EZEKIEL 39
39
1Ni yena mwana mutu, profeteza kulimika ni Ngoke wambe ngwe, Mwene Yehova kanambe ngwenyi, Kunalimika ni yena Ngoke mwe mulemu mukwa lutwe wa Mesheke ni Tupale, 2kashika mungukakwalumuna, ni kukusenyesa kulutwe, ni kukuchiza ku songo lia ku Norte, ni kukukoka ulimike ni milundu ya Izalele. 3Mba mungukakapula uta we ku kwoko lie lia chimeso, ni kukuholola mivu ye ku kwoko lie lia chindume. 4Kumukalimbukila ha milundu ya Izalele ni yena ni yihuji ye yeswe ni mavungu aze eswe uli no. Mungukakuhana kuli tujila a milali yeswe akulia yifwo, ni kuli tushitu asasu, akakulie. 5Kumakalimbuka mwe mu yambu mumu yami hinachamba. Chocho kanambe Mwene Yehova. 6Mungukatuma kahia ha Mangoke ni hali waze anatwama ni chipi chakuhi mu yifuchi ya mbaka, mba kumakanyingika yami nguli Yehova.
7Mungukanyingikisa jina liami lisandu hakachi ka atu jami A-Izalele. Chichi katayiza jina liami lisandu akalijilule nawa, mba mavungu makanyingika yami nguli Yehova, mwe Musandu mu Izalele. 8Nyingikenu ngwami, Kuchineza, kumuchikapwa. Chocho kanambe Mwene Yehova. Lie tangwa lino liene te hinamba.
9Mba waze atwama mu yihunda ya Izalele makatuhuka nikuwika majiko ja yuma ya jita nikuyocha; kepwe jinene ni jikepe, ni mata ni mivu, ni makunga ehi ni makunga asuku. Kumakayitenga kunyi ha miaka shimbiali, 10chocho kechi kafupa kunyi ja mu yambu, chipwe kujichá mu musenge, mumu matenga kunyi ye yuma ya jita. Makapupa waze aapupile nikupunda upite wa waze apunjile niwo. Chocho kanambe Mwene Yehova.
11Ha tangwa lize munguhana kuli Ngoke kuma kwenyi kwa kumufunda mu Izalele, Chana cha Ngeji, sali lia kalunga-lwiji ku Chivumbuko. Muchikakwika ngeji mumu kwenako Ngoke ni chihuji chenyi cheswe makaafunda, mba makatukako ngwo, Chana cha Hamone-ngoke. 12Akwa munyachi wa Izalele makapwa tukweji shimbiali ha kwafunda hanga akapemese chifuchi. 13Akwa chifuchi eswe makafunda A-Ngoke, mba muchikapwa cha kwalemesa ha tangwa lize mungukasolola uhenya wami. Chocho kanambe Mwene Yehova. 14Makasela malunga kupalika chifuchi cheswe tangwa ha tangwa nikutanda waze hasala helu lia mavu akachipemese. Ha songo lia tukweji shimbiali makahengula chocho. 15Muze wano makapalika mu chifuchi mba umwe mawana chifwaha cha mutu, mamikako chinyingi ndo tufunde machifunda mu Chana cha Hamonengoke. 16(Chihunda Hamona chiliko nawa.) Chocho makapemesa chifuchi.
17Ni yena mwana mutu, Mwene Yehova kanambe ngwenyi, Hanjika ni milali yeswe ya tujila, ni kuli tushitu eswe a mu yambu ngwe, Swenu nwize; kungulukenu ku malumbu eswe ku chiwanyino chize ngunanulingila; chiwanyino chinene ha milundu ya Izalele, mba munukalia yifwo ni kunwa manyinga. 18Munukalia yifwo ya akwa ndundo, munukanwa manyinga ja alemu a hashi—ja kuji a mapanga, ni ana-mapanga, ni pembe, ni kuji a ngombe, eswe akwa maji a ku Mbashane. 19Munukalia maji ndo hinwakuta; munukanwa manyinga ndo hinwazengewa, ku chiwanyino chize ngunanululikila. 20Ku mesa yami munukakuta ni tuvwalu ni akwa kwaendesa, ni akwa ndundo ni tujita twa milali yeka ni yeka. Chocho kanambe Mwene Yehova.
21Mba mungukasa uhenya wami hakachi ka mavungu, ni mavungu eswe makamona upatwilo wami uze hinalinga, ni kwoko liami lize hinasa hali ayo. 22Akwa munyachi wa Izalele makanyingika yami nguli Yehova Zambi yo chize ku tangwa lize ni kulutwe. 23Ni mavungu makanyingika ngwo, Akwa munyachi wa Izalele ayile ku ufunge mumu ha uhenge wo, mumu ha kulinga ni yami ni mafwefwe, chocho naaswekelele meso jami nikwahana kuli akwa kole jo; eswe afwile ni katana. 24Nalingile no nikulita ni luchisa wo ni milonga yo, ni kwaswekela meso jami.
25Kashika Mwene Yehova kanambe ngwenyi, Haliapwila mungukahilwisa kuwaha cha Yakomba, mungukavwila keke munyachi weswe wa Izalele. Mungukevwa ukwa ha jina liami lisandu. 26Kumakavulama sonyi jo, ni mafwefwe aze eswe angulingile, muze makatwama kawape mu chifuchi cho ni yoze maavwisa woma wakuhi; 27muze hinaachiza hakachi ka mavungu ni ku yifuchi ya akwa kole jo, muze hinasolola usandu wami muli ayo kumeso ja mavungu anji. 28Henaho makanyingika yami nguli Yehova Zambi yo mumu naatumine ku unjize hakachi ka mavungu, mba naakungile nawa ku chifuchi cha ayo ene. Chichi kahichika niumwe akasale hakachi ka mavungu nawa. 29Chichi kaaswekela nawa meso jami muze mungukazukula Spiritu yami hali akwa munyachi wa Izalele. Chocho kanambe Mwene Yehova.
Currently Selected:
EZEKIEL 39: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
