KUTUHUKA 3

1Mose wafungile mapanga ja tatoweno Yetoru, mwe sasendote wa A-Mindiane. Yatwala mapanga mu sali lia puya. Yaheta ku Horepe, mulundu wa Zambi. 2Mungelo wa Yehova yasoloka kuli iye mu mulengi wa kahia, mukachi ka mungonga. Iye yatalako, kumanyi mungonga unayili ni kahia hindu we mungonga kuwakotongokele. 3Mose yamba ngwenyi, Mungujingako, ngutale chipupu chino chinene, ngwenyi, Kuchi te mungonga kuusola kukotongoka? 4Yehova yamona ngwe iye hajingako mukutala, mba Zambi yamutambika ni liji lia kutuhuka ku mungonga ngwenyi, Mose, Mose. Iye yatá ngwenyi, Yami uno. 5Yehova yamba ngwenyi, Kanda ukundama kuno, zula haku je ku molu je, mumu homa unamana, ha mavu asandu. 6Chikwo nawa ngwenyi, Yami Zambi ya tatenu—Zambi ya Apalahama, Zambi ya Izake, Zambi ya Yakomba. Mose walifukile ku meso jenyi mumu te woma anevu mukutala hali Zambi.

7Yehova yamba ngwenyi, Chamwenemwene hinamona luyinda wa atu jami ali mu Engitu. Hinevwa muteto wo mumu ha mukunda wa tupatashi two; ngunanyingika yinyengo yo. 8Hinahulumuka mukwapulula ku moko ja A-Engitu, mukwachiza ku chifuchi chize, mukwatwala ku chifuchi chipema, chinene, ndo ku chifuchi kuze kunokela yamwa ni wuchi, ndo ku chihela cha A-Kanana, ni cha A-Hete, ni cha A-Amore, ni cha A-Perize, ni cha A-Hevwe, ni cha A-Yepushe. 9Mba haliapwila muteto wa A-Izalele kuunahete kuli yami. Chikwo nawa hinamona lamba anaamwesalio kuli A-Engitu. 10Haliapwila tweya, mungukutuma kuli Falau hanga ukachize atu jami A-Izalele ku Engitu. 11Mose yamba kuli Zambi ngwenyi, Yami iya? Te munguhasa kuya kuli Falau nyi? Ami hinguchiza A-Izalele ku Engitu nyi? 12Zambi yamba ngwenyi, Chamwenemwene kumungukapwa ni yena. Chino chinyingi muchipwa kuli yena cha kukulweza te yami ngunakutumu ngwami, Muze mukachiza e atu ku Engitu, munukavumbika Zambi ha mulundu uno.

13Mose yamba kuli Zambi ngwenyi, Mwane, muze mungukaheta kuli A-Izalele, ngukambe kuli ayo ngwami, Zambi ya tulamba twenu hangutuma kuli yenu. Makamba kuli yami ngwo, Jina lienyi iya? Ngwambe kuchi kuli ayo? 14Zambi yamba kuli Mose ngwenyi, nguli chize nguli. Mba ngwenyi, Chocho ukambe kuli A-Izalele ngwe, yami nguli hangutuma kuli yenu.

15Chikwo ambile Zambi kuli Mose ngwenyi, Chocho ukambe kuli A-Izalele ngwe, Yehova, Zambi ya tulamba twenu, Zambi ya Apalahama, Zambi ya Izake, Zambi ya Yakomba hangutuma kuli yenu ngwenyi, Jina liami lino, ndo ku miaka ya mutolo. Chiwulwiso chami chino ndusu yisemuko yeswe.

16Yako ukakungulule hamuwika makulwana a A-Izalele. Amba kuli ayo ngwe, Yehova, Zambi ya tulamba twenu, Zambi ya Apalahama, ni ya Izake, ni ya Yakomba, hanasoloka kuli yami ngwenyi, Pundu hinanutala, hinamona chize ananulingi mu Engitu. 17Hinamba ngwami, Mungukanuchiza ku luyinda wa Engitu, mungukanutwala ku chifuchi cha A-Kanana, ni A-Hete, ni A-Amore, ni A-Perize, ni A-Hevwe, ni A-Yepushe, ku chifuchi kuze kunokela yamwa ni wuchi. 18O kumakapanjika ku liji lie, mba ni yena ni makulwana ja A-Izalele munukaheta kuli mwanangana wa Engitu, nukamwambulwile, ngwenu, Yehova Zambi ya A-Hepreu, heza kuli yetu, kashika utweche haliapwila tuye kama wenyi wa matangwa atatu mu puya, hanga tukalambule yitapo kuli Yehova Zambi yetu. 19Ngunanyingika mwanangana wa Engitu kechi kanutayiza kuya, ka, ndo ni kwoko lia ndundo. 20Mungukolola kwoko liami, mungukalamba Engitu ni yikomokeso yami yeswe munguka-linga mukachi ko, mba kulutwe kuma-kanwecha kuya. 21Mungukahana kuli wano atu vumbi kumeso ja A-Engitu mba muze munukaya, kunuchi kaya mokomoko. 22Alioze pwo mweswe akete kuli yoze walihata nenyi ni kuli yoze wapwa ngeji ku zuwo lienyi upite wa prata ni wa oru ni mazalo, nukajike nayo ana jenu a malunga ni ana jenu a mapwo. Munukapupa A-Engitu.

Currently Selected:

KUTUHUKA 3: Csa

Highlight

Copy