mahuza hali Yesu, hanga akamushihe. 60Alioze kawanyine nichimwe, chipwe yela anji a mahuza ejile, alioze kulutwe lia chize aali ejile, 61Ambile ngwo, Iye ngwenyi, Ngunahase kwonwona tembele ya Zambi ngukayitunge mu matangwa atatu. 62Sasendote mukwa lutwe wakatukile, wambile kuli iye ngwenyi, Kushi kukumbulula nichimwe? Kuchi wano anashindakenya hali yena? 63Alioze Yesu waholele. Sasendote wambile kuli iye ngwenyi, Shingo ngunakwehe mu jina lia Zambi ya mwono, Utwambulwile kachi yena uli mwe Kristu, mwe Mwana Zambi. 64Yesu yamba kuli iye ngwenyi, Yena wachamba; hindu ngwami, Kulutwe kumunukamona mwe Mwana Mutu kanatwama ha chindume cha tachi, kaneza ha malelwa a mwilu. 65Hohene sasendote mukwa lutwe wasonyene mahina jenyi, ngwenyi, Hashililika Zambi: kuchi tunafupu nawa hali yela? Talenu, haliapwila hinwevwa kushililika chenyi. 66Kuchi nunashinginyeka? No akumbulwile ngwo, Kanatela kufwa. 67Hohene yafwila mate ku meso jenyi, yamumbufula, mba amwe amulambile mbangala. 68Nikwamba ngwo, Tuprofeteze, yena Kristu, iya wakulamba?
69Alioze Petulu Watwamine haze mu yize, ni mwana-pwo mukwa milimo wejile kuli iye ngwenyi, Ni yena nawa wapwanga hamwe ni Yesu Ka-Ngalileya. 70Alioze walikalile kumeso ja eswe ngwenyi, Chanyingikine chize unambe. 71Muze te hatuhuka haze mushi lia senge, mukwo wamumwene, yamba kuli waze apwileko ngwenyi, Yono nawa kapwanga hamwe ni Yesu Ka-Nazare. 72Cheka nawa walikalile ni shingo ngwenyi, Chanyingikine yono mutu. 73Kulutwe hakepe waze amanyineko ejile, ambile kuli Petulu ngwo, Chamwenemwene ni yena nawa uli umwe wa kuli ayo; mumu kuhanjika che chinakusolola. 74Hohene waputukile kushingana ni kulishinga ngwenyi, Chanyingikine yono mutu. Haze hene ndemba watambikile. 75Petulu wewulukile liji lize amwambile Yesu ngwenyi, Shimbu ndemba kanda achitambika, kumukalikala yami katatu. Watuhukile, Walilile chikolo. #26.75 Te mbunga ya tununu atano.
Currently Selected:
MATEU 26: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
MATEU 26
26
1Muze te Yesu hamanununa maliji ano eswe, wambile kuli tumbaji twenyi, ngwenyi, 2Nunanyingika kulutwe lia matangwa aali, Chizomboka muchipwa, mba makakunjika mwe Mwana Mutu akamuhachile ha kulusu.
3Hohene asasendote akwa lutwe, ni makulwana ja atu, akungulukile ku yize ya sasendote mukwa lutwe, yoze ngwo, Kayafwa. 4Atwamine punga hanga akakwate Yesu ni kalimbalimba, akamushihe. 5Alioze ambile ngwo, Hi ha chiwanyino ko, kuchina zungo mulipwa hakachi ka atu.
6Achi, muze Yesu apwile mu Mbetaniya, mu zuwo lia Semone mukwa mbumba. 7Pwo wejile kuli iye ni kasaji ka yitumbo ya vumba lipema, yilemu chikolo, neye wayitehwine ha mutwe wenyi shimbu atwamine ku mesa. 8Alioze muze tumbaji twenyi achimwene, evwile kupiha ngwo, Umbulungunya uno waka? 9Mumu mahasa kulanjisa yitumbo yino ha ndando yinene, akayihane kuli yiswale. 10Alioze Yesu ha kuchinyingika, wambile kuli ayo ngwenyi, Kuchi te nunapikalisa pwo? Mumu halinga chitanga chipema hali yami. 11Mumu yiswale nuli no matangwa eswe hamwe ni yenu; alioze kunushi ni yami matangwa eswe. 12Mumu te hatehuna yitumbo yino ha mujimba wami, hachilinga ha kungufunda. 13Pundu ngwami, Kweswako makambujola sango lino lipema hashi heswe, chize nawa yono pwo halinga, kumakachambulula hali iye, hanga akamwiwuluke.
14Hohene umwe wa kuli kumi ni aali, jina lienyi, Yundase, Ka-Keriote, wayile kuli asasendote akwa lutwe, 15ngwenyi, Kuchi munungwaha kachi mungumukunjika kuli yenu, no apezalishile hali iye makumi atatu a mbongo ja prata. 16Chize ku ola yize wafupile mwaka upema hanga akamukunjike kuli ayo.
