AMOSE 5

1Enu munyachi wa Izalele, ivwenu liji lino ngunande lia kunulilila. Ngwami,

2Mwe *virgem Izalele halimbuka

kechi kakatuka nawa.

Hamwehuka mu chifuchi chenyi

ni yoze mamuhindwisa wakuhi.

3Mumu Mwene Yehova kanambe ngwenyi,

Chihunda kuze kwatuhukile kanunu muchisala ni kulakaji.

Ni kuze kwatuhukile kulakaji

mukusalako kumi ku munyachi wa Izalele.

4Mumu Yehova kanambe ku munyachi wa Izalele ngwenyi,

Ngufupenu, nutwame ni mwono.

5Alioze kanda nufupa ku Mbetele;

kanda nunjila ku Ngilingali

chipwe kuzauka ku Mbia-shipa.

Mumu akwa Ngilingali makaya ku unjize

ni akwa Mbetele makaapwisa mokomoko.

6Fupenu Yehova nutwame ni mwono

kuchina makalekwoka ngwe kahia mu munyachi wa José.

Makalalisa ni mukwa Mbetele yoze makajima kechi kasoloka.

7Enu! Nwakwalumuna upatwilo wa kulita mu musase

ni ululi nwakuumbila mu mavu.

8Yoze watangile Kungulwila ni Muta-ni-kawa,

yoze wakwalumuna ufuku pwi mu kucha,

yoze wakwalumuna mwalwa mu ufuku,

yoze wakusanyika meya a kalunga-lwiji

nikwazukwila ha kuzazuluka cha hashi,

jina lienyi Yehova,

9mukwa kuhenyesa kwonwona chenyi hali yitakame,

hanga kwonwona chikeze ha yihunda ya kukolesa.

10Mukwa kukanjisa mu chota kakumuvwila kole;

kakuvwila kupiha yoze mahanjika umwenemwene.

11Kashika se nwakuliata yiswale nikumufwetesa tiliku,

kashika chipwe hinwatunga mazuwo ja mawe a kululika

hindu kunuchi katwamamo.

Hinwatumba minda yipema ya uva

alioze kunuchi kanwa vinyu yako.

12Mumu ngunanyingika kwalula cha milonga yenu

ni kutoha cha shili yenu—

enu nwakupinjisa akwa ululi,

ni kutambula chindo,

ni kupiangula mukwa kuhona mu chota.

13Kashika mukwa kukanyama mahola mu mwaka ngwe uno,

mumu wapwa mwaka upi.

14Fupenu chipema hi chipi ko

hanga nukatwame ni mwono.

Chocho Yehova Zambi-ya-Tujita

mapwa hamwe ni yenu chizechene ngwe hinwamba.

15Vwilenu lwaji yuma yipi; zangenu yuma yipema

kolesenu upatwilo wa ululi mu chota.

Hanji Yehova Zambi-ya-Tujita

mavwila vumbi masalila ja José.

16Kashika Yehova, Zambi-ya-Tujita, mwe Mwene kanambe ngwenyi,

Ku malindalinda eswe kumukukapwa kulila mbimbi;

mu matapalo eswe kumakamba ngwo,

Mama yami! mama yami!

Kumakasanyika njimi akalishimwoke;

ni waze ananyingika kulila lungungu maasanyika akalile mbimbi.

17Ku minda yeswe ya uva kumukukapwa mbimbi

mumu mungupalika hakachi kenu.

Chocho kanambe Yehova.

18Lamba kuli yenu nunazange tangwa lia Yehova!

Kuchi te nunafupu tangwa lia Yehova?

Liapwa milima hi pangu ko

19ngwe kachi mutu machina ndumba

mba matakana ni ursu.

Hanji manjila mu zuwo mba ha kujamina

ni kwoko ha yishimi kapela mamusuma.

20Tangwa lia Yehova milima, hi pangu ko.

Ufuku pwi uliko ni mwalwa wakuhi.

21Chazangile yiwanyino yenu, ngunayisaula,

chevwile kuwaha ni yikungulwila yenu yilemu.

22Chipwe munungulambula milambu yenu ya kulumba ni ya wunga

chichi kuyitambula.

Milambu yenu ya sambukila ni yimuna jenu a maji,

chipwe kutala chichi kayitala.

23Chiza kuli yami zungo lia miaso yenu;

chichi kapanjika ku miaso ya tulialia twenu.

24Alioze upatwilo wa kulita ukapwe ngwe sanga lia meya;

ululi ukapwe ngwe muhwiji wa mutolo.

25Te nwangunehenene yitapo yenu ni milambu yenu ha makumi aze awana a miaka mu puya, enu munyachi wa Izalele? 26Munukambata mwanangana wenu Sakute, ni Kaiwana zambi yenu wa matongonoshi, ni tuponya twenu aze hinwalilingila, 27kashika mungukanutwala ku unjize sali lize lia Ndamaseku. Chocho kanambe Yehova yoze kali ni jina lia Zambi-ya-Tujita.

Currently Selected:

AMOSE 5: Csa

Highlight

Copy

Compare