APOSTOLO 27
27
1Muze achipatwile ngwo, Mutwenda mu ulungu ku Italia, akunjikile Paulu ni amwe funge akwo kuli kapitau, jina lienyi Juliu, wa ku chihuji cha Angusetu. 2Mba nikunjila mu ulungu wa ku Andramitenu, uze te himuwenda ku membo a ku mbaka ya Eshia, twakatukile, Aristako Ka-Masendoniya wa ku Tesalonika wayile hamwe ni yetu. 3Muze hikwacha twahetele ku Sendone: Juliu walwezele utu kuli Paulu wamutayijile kuya kuli tusendo twenyi, amuzumbule. 4Mba katu ku kuze twendele kushi lia sali lize kulishi fuji, lia Saipuru, mumu fuji yalimikine ni yetu. 5Muze te hitwenda ndusu kalunga-lwiji wa ku mbaka ja Selishia ni Pamafwilia, twahetele ku Mira, limbo lia mu Leshia. 6Kuze kapitau wawanyine ulungu wa ku Alezandre himuuya ku Italia; iye watunjishilemo. 7Muze te hitwenda makoke matangwa anji, twakundakenyene hindu chikalu ni Nindu, se fuji kuyatutayijile, twendele kushi lia sali lize kulishi fuji lia Kreta, nikukundakenya ni Salemone. 8Mba, nikupalika hakamwihi hindu nikuhondangana, twahetele kuma anavulukako ngwo, Zuzu Jipema, hakamwihi nako kwapwile limbo lia Lasea.
9Mba se shimbu linene hiliatoka, nikwendesa ulungu muchipwa cha Utoji se #27.9 Chiwanyino cha A-Yunda.kulitwamina kulia hichapalika kulu, Paulu waashinjilile, 10ngwenyi, Malunga, ngunamono kwendesa cha ulungu muchikapwa ni luyinda ni kufulwa chinji, hi cha yiteli wika ko ni ulungu, alioze cha mwono wetu nawa. 11Alioze kapitau wapanjikile kuli mukwa kusongwela ulungu ni mwenya ulungu, hi ku yuma yize ko ambile Paulu. 12Mumu zuzu yize kuyapemene mukutwamamo mwaka wa chishika, e anji ayulile kukatukako, kachi mahasa kama kuheta ku Fwenishia mukutwamako, kwenako zuzu ya Kreta yakutalikisa ku Chivumbuko cha tangwa ku tunda ni ku mwanda.
13Muze fuji ya ku Sule yejile makoke, ashinginyekene ngwe hazuka upale wo, asosele ankora, endele mu ulungu nikusesesa ngenge ya Kreta. 14Alioze kulutwe lia shimbu likepe, kakundukundu wa kuma kuze yoze anamuvuluka ngwo, Uru-akwilau walambile: 15ni muze ulungu wakwachikile, kuwahashile kutalikisa ku fuji, twechele tukahungumuke kulutwe liayo. 16Mba nikuhungumuka kushi lia sali lize kulishi fuji lia kamwe katungu, anakavuluka ngwo, Kalauta, mba twahasa kukolesa ulungu, hindu chikalu. 17Muze te hausosa, alingile ni yuma ya kukwasa, nikuulanga ni mihipu; no evwile woma kuchina mahunguka ha masekeseke a ku Serete, ahulumwine lona lia kwendesa ulungu, chocho ahungumiokene. 18Alioze kangonga nikupuputa chikolo hali yetu, muze hikwacha ambilile yiteli mu kalunga-lwiji. 19Ha tangwa liamuchitatu ni moko jo ene ambilile yuma ya kwendesa ulungu. 20Chipwe tangwa chipwe matongonoshi kasolokele ha matangwa anji, kangonga munene wapwile hali yetu, ha kusula kutalatala cheswe cha ulamwino chatutokele.
