MATEU 24

1Yesu watuhukile mu tembele, wayile mu jila yenyi, ni tumbaji twenyi ejile kuli iye mukumwinyikina mazuwo ja tembele. 2Alioze waakumbulwile, ngwenyi, Kunwamwene yuma yino yeswe, nyi? Pundu ngunambe kuli yenu ngwami, Kechi kahichika kuno liwe nilimwe ha liwe, lize kechi kalipuzula.

3Shimbu machitwama ha mulundu wa Olevwe, tumbaji twenyi ejile kuli iye ukawo, nikwamba ngwo, Twambulwile kama, mwiji muka yuma yino muyikapwa? Chilayi cha kuheta che chika, ni cha kumanunuka cha mwaka? 4Yesu waakumbulwile ngwenyi, Kanyamenu, niumwe kanda akanupiangula. 5Mumu anji kumakeza mu jina liami ngwo, Yami nguli mwe Kristu; mba makapiangula anji. 6Alioze kumunukevwa ha jita ni ndundumwino ya jita; kanda nukasungalala; mumu chatamba yino yuma yeswe kupwa alioze songo kanda lichipwa. 7Mumu akwa vungu limwe makatukila akwa vungu likwo, ni akwa wanangana umwe kumukatukila akwa wanangana ukwo; kumukukapwa tupunga ni yilungo ni minyiko kweka ni kweka. 8Alioze yino yuma yeswe we uputukilo wa #24.8 Ya kufumbajala.yikola.

9Hohene makanukunjika ku luyinda, no kumakanushiha, kumakanuvwila kole ku mavungu eswe mumu ha jina liami. 10Hohene anji makatalinga, makalikunjika umwe kuli mukwo, makalivwila kole umwe ni mukwo. 11Ni aprofeta anji a kwonga kumakasoloka, mamupiangula anji. 12Mba se uhulia muwoka, zango lia anji kumuliza kukekema. 13Alioze mweswe manyongonona ndo ku songo, kumakamulamwina. 14Ni sango lino lipema lia wanangana kumakaliambujola mu yifuchi yeswe ya hashi mukupwa Shindakenyo ku mavungu eswe, ni hohene songo kumulikeza.

15Kashika muze munumona chizelwokeso cha kwenyeka chize achihanjikile ku kanwa lia profeta Daniel, kanamana muma musandu (yoze matanga akase chinyingi). 16Hohene waze mapwa mu Yundeya, akachinyine ku milundu: 17yoze mapwa helu lia zuwo, kanda akasunuka mukuchiza yuma yize yili mu zuwo lienyi: 18yoze mapwa ku munda, kanda akahiluka mukwanda mahina jenyi. 19Alioze lamba kuli waze mapwa ni ufumba, ni waze mamwisa ana ha matangwa aze! 20Alioze lembenu, kuchina chenu kanda chikapwa ha mwaka wá chishika chipwe ha Sambata: 21mumu hohene kumukukapwa luyinda munene, ngwe kanda hamoneka hano hashi chize ku uputukilo wa hashi ndo haliapwila, chipwe kechi kapwa nawa. 22Nyi kachi matangwa aze kaatepulwileko, kachi mutu niumwe malilamwina; alioze mumu hali waze hanaatongola, matangwa aze kumakatepuluka. 23Hohene kachi umwe mamba kuli yenu ngwenyi, Talenu, Kristu kuno kwali! hanji ngwo, Kuze! kanda nukachifuliela. 24Mumu akristu a kwonga ni aprofeta a kwonga kumakasoloka, no makasolola yilayi yinene ni yikomokeso; hanga nyi machihasa, akapiangule chipwe waze hanaatongola. 25Ivwenu, hinanwambulwila Shimbu-kanda. 26Kashika kachi mamba kuli yenu ngwo, Talenu, mu puya ali! kanda nuyako: ngwo, Talenu, mu yipatulo ya muchima ali! kanda nuchifuliela. 27Mumu ngwe mihenyo muyituhuka ku Chivumbuko, muyihenya ku Chitokelo; chocho muchikapwa kuheta cha mwe Mwana Mutu. 28Kweswako mujimba wa mufu uli, kuze kwene makakunguluka pupa.

