MATEU 21

1Mba muze akundamine ku Yerusaleme, haheta ku Mbetefweje, ku mulundu wa Olevwe, hohene Yesu watumine tumbaji aali, 2ngwenyi, Yénu, nukanjile mu chihunda chize cha kulitalangana ni yenu, haze hene kumunukawana chimbulu wa kukasa hamwe ni mwanenyi: nukaajitule, nukaanehe kuli yami. 3Nyi kachi umwe mamba chuma chimwe kuli yenu, nukambe ngwenu, Mwene kanaafupu, mba kamunomuno maatuma. 4Alioze chino cheswe chapwile, hanga chikamanunuke chize ahanjikile ku kanwa lia profeta ngwenyi,

5Ambenu kuli mwana wa Zaione, ngwenu,

Tala, Mwanangana we meza kuli yena,

Mukwa kushimbika, kanende ha chimbulu,

Kanende ha musamba wa chimbulu.

6Mba tumbaji ayile, alingile chizechene ngwe Yesu waashikile. 7Anehene chimbulu ni mwanenyi, asele mahina jo hali ayo; neye watwamineho. 8Chihanda chinene cha ku mbunga aalile mahina jo mu jila; akwo apwile nikusemba mitango ku mitondo nikuyiala mu jila. 9Mbunga jize angutetekelele ni jize akawile, akololokele ngwo, Vulie! Mwana David! Kufumana yoze meza mu jina lia Mwene; Vulie! mwilu mwahiana! 10Shimbu anjilile mu Yerusaleme, limbo lieswe akasumukine, ngwo, Yono iya? 11Mbunga ambile ngwo, Yono mwe profeta Yesu yoze wa ku Nazare, limbo lia mu Ngalileya.

12Yesu wanjilile mu tembele ya Zambi, Watuhwishile waze eswe alanjishile, ni waze alanjile mu tembele, walimbwile mesa ja akwa kusumbakenya mbongo, ni yitwamo ya waze alanjishile tutele. 13Ngwenyi, Chinasonewa ngwo, Kumakavuluka zuwo liami ngwo, Zuwo lia kulembela: alioze yenu nwakulipwisa chiswamo cha mihuza.

14Ni tupuputa ni yilema ejile kuli iye mu tembele; neye waawukile. 15Mba muze asasendote akwa lutwe ni akwa kusonyeka amwene yikomokeso yize alingile, ni ana aze akololokele mu tembele ngwo, Vulie! Mwana David; evwile kupiha. 16Ambile kuli iye ngwo, Unevu chize anambe wano, nyi? Yesu ngwenyi, Ewa, kunwatangile nilimwe tangwa ngwo,

Mu makanwa ja ana-akemba ni akwa kwamwa

hiwasa uhaliso ungunu.

17Mba waahichikile, watuhukile mu limbo akaye ku Mbetaniya, mba wapombeleko ufuku uze.

18Achi, ha chimenemene shimbu muchihiluka ku limbo, wevwile zala, 19mba ha kumona mukuyu ku sesa lia jila, wakundamineko alioze kawanyineko nichimwe, shina mafwo wika; neye ngwenyi, Kanda ukema nawa mihuko ndo ku miaka ya mutolo. Haze hene mukuyu womine chau. 20Muze tumbaji achimwene, akomokene ngwo, Kumanyi, nikawashi Chichize mukuyu hiwoma lume chau! 21Yesu wakumbulwile, ngwenyi, Pundu ngwami, Kachi munupwa ni Ufulielo, kunushi kuyambashana, hi chino ko wika halinga ku mukuyu munulinga, alioze chipwe kachi munwamba ku mulundu uno ngwenu, Tutuluka, ulimbile mu kalunga-lwiji, kumuchikapwa. 22Ni yuma yeswe munwita ni Ufulielo ha kulemba, kumunukatambula.

