ULEVI 6
6
1Yehova yamba kuli Mose ngwenyi, 2Nyi umwe mavulumuna akapwe ni mutonga kuli Yehova, hanji ha kwonga mukwo ha kutwala ku chifungo, hanji kapopo, hanji kuhupa, hanji hapinjisa mukwo; 3hanji hawana chuma chatokele mba hahanjika mahuza nikulishinga ni mahuza, mu chuma cheswacho cha yino yeswe mutu malinga nikuvulumuna, 4mba nyi havulumuna, hahia, kumakahilwisa chuma chize hahupa, hanji chuma hatambula ku upinjiso, hanji kapopo amukunjikile, hanji chuma chatokele iye hachiwana, 5hanji chuma cheswacho halishingilacho ni mahuza, akachihilwise cheswe nikuweza helu nawa chihanda chamuchitano cha ndando. Akachihane kuli mwenyacho ha tangwa lia kuhia chenyi. 6Akanehe kuli Yehova mulambu wenyi wa uhie kuji ya panga wa ku chendo, yoze keshi chipa, nikulita ni ndando makasela ha mulambu wa uhie kuli sasendote. 7Mwe sasendote akamufukile shili yenyi kumeso ja Yehova ha chuma cheswacho halinga ni uhie, akamukone-kenecho.
8Yehova yamba kuli Mose ngwenyi, 9Amba Arone ni anenyi a malunga ngwe, Shimbi ya mulambu wa kulumba yino; mulambu wa kulumba muukapwa ha kunyi jawo ha chilumbilo Ufuku weswe ndo chimene. Kahia ka ha chilumbilo mukayilaho. 10Mba sasendote akazale chikuto chenyi cha hina lipema litoma. Akazale kaputula kenyi wa hina lipema litoma ha mujimba wenyi. Akande uto wa mulambu wa kulumba wasala ku kahia ka ha chilumbilo, akautumbike ku shina lia chilumbilo.
11Akazule mazalo jenyi, akazale akwo eka, akatwale uto haze lia chilombo kuma kupema. 12Alioze kahia ka ha chilumbilo kumukayilaho, kanda akajima, mwe sasendote akaseho kunyi chimene ha chimene. Akaseho mulambu wa kulumba mu ngango jawo. Akalumbeho nawa maji a milambu ya sambukila. 13Kahia mukakayila ha chilumbilo matangwa eswe nikujima, ka.
14Shimbi ya mulambu wa wunga yino. Ana ja Arone akaulambule kumeso ja Yehova kulutwe lia chilumbilo. 15Akazo-moneko kwoko lienyi lia wunga wafufunuka wa mulambu wa wunga, ni maji jawo, ni libano yeswe yili ha mulambu wa wunga, akayilumbe ha chilumbilo yikapwe ya lupembo mupema, Chiwulwiso chawo kuli Yehova. 16Chize muchisalaho Arone ni anenyi a malunga akachilie. Akachilie kuchishi futunwiso kuma kusandu, akachilie mu yize ya mbalaka ya chikungulwila. 17Kanda akachocha ni futunwiso. Ngunachihana chikapwe chihanda* cho cha milambu yami ya kahia. Chuma chisandu chahiana, chimuwika ni mulambu ha shili, ni mulambu wa uhie. 18Malunga eswe hakachi ka ana ja Arone makachilia, chihanda cho cha mutolo ndusu yisemuko yenu yeswe cha ku milambu ya kahia kuli Yehova. Mweswe makayikwata makapwa musandu.
19Yehova yamba kuli Mose ngwenyi, 20Mulambu wa Arone ni anenyi a malunga matambula kuli Yehova ha tangwa lize mamuwayisa ni maji, uno; chihanda chimuwika cha ku kumi lia yihanda ya efa#6.20 Efa—chisoka cha 30 kilos ya wunga wafufunuka ukapwe mulambu wa wunga wa tangwa ha tangwa. Chihanda ha chimene, chihanda ha chingoloshi. 21Mu forma ya kwochela akaulinge ni maji. Ukaunehe wa pwocha ni maji. Tuyihanda twa kwocha mulambula mulambu wa wunga, ukapwe lupembo mupema kuli Yehova. 22Mba mwe sasendote wa kuwayisa ni maji kumusalakana hakachi ka ana jenyi akaulambule. Chino chiyulo cha mutolo—akaulumbe wupu kuli Yehova. 23Mulambu weswe wa wunga wa sasendote akaulumbe wupu. Keshi kuulia.
24Yehova yamba kuli Mose ngwenyi, 25Amba kuli Arone ni anenyi a malunga ngwe, Shimbi ya mulambu ha shili yino. Kuma kwa kushihila mulambu wa kulumba kwenako akashihile mulambu ha shili kumeso ja Yehova. Wapwa usandu wahiana. 26Sasendote yoze makaulambula ha shili makaulia. Kumwe kuma kusandu makaulila mu yize ya mbalaka ya chikungulwila. 27Mweswawo makakwata ku yifwo yawo makapwa musandu. Nyi masapwila manyinga jawo ha uzalo umwe, ukakose hina lize asapwilile kumwe kuma kusandu. 28Nyi hauteleka mu ndeho ya uma akayishihe. Nyi hayiteleka mu ndeho ya unengu akayicheke nikuyikosongona ni meya. 29Malunga eswe hakachi ka asasendote akaulie. Wapwa usandu Wahiana. 30Alioze kanda akalia mulambu ha shili, uze manyinga jawo haaneha mu mbalaka ya chikungulwila ha kufuka mwe muma musandu. Akawoche ni kahia.
Currently Selected:
ULEVI 6: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
