DANIEL 8
8
1Ha mwaka wamuchitatu wa chiyulo cha mwanangana Beleshazare, usolwelo wasolokele kuli yami Daniel, kulutwe lia uze wasolokele hatangu. 2Namwene mu usolwelo wami, te nguli mu mbala ya Shushane, mu chifuchi cha Elame. Namwene mu usolwelo, nguli ku lwiji Ulai. 3Nahetwile meso jami kutala, kumanyi, kuji ya panga kanamana ha mbumbulu ya lwiji. Kali ni mbinga jiali, jeswe ni jiali jisuku, alioze yimwe yahianyine yikwo ha usuhe, ni mbinga yisuku te yize yasulile kusoka. 4Namwene mwe kuji ya panga kanalundumukina ku Chitokelo, ni ku Norte, ni ku Sule. Niumwe kashitu wahasa kujikiza kumeso jenyi; kukwapwile niumwe yoze wahasa kupulula ku tachi jenyi. Walingile cheswacho chamupemenene nikulitohesa.
5Shimbu munguchizewula, kumanyi, kuji ya pembe yakatuka ku Chitokelo ni kupalika ndusu hashi heswe, nikuliata hashi ka. Kuji ya pembe kali ni mbinga yimwe ya lufuma hakachi ka meso jenyi. 6Yeza kuli kuji ya panga wa mbinga jiali, yoze te namona kanamana ku mbumbulu ya lwiji. Yamulundumukina ni ufwatulo wa ngolo. 7Namumona kukundama kuli mwe kuji ya panga. Yamuvwila ufwatulo wunji; yapupa kuji ya panga nikumakuna mbinga jenyi jiali. Kuji ya panga keshi ni tachi ja kujikiza kumeso jenyi, alioze yamulamba hashi ni kumuliata. Niumwe wahasa kupulula kuji ya panga ku tachi jenyi. 8Mba kuji ya pembe yalitohesa kuhiana, alioze muze hapwa ni tachi, mbinga yenyi yinene yiyimakuka, mba yikusoka mbinga jiwana ja lufuma kusalakana ja kutalikisa ku fuji jiwana ja malilu.
9Mu mbinga yimwe mwasokele kambinga kakwo, yikatatuka kuhiana kutalikisa ku Sule, ni ku Chivumbuko, ni ku chifuchi cha uhenya. 10Yatatuka chikolo ndo ku mbunga ya mwilu, mba amwe a ku mbunga ya matongonoshi yaambila hashi ni kwaliata. 11Yalitohesa chipwe ndo kuli Mukwa-Kuyula ye mbunga. Yamuchiza mulambu wa kulumba wa matangwa eswe, wapuzwile zuwo lienyi lisandu. 12Ye mbunga ayisele kuli iye hamwe ni mulambu wa kulumba wa matangwa eswe mumu ha Utanguko. Umwenemwene aumbilile hashi, mba mbinga yalinga upale wenyi nikuwaha. 13Mba nevwile umwe musandu kanahanjika, ni musandu mukwo kanambe kuli yoze waliangile kuhanjika ngwenyi, Usolwelo uno wa mulambu wa kulumba wa matangwa eswe, ni Utanguko wa kupwisa hululu, ni kuhana zuwo lisandu ni mbunga ayiliate, wa shimbu lika? 14Aye yamba kuli iye ngwenyi, Ha tununu aali a matangwa ni kulakaji atatu a matangwa, mba zuwo lisandu malihilwisa chize chatamba kupwa.
15Yami Daniel, muze hinamona usolwelo uno, nafupile kuusa chinyingi, mba kwamanyine hakamwihi ni yami umwe wa kulifwa ni mutu. 16Nevwile liji lia mutu hakachi ka mbumbulu ja Ulai, linatambika ngwo, Gabriele, lumbunwina yono lunga we usolwelo. 17Chocho iye wakundamine kuze namanyine; mba ha kukundama, ami nevwile woma, nafulamanyine hashi. Alioze yamba kuli yami ngwenyi, Mwana mutu, nyingika ngwami, usolwelo uno watwala ku miaka ya ku songo.
18Shimbu machihanjika ni yami nayile tulo anji ni meso jami hashi; alioze iye yangusunga, yangumanyisa ha molu jami. 19Yamba ngwenyi, Mungukulweza yize muyikapwa ha songo lia utenu, mumu chatwala ku miaka ya kufunjika ku songo. 20Ha kutwala kuli kuji ya panga wamwene ni mbinga jiali, jinalumbunuka mianangana ja A-Media ni A-Persia. 21Mwe kuji ya pembe wa wona wavunda aye mwanangana wa Ngresia, ni lumbinga hakachi ka meso jenyi mwanangana wo mutangu. 22Ha kutwala ku mbinga yize yamakukine mba jikwo jiwana yijisalakana, chinalumbunuka mawanangana awana masalakana niwenyi, alioze kechi kapwa ni tachi jenyi. 23Ku songo lia chiyulo cho, muze yivulumunyi hazalisa njongo yo, mukusoloka umwe mwanangana wa meso a tachi, mukwa kunyingika yijimbikilo. 24Tachi jenyi mujipwa jinji, alioze hi ja kuli iye mwene ko; kumakonwona cha kukomwesa; kumakawaha mu yize analingi; kumakonwona akwa ndundo, ni atu ja asandu. 25Ku maseliekela jenyi masenyesa kulutwe ukanyame mu moko jenyi, mba mu mbunge yenyi malilemesa. Monwona anji, mumu kanalifuliela ene, mba makakatukila Mukwa-Kuyula mianangana. Hindu kumakamakuka, hi ni kwoko lia mutu ko. 26Usolwelo wa matangwa, uno hiwevwa, wamwenemwene, alioze jika ni Chijikilo, mumu watwala ku matangwa a kulutwe kusuku.
27Mba yami Daniel nalezumukine, napombele nikuyiza matangwa. Mba nakatukile nikulingalinga milimo ya mwanangana, alioze usolwelo wangushimine; kuwangulumbunukine.
Currently Selected:
DANIEL 8: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