17Achi, ha tangwa litangu lia mbolo yize kuyishi futunwiso, tumbaji ejile kuli Yesu ngwo, Kulihi unazange yetu tululike hanga ukalie Chizomboka? 18Aye ngwenyi, Yénu kwimbo kuli Sanganji, ngwenu, Longeshi kanambe ngwenyi, Mwaka wami uli hakamwihi, mungufunga Chizomboka mu zuwo lie hamwe ni tumbaji twami. 19Tumbaji alingile ngwe Yesu waatumine, no alulikile Chizomboka.
20Muze hapwile chingoloshi, watwamine ku mesa hamwe ni kumi ni aali. 21Shimbu machilia, wambile ngwenyi, Pundu ngwami, Umwe wa kuli yenu makangukunjika. 22Evwile chinyengo chinji, aputukile kwamba kuli iye, mweswe wa kuli ayo ngwenyi, Mwene, yami nyi? 23Iye wakumbulwile, ngwenyi, Yoze unatate kwoko lienyi hamwe ni yami mu chenga, mwenawo mangukunjika. 24Mwe Mwana Mutu maya chamwenemwene, nikulita ngwe chinasonewa hali iye; alioze lamba kuli yoze mutu makunjika mwe Mwana Mutu! hapwa hali yoze mutu kachi kasemukineko. 25Yundase yoze wamukunjikile, wakumbulwile ngwenyi, Longeshi, yami nyi? Yamba kuli iye ngwenyi, Yena wachamba.
26Shimbu machilia, Yesu wanjile mbolo, wayiwahishile, wayipalwile; wahanyine kuli tumbaji twenyi, ngwenyi, Wenu, nulie; mbolo yino mujimba wami. 27Wanjile musenge, wasakwilile, wauhanyine kuli ayo, ngwenyi, Nuunwe eswe; 28mumu musenge uno manyinga jami a usendo waha waze anamwangana hali anji ha ukonekeno wa milonga. 29Alioze ngunambe kuli yenu ngwami, Chichi kanwa nichimwe ku yino mihuko ya vindera, chize ku haliapwila ndo ku tangwa lize muze munguyinwa chaha hamwe ni yenu mu wanangana wa Tata.
30Mba muze te hemba mwaso, atuhukile kuya ku mulundu wa Olevwe. 31Hohene Yesu yamba kuli ayo ngwenyi, Yenu eswe kumunukatalinga mumu hali yami ufuku uno: mumu chinasonewa ngwo, Mungulamba kafunga, mba mapanga a ku mbunga makamwangana. 32Alioze kulutwe lia uhindukilo wami, mungukanutetekela ku Ngalileya. 33Alioze Petulu wakumbulwile ngwenyi, Chipwe kachi eswe matalinga hali yena, yami chichi kutalinga nilimwe tangwa. 34Yesu ngwenyi, Pundu ngwami, Ufuku uno shimbu ndemba kanda achitambika, kumukalikala yami katatu. 35Petulu ngwenyi, Chipwe mungufwa hamwe ni yena, chichi kalikala yena nichimwe. Chizechene nawa ambile tumbaji eswe.
36Hohene Yesu yeza hamwe no kuma anavulukako ngwo, Ngetesemane, yamba kuli tumbaji twenyi ngwenyi, Twamenu hano shimbu yami munguya kuze mukutomba. 37Watwalile hamwe nenyi Petulu ni ana aali a Zembendeu, mba waputukile kwivwa chinyengo nikulema chikolo mu mbunge. 38Hohene yamba kuli ayo ngwenyi, Mbunge yami yinevu chinyengo chahiana, ndo ku kufwa: salenu kuno, nulé hamwe ni yami. 39Wasosolokele kulutwe hakepe, wafulamanyine nikulemba ngwenyi, Tata, nyi muchitá, musenge uno ukatuke kuli yami: hindu kanda chikapwa ngwe yami ngunapale, alioze ngwe yena unapale. 40Yeza kuli tumbaji twenyi, yaawana mu tulo, yamba kuli Petulu ngwenyi, Kuma! kunwahashile kulá hamwe ni yami ola yimuwika, nyi? 41Lenu, lembenu, hanga kunuchi kunjila mu cheseko: spiritu chamwenemwene yatakama, alioze musunya ulelu. 42Cheka nawa chisuho chamuchiali wasosolokele, walembele ngwenyi, Tata, kachi musenge uno kuushi kuhasa kukatuka kuli yami, shina munguunwa, upale we ulingiwe. 43Wejile cheka nawa, yaawana mu tulo, mumu meso jo alemene. 44Waahichikile cheka nawa, wayile, walembele chisuho chamuchitatu, nikwamba maliji wo ene. 45Hohene yeza kuli tumbaji, ngwenyi, Fungunukenu haliapwila, nuhwime; ola yinakundama, makunjika mwe Mwana Mutu ku moko ja yivulumunyi. 46Katukenu, tuyenu: yoze mangukunjika kanakundama.