29Alioze haze hene kulutwe lia luyinda wa matangwa aze, tangwa mulikalá, ni kakweji kechi katwa mieji, ni matongonoshi kumakaholoka mwilu, ni tachi ja malilu kumujikanyika. 30Hohene chilayi cha mwe Mwana Mutu kumuchikasoloka mwilu: ni hohene mavungu eswe a hashi kumakahia mbimbi, kumakamona mwe Mwana Mutu kaneza ha malelwa a mwilu ni tachi ni uhenya unene. 31Kumakatuma angelo jenyi ni liji linene lia chitavwi, no makakungulula waze hanaatongola kuli iye ku fuji jiwana, ku songo limwe lia malilu ndo ku songo likwo.

32Achi, lilongesenu chishima ku mukuyu: muze mutango wawo muovula, muusokoloka mafwo, mununyingika ngwenu, Lwiza hapwa hakamwihi; 33chochene nawa yenu, muze munumona yino yuma yeswe, nyingikenu ngwenu, iye hakamwihi ali, te ku mapito. 34Pundu ngwami, Chisemuko chino kuchichi kahwa ndo yino yuma yeswe muyikamanunuka. 35Lilu ni hashi kumuyikahwa, alioze maliji jami kechi kahwa nichimwe.

36Alioze ha kutwala ku tangwa lize ni ola yize niumwe kayinyingikine, chipwe angelo a mwilu, ka, alioze Tata wika. 37Alioze chizechene ngwe matangwa ja Noe, chocho muchikapwa kuheta cha mwe Mwana Mutu. 38Mumu chizechene ngwe ha matangwa kuze kanda, shimbu te sanga lia meya kanda liza, apwile nikulialia, nikunwanwa, nikumbata, nikuhangisa malo, ndo tangwa lize Noe wanjilile mu ulungu. 39Kanyingikine ndo sanga lia meya liejile likaahungumune eswe; chocho nawa muchikapwa kuheta cha mwe Mwana Mutu. 40Hohene atu aali makapwa ku munda; machiza umwe, mahichika mukwo. 41Mapwo aali makapwa nikutwa hamuwika ku utwilo; machiza umwe, mahichika mukwo. 42Lenu kashika mumu kunwanyingikine ha ola yize Mwene wenu meza. 43Alioze nyingikenu chino, kachi mwenya zuwo wanyingikine ha ola yize mwiji meza kachi walayile, kachi kamutayijile kulokola zuwo lienyi. 44Kashika ni yenu nawa lilulikenu; mumu ha ola yize kunushi kushinginyeka mwe Mwana Mutu meza.

45Iya kevwe ndungo wamwenemwene, wa kukanyama, yoze mwene wenyi hamwaha chiyulo cha akwa zuwo lienyi, mukuhana kuli ayo kulia ha mwaka wacho? 46Kawaha ndungo yoze mwene wenyi muze meza mamuwana kanalingi chocho. 47Pundu ngwami, Kumakamwaha chiyulo ha yikumba yenyi yeswe. 48Alioze kachi yoze ndungo mupi mamba mu mbunge ngwenyi, Mwene wami kanashimbula; 49mba maputuka kulamba ndungo-ni-akwo, malialia, manwanwa hamwe ni akwa kuzengewa. 50Mwene wa ndungo yoze kumakeza ha tangwa lize keshi kunyonga, ni ha ola yize kanyingikineko. 51Mba kumakamupatula hakachi, makamusela chihanda hamwe ni yilembese: kumukukapwa malilo ni kulikopola ku mazo.

Currently Selected:

MATEU 24: Csa

Highlight

Copy