21Muze te hanapu shimbu linene ni zala, hohene Paulu wamanyine mukachi ko, ngwenyi, Yenu malunga, kachi nwangwononokenene, kachi kunwakatukile ku Kreta, ni luyinda yono ni kufulwa chino. 22Haliapwila ngunanushinjila nuwahilile; mumu kukuchi kapwa kutokesa nichimwe cha mwono hakachi kenu, alioze cha ulungu wika. 23Mumu kamananga ku lumbu liami ufuku uno, mungelo wa Zambi, yoze wangupita, yoze nawa nakumulingila, 24ngwenyi, Paulu, kanda wivwa woma; Chakutamba kumana kumeso ja Sesare, ni chikwo nawa, Zambi hanakwehe waze eswe akwenda mu ulungu hamwe ni yena. 25Kashika Wahililenu, malunga, mumu ngunafuliela Zambi kumuchikapwa chizechene ngwe hanambe kuli yami. 26Alioze chatutamba kuhunguka ha ngenge ya limwe tungu.
27Muze ufuku wa kumi ni wamuchiwana wahetele, shimbu twapwile nikuhungumioka kweka ni kweka mu kalunga-lwiji wa ku Andriateku, ngwe ha muchima ufuku akwa kwendesa ulungu ashinginyekene ngwe anakundama ku chifuchi chimwe: 28o esekele ha mashima ja kalunga-lwiji, awanyine makumi awana a metro. Ayile kulutwe hakepe, esekele cheka nawa, awanyine makumi atatu a metro. 29Mba nikwivwa woma kuchina hanji mutuhunguka homa ha mawe, ambilile yikungo yiwana ya kumanyisa ulungu kunyima, alembele mwalwa usoloke. 30Shimbu akwa kwendesa ulungu afupile kuchina, se hahulumuna wato ha meya ni ulembekese, ngwe kachi himambata yikungo ya kumanyisa ulungu ku zulu lia ulungu. 31Paulu wambile kuli kapitau ni maswalale ngwenyi, nyi wano kasalile mu ulungu, yenu kunwahashile kulilamwina. 32Hohene maswalale atetele mihipu ya wato, awechele kuholokela mu meya.
33Shimbu mukuchipatwoka, Paulu waliumbile kuli ayo eswe alie ngwenyi, Lino tangwa kumi ni liamuchiwana nunatalatala ni zala, kunwalile nichimwe. 34Kashika ngunaliumbu kuli yenu, nulie: hanga nukahinduke: mumu lukambu niumwe kechi katoka ku mutwe wa niumwe wa yenu. 35Muze te hamba yino yuma, yanda mbolo, yasakwila kuli Zambi kumeso ja eswe; yayipatula, yaputuka kulia. 36Hohene o eswe ajikijile, alile. 37Yetu eswe, twapwile mu ulungu kulakaji aali, ni makumi shimbiali, ni atu asambano. 38Muze te hakuta, alelumwine ulungu, nikumbila tiliku mu meya.
39Muze hikwacha kanyingikine chifuchi: alioze amwene chikonja cha ngenge, chili ni zuzu, apalile kachi mahasa kuhungulaho ulungu. 40Mba, nikumbila yikungo yakumanyisa ulungu ayihichikile mu meya, haze hene nikujituia mihipu ya leme, nikusosa lona wa kulutwe atalikishile ku zuzu. 41Alioze nikuheta muma muze mwatakanyine tulunga-lwiji aali, ahungwile ulungu hashi; zulu liakwachile hashi, liasakaminyine, alioze kunyima liamakukine ha kupupula cha mikanya. 42Maswalale ambile ngwo, Tushihenu funge, kuchina umwe masányika haze akomboke. 43Alioze kapitau, nikuzanga kulamwina Paulu, waachijile ku upale wo; wambile waze ahashile kusányika alimbile hatangu mu meya, ahete hashi; 44ni akwo, amwe ha yipamba, ni akwo ha yuma yimwe ya ku ulungu. O chocho ewse ahetele kawape hashi.
