HOZEA 2
2
1Amba kuli mandumbu je a malunga ngwe, Ami.#2.1 Atu jami. Amba kuli mapangie ngwe, Ruhama.#2.1 Hazuka keke.
2Lembelela kuli noko.
Aye hi pwo liami ko,
ami hi nguli lunga lienyi ko,
kashika lembelela kuli iye;
akambile ukoi wenyi kumeso jenyi,
akachize utanji wenyi mu kondo.
3Kuchina mungumuzula liakulu,
ni kumupwisa ngwe tangwa lize asemukine.
Hanji mungumupwisa ngwe puya,
ngwe chifuchi chinomu chau lume,
nikumushiha ni pwila.
4Chichi kuvwila keke ana jenyi
mumu o ana ja ukoi.
5Mumu naye halinga ukoi,
yoze waasemene halinga sonyi.
Mumu iye hamba ngwenyi, Mungukaula akwa zango liami,
waze akungwaha kulia chami ni meya a kunwa,
kakungwaha wona wa mapanga, ni linyu, ni maji ni yuma ya kunwa.
6Kashika mungushita jila yenyi ni mbimbo,
mungumushichila lusaso
hanga kechi kahasa kuwana majila jenyi.
7Makakaula akwa zango
lienyi kechi kaaheta.
Makaafupa,
alioze kechi kaawana.
Mba makamba ngwenyi, Munguya
kuli lunga liami mutangu
mumu ha matangwa aze yuma yawahile,
hi haliapwila ko.
8Kanyingikine, yami namuhele
mbuto, ni vinyu, ni maji,
nikumwaha prata ni oru ya kulumbama,
yize o alingilile nayo Mbale.
9Kashika mungutambula nawa
mbuto yami ha mwaka wayo
ni vinyu yami ha mwaka wayo.
Munguchiza wona wami wa mapanga, ni linyu liami,
lize liapwile te lia kumufuka uselesele wenyi.
10Mba mungutukula usolo wenyi
kumeso Ja akwa zango lienyi.
Niumwe mamupulula ku moko jami.
11Mungusulisa chiseke chenyi cheswe,
ni yiwanyino yenyi, ni yikungulwila
ya kakweji mwaha ni masambata,
ni yiwanyino yenyi yeswe ya kufunjika.
12Mungukenyeka mitondo yenyi ya uva ni ya makuyu,
yize ayambile ngwenyi,
Fweto yami yenayo
akwa zango liami anguhele.
Mungukayipwisa usaki
mba tushitu a mu yambu makayilia.
13Mungukamwaha kastigu mumu ha yiwanyiho ya Ambale
muze aochelele insensu,
nikuliwahisa ni tuzeya ni yuma ya uhenya
nikukaula akwa zango lienyi
nikunguvulama yami.
Chocho kanambe Yehova.
14Kashika mungukamulembejeka,
ni kumukoka ku puya,
ni kuhanjika kuli iye ni vumbi.
15Kwenako mungukamwaha minda ya uva,
ni kupwisa chikulo cha Akore chikolo cha kutalatala.
Kwenako makatá ngwe ha matangwa ja wana-mapwo wenyi,
ngwe ha miaka muze machikatuka ku Engitu.
16Yehova kanambe ngwenyi, Ha tangwa lize mukangutongola ngwe, Mukwetu-lunga. Kuchi kangutongola nawa ngwe, Mbale yami. 17Mumu mungukachiza majina ja Ambale ku kanwa lienyi. Kechi kaatongola ni majina jo nawa. 18Ha tangwa lize mungukakukolesela usendo ni tushitu a mu yambu, ni tujila a mu tetela, ni tututu a hashi. Mungukamakuna mu chifuchi, mata, ni tutana, ni jita. Mungukakupombesa kuze chipi chakuhi. 19Mungukakumbata, yami mwene, ndo ku miaka yeswe. Mungukakumbata, yami mwene, ni ululi, ni upatwilo wa kulita, ni utu wa zango, ni keke. 20Mungukakumbata, yami mwene, ni umwenemwene mba kumukanyingika Yehova.
21Yehova kanambe ngwenyi, Ha tangwa
lize mungukasanyika malilu,
ni malilu makasanyika hashi;
22ni hashi muhasanyika mbuto, ni vinyu, ni maji;
no masanyika Yezerele
23mba mungukamutumba hali yami mwene mu chifuchi.
Mungukavwila keke Lo-Ruhama;#2.23 Keke yakuhi.
kuli Lo-Ami#2.23 Hi atu jami ko. mungukamba ngwami, Atu jami,
mba iye makamba ngwenyi, Uli Zambi yami.
Currently Selected:
HOZEA 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
