EZEKIEL 42
42
1Yanguneha haze ku yize ya haze kwa kuya ku Norte. Yanguneha ku yipatulo yize yili hatalanganyi ni yize ya tembele ni hatalanganyi ni zuwo lia ku Norte. 2Usuhe wa zuwo lia ku Norte wapwile kulakaji lia mbandu, ni utohe makumi atano. 3Kwapwile veranda kulihata ni veranda ha ngango jitatu kulutwe lia makumi aali a mbandu jize jatwalile ku yize ya muchima, ja kutalikisa ku mawe a kwala a yize ya haze. 4Mba kulutwe lia yipatulo kwapwile upalikilo wa kuya muchima, utohe wawo wa kumi lia mbandu, ni usuhe wawo wa kulakaji lia mbandu. Mapito jamo apwile sali lia ku Norte. 5Yipatulo ya kwilu yakehele mumu veranda yako yatambwile chihanda chinene cha utohe wayo, yipatulo ya kushi ni ya hakachi te yatambula chihanda chikehe cha zuwo. 6Mumu yapwile mu ngango jitatu, chikwo nawa kuyapwile ni manguji ngwe aze a yize ya haze, kashika yipatulo ya kwilu hayisetula kunyima kuhichika yize ya kushi ni ya hakachi. 7Chipanga cha haze, chize chayile cha kulita ni yipatulo kutalikisa ku yize ya haze hatalanganyi ni yipatulo, chapwile cha makumi atano a mbandu. 8Yipatulo ya ha yize ya haze yapwile ya usuhe wa makumi atano a mbandu, alioze yize yapwile hatalanganyi ni tembele ayo yapwile ya kulakaji lia mbandu. 9Kushi lia yipatulo yino kwapwile unjililo ha sali lia Chivumbuko ha kukatuka ku yize ya haze nikunjilamo, 10kuze kwaputuka chipanga cha haze.
Ha sali lia ku Sule nawa, hatalanganyi ni yize yikwo ni hatalanganyi ni lie zuwo, kwapwile nawa yipatulo, 11ni upalikilo kulutwe liayo. Yalita zwa ni yipatulo ya ku Norte; usuhe umuwika, ni utohe umuwika, ni utuhukilo umuwika, ni kweseka cha yikolo. 12Kushi lia yipatulo ya ku Sule kwapwile unjililo ha sali lia ku Chivumbuko ha kunjila mu upalikilo. Hatalanganyi kwapwile chipanga cha kuhandununa.
13Aye yamba kuli yami ngwenyi, Yipatulo ya ku Norte ni yipatulo ya ku Sule hatalanganyi ni yize, ayo yapwa yipatulo yisandu kuze asasendote akwa kukundama kuli Yehova malila milambu yisandu yahiana. Mwenamo matulikila milambu yisandu yahiana—mulambu wa wunga, ni mulambu ha shili, ni mulambu ha uhie, mumu yipatulo yize yisandu. 14Muze asasendote manjila muma musandu, kechi kukatukamo akaye ku yiza ya haze ndo matulikilamo mazalo jo aze akuvumbika no mumu mazalo aze asandu. Shimbu makundama ku yuma ya atu mazala mazalo eka.
15Muze te hamana nikweseka muchima lia chihela cha tembele yangutwala haze ku chikolo chize chatalikisa ku Chivumbuko; yeseka chihela cha tembele cha kujingilika. 16Yeseka sali lia ku Chivumbuko ni lumbungu wa kweseka nenyi, kulakaji atano a mbungu nikulita ni lumbungu wa kweseka nenyi. 17Mba yalumuka yeseka sali lia ku Norte, kulakaji atano a mbungu nikulita ni lumbungu wa kweseka nenyi. 18Mba yalumuka yeseka sali lia ku Sule, kulakaji atano a mbungu nikulita ni lumbungu wa kweseka nenyi. 19Mba yalumuka yeseka sali lia ku Chitokelo, kulakaji atano a mbungu nikulita ni lumbungu wa kweseka nenyi. 20Yeseka ha malumbu awana. Yapwile ni chipanga-cha-mawe kwa kujingilika; sali kulakaji atano, sali kulakaji atano, chikahandunune hakachi ka yuma yisandu ni yuma yeswayo.
Currently Selected:
EZEKIEL 42: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