Currently Selected:
APOSTOLO 27: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
APOSTOLO 27
27
1Muze achipatwile ngwo, Mutwenda mu ulungu ku Italia, akunjikile Paulu ni amwe funge akwo kuli kapitau, jina lienyi Juliu, wa ku chihuji cha Angusetu. 2Mba nikunjila mu ulungu wa ku Andramitenu, uze te himuwenda ku membo a ku mbaka ya Eshia, twakatukile, Aristako Ka-Masendoniya wa ku Tesalonika wayile hamwe ni yetu. 3Muze hikwacha twahetele ku Sendone: Juliu walwezele utu kuli Paulu wamutayijile kuya kuli tusendo twenyi, amuzumbule. 4Mba katu ku kuze twendele kushi lia sali lize kulishi fuji, lia Saipuru, mumu fuji yalimikine ni yetu. 5Muze te hitwenda ndusu kalunga-lwiji wa ku mbaka ja Selishia ni Pamafwilia, twahetele ku Mira, limbo lia mu Leshia. 6Kuze kapitau wawanyine ulungu wa ku Alezandre himuuya ku Italia; iye watunjishilemo. 7Muze te hitwenda makoke matangwa anji, twakundakenyene hindu chikalu ni Nindu, se fuji kuyatutayijile, twendele kushi lia sali lize kulishi fuji lia Kreta, nikukundakenya ni Salemone. 8Mba, nikupalika hakamwihi hindu nikuhondangana, twahetele kuma anavulukako ngwo, Zuzu Jipema, hakamwihi nako kwapwile limbo lia Lasea.
9Mba se shimbu linene hiliatoka, nikwendesa ulungu muchipwa cha Utoji se #27.9 Chiwanyino cha A-Yunda.kulitwamina kulia hichapalika kulu, Paulu waashinjilile, 10ngwenyi, Malunga, ngunamono kwendesa cha ulungu muchikapwa ni luyinda ni kufulwa chinji, hi cha yiteli wika ko ni ulungu, alioze cha mwono wetu nawa. 11Alioze kapitau wapanjikile kuli mukwa kusongwela ulungu ni mwenya ulungu, hi ku yuma yize ko ambile Paulu. 12Mumu zuzu yize kuyapemene mukutwamamo mwaka wa chishika, e anji ayulile kukatukako, kachi mahasa kama kuheta ku Fwenishia mukutwamako, kwenako zuzu ya Kreta yakutalikisa ku Chivumbuko cha tangwa ku tunda ni ku mwanda.
13Muze fuji ya ku Sule yejile makoke, ashinginyekene ngwe hazuka upale wo, asosele ankora, endele mu ulungu nikusesesa ngenge ya Kreta. 14Alioze kulutwe lia shimbu likepe, kakundukundu wa kuma kuze yoze anamuvuluka ngwo, Uru-akwilau walambile: 15ni muze ulungu wakwachikile, kuwahashile kutalikisa ku fuji, twechele tukahungumuke kulutwe liayo. 16Mba nikuhungumuka kushi lia sali lize kulishi fuji lia kamwe katungu, anakavuluka ngwo, Kalauta, mba twahasa kukolesa ulungu, hindu chikalu. 17Muze te hausosa, alingile ni yuma ya kukwasa, nikuulanga ni mihipu; no evwile woma kuchina mahunguka ha masekeseke a ku Serete, ahulumwine lona lia kwendesa ulungu, chocho ahungumiokene. 18Alioze kangonga nikupuputa chikolo hali yetu, muze hikwacha ambilile yiteli mu kalunga-lwiji. 19Ha tangwa liamuchitatu ni moko jo ene ambilile yuma ya kwendesa ulungu. 20Chipwe tangwa chipwe matongonoshi kasolokele ha matangwa anji, kangonga munene wapwile hali yetu, ha kusula kutalatala cheswe cha ulamwino chatutokele.
