A-HEPREU 3
3
1Kashika, mandumbu asandu, akwa! kulianyina ha kutambika cha mwilu, Zewulenu mwe Postolo kanda mwe Sasendote mukwa lutwe wa kutayiza chetu, iye Yesu. 2Mwenawo wapwile mukwa jika kuli yoze wamuselecho, chizechene ngwe Mose nawa wapwile mukwa jika mu zuwo lienyi lieswe. 3Mumu hanamunyongo kupwa mukwa kutela uhenya wunji Wahiana Mose, nikulita ngwe yoze watungile zuwo, uhenya wenyi Wahiana uhenya wa lie zuwo. 4Mumu zuwo lieswe lili ni yoze walitungile; aiioze yoze watungile yuma yeswe iye Zambi. 5Ni Mose chamwenemwene wapwile mukwa jika mu zuwo lienyi lieswe, ngwe kavumbi, akapwe Shindakenyo ya yuma yize mayihanjika kulutwe lia miaka yize. 6Alioze Kristu ngwe mwe Mwana helu lia zuwo lienyi; yetu tuli zuwo lienyi nyi chamwenemwene mutulalaminya ku hamu lietu ni kulisamba cha kutalatala chetu cha ngú, ndo ku songo.
7Kashika chizechene ngwe Spiritu Musandu kanambe ngwenyi,
Musono nyi munwivwa liji lienyi,
8kanda nukalisa mbunge jenu ngwe ha che kwihia, ha tangwa lia kweseka mu puya,
9muze tulamba twenu angwihile ha ku-ngweseka, amwene yitanga yami makumi awana a miaka.
10Kashika napihililile ha chisemuko chino, nambile ngwami, Kakupianguka matangwa eswe mu mbunge jo; o kanyingikine majila jami.
11Ngwe nalishingile mu utenu wami ngwami,
Kechi kanjila mu uhwimino wami.
12Kanyamenu, mandumbu, kuchina hanji muyipwa muli umwe hakachi kenu mbunge ya ungulungulu ya kuhona Ufulielo, ha kukatuka kuli Zambi ya mwono. 13Alioze lishinjilenu umwe ni mukwo ni mukwo tangwa ha tangwa, shimbu lieswe analivuluka ngwo, Musono, hanga niumwe wa kuli yenu kechi kakala ku kwonga cha shili. 14Mumu hitwapwa akwa kulianyina ni Kristu, kachi chamwenemwene mutulalaminya ku uputukilo wa ukolelo wetu wa ngú ndo ku songo. 15Shimbu unachambe ngwo,
Musono, nyi munwivwa liji lienyi,
kanda nukalisa mbunge jenu ngwe ha che kwihia.
16Mumu aya muze evwile, ehile? Hi waze eswe ko atuhukile mu Engitu ku kwoko lia Mose, nyi? 17Mba hali aya wapihililile makumi awana a miaka? Hi hali waze avulumwine ko, nyi? Waze mijimba yo yalimbukile mu puya, nyi? 18Kuli aya walishingile ngwenyi, Kechi kanjila mu uhwimino wami, shina kuli waze kononokeneko? 19Mba tunamono kahashile kunjilamo mumu kafulieleleko.
Currently Selected:
A-HEPREU 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