23Muze anjilile mu tembele, asasendote akwa lutwe ni makulwana ja atu ejile kuli iye shimbu machilongesa ngwo, Ni chiyulo chika wakulinga yino yuma? Iya wakuhele chiyulo chino? 24Yesu waakumbulwile ngwenyi, Ni yami nawa mungunuhula chuma chimuwika, kachi munungwambulwilacho ni yami nawa chizechene mungunwambulwila chiyulo chize nakulinga nacho yino yuma. 25Ngwami, Upapachiso wa Yoano, kulihi wakatukile? Shina mwilu nyi, shina kuli atu? O aliambile hakachi ko ngwo, Kachi mutwamba ngwetu, Mwilu; iye mamba kuli yetu ngwenyi, Kuchi te kevwe kunwamufulielele? 26Alioze kachi mutwamba ngwetu, Kuli atu; tunevu woma wa mbunga; mumu eswe kakumona Yoano ngwe profeta. 27Kashika akumbulwile kuli Yesu, ngwo, Kutwanyingikine. Iye nawa ngwenyi, Chipwe ni yami nawa chichi kunwambulwila chiyulo chize nakulinga nacho yino yuma.

28Alioze kuchi nunashinginyeka? Mutu wapwile ni ana aali a malunga. Wejile kuli mutangu ngwenyi, Mwanami, yako musono ukalinge mu munda. 29Aye wakumbulwile ngwenyi, Chichi kuyako; alioze kulutwe yalikonyeka, yaya. 30Wejile kuli wamuchiali, wambile chizechene. Neye wakumbulwile ngwenyi, Ewa, mwane, munguya: alioze kayileko. 31Hakachi ka wano aali iya walingile upale wa tato? O ngwo, Mutangu. Yesu ngwenyi, Pundu ngwami, Akwa kufwetesa lijimu ni yikoi kumakanutetekela kunjila mu wanangana wa Zambi. 32Mumu Yoano wejile kuli yenu mu jila ya ululi, kunwamufulielele, alioze akwa kufwetesa lijimu ni yikoi amufulielele: alioze yenu muze nwachimwene chipwe kulutwe kunwalikonyekene hanga numufuliele.

33Ivwenu chishima chikwo ngwami, Kwapwile mutu mwenya zuwo, watumbile munda wa uva, wafulilemo ukamino, watungile kaposhi, waukunjikile kuli njimi, wayile ku chifuchi chikwo. 34Muze mwaka wa mihuko wakundamine, watumine ndungo kuli njimi mukutambula mihuko yenyi. 35Ahoze njimi akwachile ndungo jenyi, umwe amulambile, mukwo amushihile, ni mukwo amwashile mawe. 36Cheka nawa, watumine ndungo akwo kuhiana atangu, no alingile kuli ayo chizechene. 37Ha kusula watumine kuli ayo mwanenyi wa lunga, ngwenyi, Mwanami, makamulemesa. 38Alioze njimi, muze amwene mwanenyi, aliambile hakachi ko ngwo, Yono mwe swana, tumushihenu, tukatambule chihinga chenyi. 39Amukwachile, amumbilile haze lia munda, mba amushihile. 40Muze kashika mwenya munda meza, kuchi makalinga kuli waze njimi? 41O ngwo, Kumakonwona waze atu api, makakunjika munda kuli njimi akwo, waze makamwaha mihuko ha mwaka wayo.

42Yesu ngwenyi, Kunwatangile nilimwe tangwa mu yisoneko, nyi? Ngwo,

Liwe lize alitunyine tungi,

Lienalio kuliapwa liwe lia helu lia mbango;

Chino cha kuli Mwene,

Necho chikomokeso kumeso jetu.

43Kashika ngwami, Kumakachiza wanangana wa Zambi kuli yenu, makauhana ku vungu limwe lia waze mema mihuko yawo. 44Yoze malimbuka ha liwe lino kumakamakuka: alioze hali mweswawo mulikaholokela, mulikamufwenya tuyifwenvufwenyu.

45Muze asasendote ni A-Fwariseu evwile yishima yenyi anyingikine ngwo, Kanahanjika ha kutwala kuli yetu. 46Alioze muze afupile kumukwata, evwile woma wa mbunga, mumu amumwene ngwe profeta.

Currently Selected:

MATEU 21: Csa

Highlight

Copy