21Muze te hanapu shimbu linene ni zala, hohene Paulu wamanyine mukachi ko, ngwenyi, Yenu malunga, kachi nwangwononokenene, kachi kunwakatukile ku Kreta, ni luyinda yono ni kufulwa chino. 22Haliapwila ngunanushinjila nuwahilile; mumu kukuchi kapwa kutokesa nichimwe cha mwono hakachi kenu, alioze cha ulungu wika. 23Mumu kamananga ku lumbu liami ufuku uno, mungelo wa Zambi, yoze wangupita, yoze nawa nakumulingila, 24ngwenyi, Paulu, kanda wivwa woma; Chakutamba kumana kumeso ja Sesare, ni chikwo nawa, Zambi hanakwehe waze eswe akwenda mu ulungu hamwe ni yena. 25Kashika Wahililenu, malunga, mumu ngunafuliela Zambi kumuchikapwa chizechene ngwe hanambe kuli yami. 26Alioze chatutamba kuhunguka ha ngenge ya limwe tungu.
27Muze ufuku wa kumi ni wamuchiwana wahetele, shimbu twapwile nikuhungumioka kweka ni kweka mu kalunga-lwiji wa ku Andriateku, ngwe ha muchima ufuku akwa kwendesa ulungu ashinginyekene ngwe anakundama ku chifuchi chimwe: 28o esekele ha mashima ja kalunga-lwiji, awanyine makumi awana a metro. Ayile kulutwe hakepe, esekele cheka nawa, awanyine makumi atatu a metro. 29Mba nikwivwa woma kuchina hanji mutuhunguka homa ha mawe, ambilile yikungo yiwana ya kumanyisa ulungu kunyima, alembele mwalwa usoloke. 30Shimbu akwa kwendesa ulungu afupile kuchina, se hahulumuna wato ha meya ni ulembekese, ngwe kachi himambata yikungo ya kumanyisa ulungu ku zulu lia ulungu. 31Paulu wambile kuli kapitau ni maswalale ngwenyi, nyi wano kasalile mu ulungu, yenu kunwahashile kulilamwina. 32Hohene maswalale atetele mihipu ya wato, awechele kuholokela mu meya.
33Shimbu mukuchipatwoka, Paulu waliumbile kuli ayo eswe alie ngwenyi, Lino tangwa kumi ni liamuchiwana nunatalatala ni zala, kunwalile nichimwe. 34Kashika ngunaliumbu kuli yenu, nulie: hanga nukahinduke: mumu lukambu niumwe kechi katoka ku mutwe wa niumwe wa yenu. 35Muze te hamba yino yuma, yanda mbolo, yasakwila kuli Zambi kumeso ja eswe; yayipatula, yaputuka kulia. 36Hohene o eswe ajikijile, alile. 37Yetu eswe, twapwile mu ulungu kulakaji aali, ni makumi shimbiali, ni atu asambano. 38Muze te hakuta, alelumwine ulungu, nikumbila tiliku mu meya.
39Muze hikwacha kanyingikine chifuchi: alioze amwene chikonja cha ngenge, chili ni zuzu, apalile kachi mahasa kuhungulaho ulungu. 40Mba, nikumbila yikungo yakumanyisa ulungu ayihichikile mu meya, haze hene nikujituia mihipu ya leme, nikusosa lona wa kulutwe atalikishile ku zuzu. 41Alioze nikuheta muma muze mwatakanyine tulunga-lwiji aali, ahungwile ulungu hashi; zulu liakwachile hashi, liasakaminyine, alioze kunyima liamakukine ha kupupula cha mikanya. 42Maswalale ambile ngwo, Tushihenu funge, kuchina umwe masányika haze akomboke. 43Alioze kapitau, nikuzanga kulamwina Paulu, waachijile ku upale wo; wambile waze ahashile kusányika alimbile hatangu mu meya, ahete hashi; 44ni akwo, amwe ha yipamba, ni akwo ha yuma yimwe ya ku ulungu. O chocho ewse ahetele kawape hashi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.