KUTUHUKA 40
40
1Yehova yamba kuli Mose ngwenyi, 2Ha tangwa litangu lia kakweji mutangu Ukamike ye tabernakulu ya mbalaka ya chikungulwila. 3Ukanjisemo we mushete wa Shindakenyo. Ukafuke mushete ni hina lia chikalakala. 4Ukanjisemo mesa. Ukaleho yuma yize yiliho. Ukanjisemo chikwachilo cha ndeya. Ukawike je ndeya jacho. 5Ukatumbike chilumbilo cha oru cha kwochelaho insensu kulutwe lia mushete wa Shindakenyo hikuzezeleka hina lia kufuka chikolo cha ku tabernakulu. 6Ukatumbike chilumbilo cha milambu ya kulumba kulutwe lia chikolo cha ku tabernakulu ya mbalaka ya chikungulwila. 7Ukatumbike lumbasia lwa kusanyina hakachi ka mbalaka ya chikungulwila ni chilumbilo. Ukasemo meya. 8Ukajike yize ya kujingilika kweswe. Ukazezeleke hina lia kufuka chikolo cha ku yize. 9Ukande maji a kuwayisa no, ukawayise ye tabernakulu ni yize yeswe yilimo. Ukayisele ku usandu ni yikashi yeswe yayo. Yikapwe yisandu. 10Ukawayise ni maji chilumbilo cha milambu ya kulumba hamwe ni yikashi yacho yeswe. Ukasele ku usandu che chilumbilo. Chilumbilo chikapwe chisandu chahiana. 11Ukawayise ni maji lumbasia lwa kusanyina hamwe ni nganda yalwo. Ukayisele ku usandu. 12Ukahetese Arone ni ana jenyi a malunga ku chikolo cha ku mbalaka ya chikungulwila. Ukaasanyise meya. 13Ukajike Arone mazalo asandu. Ukamuwayise ni maji. Ukamusele ku usandu hanga akangulingile usasendote. 14Ukasake ana jenyi a malunga. Ukaajike yikuto. 15Ukaawayise chizechene ngwe wawayisa ni maji tato hanga o akangulingile usasendote. Ha kwawayisa ni maji chikapwe kuli ayo ha usasendote wa mutolo ndusu yisemuko yo.
16Chocho Mose walingile nikulita ni yeswe Yehova wamwambile. Chocho chialingile iye. 17Ha kakweji mutangu wa mwaka wamuchiali, ha tangwa litangu lia mwe kakweji yajika ye tabernakulu. 18Mose yajika ye tabernakulu, yala yimanyino yayo. Yamika matabua jayo, yanjisamo njalo jayo. Yajika manguji jayo. 19Yazazulula mbalaka helu lia tabernakulu. Yasa chifuko cha ye mbalaka helu liayo kwilu, chizechene ngwe Yehova ambile kuli Mose. 20Yanda Shindakenyo, yasa mu mushete. Yasa milumbu ha mushete. Yanangika chitwamo cha keke helu ha we mushete. 21Yanjisa mushete mu tabernakulu. Yazezeleka chikalakala cha hina, yasweka we mushete wa Shindakenyo chizechene ngwe Yehova ambile kuli Mose. 22Yanjisa mesa mu mbalaka ya chikungulwila ku lumbu lia ku Norte lia ku tabernakulu, haze lia chikalakala cha hina. 23Yalaho mbolo kumeso ja Yehova chizechene ngwe Yehova ambile kuli Mose. 24Yanjisa chikwachilo cha ndeya mu mbalaka ya chikungulwila hatalanganyi ni ye mesa ku lumbu lia ku Sule lia ku tabernakulu. 25Yawika je ndeya kumeso ja Yehova chizechene ngwe Yehova ambile kuli Mose. 26Yanjisa chilumbilo cha oru mu mbalaka ya chikungulwila kulutwe lia chikalakala cha hina. 27Yochelaho insensu ya lupembo mupema, chizechene ngwe Yehova ambile kuli Mose. 28Yasa chifuko ku chikolo cha ku tabernakulu. 29Ya-tumbikila chilumbilo cha milambu ya kulumba ku chikolo cha ku tabernakulu ya ku mbalaka ya chikungulwila. Yalambwilaho mulambu wa kulumba ni mulambu wa wunga, chizechene ngwe Yehova ambile kuli Mose. 30Yatumbika lumbasia lwa kusanyina hakachi ka mbalaka ya chikungulwila ni chilumbilo. Yasamo meya a kusana. 31Ni Mose ni Arone ni ana jenyi a malunga apwile nikusanamo ku moko jo ni ku molu jo. 32Apwile nikusana muze manjila mu mbalaka ya chikungulwila, ni muze makundama ku chilumbilo, chizechene ngwe Yehova ambile kuli Mose. 33Yamika yize ya kujingilika tabernakulu ni che chilumbilo. Yazezeleka hina lia kufuka chikolo cha ku yize. Chocho Mose wamanunwine milimo yeswe.
34Mba lelwa yilifuka ye mbalaka ya chikungulwila. Ye tabernakulu yiyizala ni uhenya wa Yehova. 35Mose te kahashile kunjila mu mbalaka ya chikungulwila mumu te lie lelwa liatwamineho ni ye tabernakulu yazalile ni uhenya wa Yehova. 36Muze lie lelwa mulizunduka ku tabernakulu A-Izalele masenya kulutwe ndusu mawenyi jo eswe. 37Alioze nyi lelwa kuliazundukile mba kechi kuya mu wenyi ndo tangwa lize mulizunduka. 38Mumu te lie lelwa lia Yehova liapwile ha tabernakulu ha mwalwa. Mwapwilemo kahia ha ufuku kumeso ja A-Izalele eswe ndusu mawenyi jo eswe.
Currently Selected:
KUTUHUKA 40: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
