KUTUHUKA 31
31
1Yehova yamba kuli Mose ngwenyi, 2Hinatambika umwe ku jina lienyi ngwami, Mbezalele mwana Uri, mwana Hure wa ku vungu lia Yunda. 3Hinamuzalisa ni Spiritu ya Zambi ni mana, ni malinjekela, ni yinyingi, ni ulangaji weka ni weka, 4mukutomba milimo ya ulangaji, mukufula ni oru ni prata ni unengu, 5mukutota mawe a kunjisa mu yituwa yo, mukwola ha mitondo, mukulinga milimo yeka ni yeka ya ulangaji. 6Yami hinasela hamwe nenyi Aholiambe, mwana Ahisamake wa ku vungu lia Ndane, mba mu mbunge ja eswe akwete mana, hinasamo mana, hanga akalinge yize yeswe nakwambile. 7Ngwami, Mbalaka ya chikungulwila, ni mushete wa Shindakenyo, ni chitwamo cha keke chiliho, ni yikashi yeswe ya mu mbalaka, 8ni mesa hamwe ni yikashi yayo, ni chikwachilo cha ndeya cha oru ya kusayisa hamwe ni yikashi yeswe yacho, ni chilumbilo cha insensu, 9ni chilumbilo cha milambu ya kulumba hamwe ni yikashi yacho, ni lumbasia ni nganda yalwo, 10ni mazalo a kutonga ni ulangaji, ni mazalo asandu a Arone sasendote, ni mazalo a ana jenyi a malunga akangulingile no usasendote, 11ni maji a kuwayisa no, ni insensu ya lupembo mupema ya muma musandu, nikulita ni yeswe hinakwamba, akayilinge.
12Yehova yamba kuli Mose ngwenyi, 13Amba kuli A-Izalele nawa ngwe, Chamwenemwene nukafunge Sambata jami mumu kuchapwa chilayi hakachi ka yami ni yenu ndusu yisemuko yenu, hanga nukanyingike ngwenu, Mwe Yehova kakutusela ku usandu. 14Kashika nukafunge ye Sambata, mumu kuyapwa yisandu kuli yenu. Mweswawo mayijilula akamushihe lume, mumu mweswawo makalingaho milimo, akatete mwe mutu hakachi ka atu jenyi. 15Nukalinge milimo ha matangwa asambano, ahoze tangwa liamuchishimbiali likapwe Sambata ya uhwimino. Yikapwe yisandu ya Yehova. Mweswawo makalinga milimo yimwe ha tangwa lia Sambata, akamushihe lume. 16Kashika A-Izalele akafunge ye Sambata, mukuyisela Sambata ndusu yisemuko yo, chikapwe usendo wa mutolo. 17Kuchapwa chilayi cha mutolo hakachi ka yami ni A-Izalele, mumu ha matangwa asambano Yehova walingile malilu ni hashi. Ha tangwa liamuchishimbiali yahwima, yasanguluka.
18Muze Yehova hamana kulishimwinya nenyi ha mulundu wa Sinai, yahana kuli Mose mikanda yiali ya Shindakenyo, te mikanda ya mawe ya kusoneka ni munwe wa Zambi.
Currently Selected:
KUTUHUKA 31: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
