APOSTOLO 28

1Muze te hatulamwina, hohene twasele chinyingi jina lia tungu ngwo, Melita. 2Enyaho atulwezele utu wunji: mumu awikile kahia, atutambwile eswe, mumu ha vula yoze te unanoko, ni mumu ha chishika. 3Alioze muze te Paulu hakunga jimwe tete, wajisele ha kahia, chihili watuhukile mu kavumia, wakwachile kwoko lienyi. 4Muze enyembo amwene kashitu musasu kanasukama ku kwoko lienyi, aliambile umwe kuli mukwo ni mukwo ngwo, Yono lunga chingalwe wate, chipwe hamulamwina ku kalungalwiji, hindu chiyulo cha mwilu kuchamutayijile kutwama ni mwono. 5Alioze wakukumwine kashitu mu kahia, kevwile yikola niyimwe. 6Atalile ngwe majimba, hanji malimbuka hashi susumuku, akafwe: alioze muze te hatalatala ha shimbu linene, kamwene chipi nichimwe kuli iye, alikonyekene nikwamba ngwo, Yono kumanyi, zambi umwe.

7Achi, mu chifuchi cha kusulangana, kwapwile chijima cha mukwa lutwe wa mu tungu, jina lienyi Pupiliu; watusambililile, watuzuinbwile matangwa atatu, ni kulikata chipema. 8Tato ya Pupiliu te kanapombo ni kachiki nikulokoka mu jimo: kuli iye Paulu wanjilile, walembele, nikusayika moko jenyi hali iye, wamuhindwishile. 9Alioze muze alingile chino, akwo nawa waze apwile ni misongo mu tungu yeza, yaawuka. 10O nawa atulemesene ni ulemu wunji; ni ha kukatuka chetu, atuhele mianu.

11Kulutwe lia tukweji atatu, twakatukile nikwenda mu ulungu uze watwamine mwaka wa chishika mu tungu, wa ku Alezandre, uze chinyingi chawo chapwile Mapasa. 12Mba nikuheta ku Serakusa, twasalileko matangwa atatu. 13Twakatukile kuze nikujinga, twahetele ku Rejiu: ni kulutwe lia tangwa limuwika, fuji yalumukine ku Sule, ni ha tangwa liamuchiali twahetele ku Puteolu; 14kuze se twawanyine mandumbu, aze aliumbile kuli yetu tutwame hamwe no matangwa shimbiali: chocho twahetele ku Roma. 15Kuze mandumbu muze atuvwile, ejile nikutupatwiza ndo ku yitanda ya Apiu ni ku mazuwo atatu a kuzeka ngeji; muze Paulu aamwene waze, wasakwilile Zambi, wajikijile. 16Muze twahetele ku Roma, kapitau wakunjikile funge kuli jenerale ya chilombo cha maswalale; alioze atayijile Paulu kutwama ukawenyi hamwe ni swalale yoze wamufungile.

17Kulutwe lia matangwa atatu Paulu watambikile waze apwile akwa lutwe a kuli A-Yunda, alikungulule. Muze akungamine, wambile kuli ayo ngwenyi, Yami, mandumbu, chipwe chalingile nichimwe cha kulimika ni atu, hanji ni ndako ja tulamba, hindu ku Yerusaleme amukunjikile funge ku moko ja A-Roma: 18o, muze te hangusopesa, azangile kungwecha, mumu kumwapwile chitela cha kufwa nichimwe muli yami. 19Alioze muze A-Yunda ahamikine, nalikunjikile kuli Sesare; kuchapwile ngwe nguli ni chimwe cha kusuma nacho vungu liami, ka. 20Kashika ha chikuma chino hinanutambika nwize kuli yami, ngunumone, nguhanjike ni yenu: mumu ha kutalatala cha akwa Izalele ngunakashiwa ni lenge lino. 21O ambile kuli iye ngwo, Hali yetu, kutwatambwile mikanda ya ku Yundeya ha kutwala kuli yena, chipwe niumwe wa kuli mandumbu waze ahetele, kambulwile ungulungulu niumwe hali yena, hanji kuchivuluka. 22Alioze tunachinyongo chipema kwivwa kuli yena chize unashinginyeka; mumu ha mbunga yino tunanyingika kweswe kakuhanjika yuma ya kulimika no.

23Mba se amuselele tangwa, anji ejile kuli iye ku zuwo lia kuzeka ngeji; kuli ayo washindunwine nikushindakenya ha wanangana wa Zambi, nikwakununa ha kutwala kuli Yesu, ku shimbi ya Mose, ni ku mikanda ya aprofeta, chize ku chimene ndo ku chingoloshi. 24Mba amwe akunukine ha yuma yize ambile, alioze akwo kafulielele. 25Muze kalitayile hakachi ko, akatukile; muze te Paulu hahanjika liji limuwika ngwenyi, Kanawa wahanjikile Spiritu Musandu kuli tulamba twenu ku kanwa iia profeta Izaia ngwenyi,

26Yako kuli atu ano, ukambe ngwe,

Kwivwa kumunukevwa, alioze kunuchi kanyingika nichimwe; mba kutala,

kumunukatala, alioze kunuchi kamona;

27Mumu mbunge ja atu ano hijinaleme,

o hajika ku matwi jo, hafuka meso jo;

kuchina hanji mamona ni meso jo,

hanji mevwa ni matwi jo, hanji manyingika ni mbunge jo,

akalumuke ngukaahindwise.

28Nyingikenu kashika ulamwino uno wa Zambi hiunatumiwa kuli akwa mavungu: o nawa kumakevwa. 29Iye se wambile chino, A-Yunda akatukile nikulihangujola chikolo hakachi ko.

30Alioze Paulu watwamine miaka yiali ya muwundu mu zuwo lienyi mwene, watambwile kanawa waze eswe anjilile kuli iye. 31Ambujolele wanangana wa Zambi, nikulongesa yuma ya kutwala kuli Mwene Yesu Kristu ni hamu lieswe, kukwapwile chikwiko nichimwe.

Currently Selected:

APOSTOLO 28: Csa

Highlight

Copy