47Shimbu machihanjika, Yundase, umwe wa kuli kumi ni aali, wejile, ni hamwe nenyi mbunga yinene ni tutana ni mbwechi, a kuli asasendote akwa lutwe ni makulwana ja atu. 48Achi, yoze wamukunjikile hanahe chilayi, ngwenyi, Mweswawo mungumumbeja, mwe iye: Mukwatenu. 49Haze hene wejile kuli Yesu, ngwenyi, Vulie, Longeshi! mba wamumbejele chikolo. 50Alioze Yesu wambile kuli iye ngwenyi, Mukwetu, linga chize unejila. Hohene ejile, amukwachile. 51Kumanyi, umwe wa kuli waze apwile hamwe ni Yesu wolwele kwoko lienyi, watomwene katana kenyi, walambile ndungo ya sasendote mukwa lutwe, wamutetele twitwi lienyi. 52Hohene Yesu yamba kuli iye ngwenyi, Tomeka katana ke mu chindalo: mumu waze eswe manda katana kumakatoka ku katana. 53Hanji unashinginyeka ngwe Chahashile haliapwila kuliumba kuli Tata, neye mangutumina ahiana kumi lia tununu ni tununu aali a mbunga ja angelo nyi? 54Ngwe kuchi kevwe yisoneko muyimanunuka ngwo, Chocho chatamba kupwa? 55Ha ola yize yene Yesu wambile ku mbunga ngwenyi, Nunatuhuka ngwe hali muhuza ni tutana ni mbwechi mukungukwata, nyi? Natwamine tangwa ha tangwa hamwe ni yenu nikulongesa mu tembele, mba kunwangukwachile. 56Alioze yino yuma yeswe yapwile, hanga yisoneko ya aprofeta yikamanunuke. Hohene tumbaji eswe amwehukile, achinyine.
57Waze akwachile Yesu amutwalile kuli sasendote mukwa lutwe Kayafwa, kuze akungulukile akwa kusonyeka ni makulwana. 58Petulu wamukawile kanonajila, ndo ku yize ya sasendote mukwa lutwe, neye wanjilile, Watwamine hamwe ni tupita, akamone songo. 59Asasendote akwa lutwe ni makulwana ni akwa kuyula eswe afupile yela a mahuza hali Yesu, hanga akamushihe. 60Alioze kawanyine nichimwe, chipwe yela anji a mahuza ejile, alioze kulutwe lia chize aali ejile, 61Ambile ngwo, Iye ngwenyi, Ngunahase kwonwona tembele ya Zambi ngukayitunge mu matangwa atatu. 62Sasendote mukwa lutwe wakatukile, wambile kuli iye ngwenyi, Kushi kukumbulula nichimwe? Kuchi wano anashindakenya hali yena? 63Alioze Yesu waholele. Sasendote wambile kuli iye ngwenyi, Shingo ngunakwehe mu jina lia Zambi ya mwono, Utwambulwile kachi yena uli mwe Kristu, mwe Mwana Zambi. 64Yesu yamba kuli iye ngwenyi, Yena wachamba; hindu ngwami, Kulutwe kumunukamona mwe Mwana Mutu kanatwama ha chindume cha tachi, kaneza ha malelwa a mwilu. 65Hohene sasendote mukwa lutwe wasonyene mahina jenyi, ngwenyi, Hashililika Zambi: kuchi tunafupu nawa hali yela? Talenu, haliapwila hinwevwa kushililika chenyi. 66Kuchi nunashinginyeka? No akumbulwile ngwo, Kanatela kufwa. 67Hohene yafwila mate ku meso jenyi, yamumbufula, mba amwe amulambile mbangala. 68Nikwamba ngwo, Tuprofeteze, yena Kristu, iya wakulamba?
69Alioze Petulu Watwamine haze mu yize, ni mwana-pwo mukwa milimo wejile kuli iye ngwenyi, Ni yena nawa wapwanga hamwe ni Yesu Ka-Ngalileya. 70Alioze walikalile kumeso ja eswe ngwenyi, Chanyingikine chize unambe. 71Muze te hatuhuka haze mushi lia senge, mukwo wamumwene, yamba kuli waze apwileko ngwenyi, Yono nawa kapwanga hamwe ni Yesu Ka-Nazare. 72Cheka nawa walikalile ni shingo ngwenyi, Chanyingikine yono mutu. 73Kulutwe hakepe waze amanyineko ejile, ambile kuli Petulu ngwo, Chamwenemwene ni yena nawa uli umwe wa kuli ayo; mumu kuhanjika che chinakusolola. 74Hohene waputukile kushingana ni kulishinga ngwenyi, Chanyingikine yono mutu. Haze hene ndemba watambikile. 75Petulu wewulukile liji lize amwambile Yesu ngwenyi, Shimbu ndemba kanda achitambika, kumukalikala yami katatu. Watuhukile, Walilile chikolo. #26.75 Te mbunga ya tununu atano.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.