APOSTOLO 21

1Muze te hitwalihandununa no, twendele mu ulungu, tukapatule pundu ku Koshe, ni tangwa likwo twahetele ku Rotese, katu ku kuze twahetele ku Patara: 2se twawanyine ulungu wa kuzauka mu sali ku Fwenishia, twanjilile, tukaye. 3Muze hitwamona chifuchi cha Saipuru, nikuchihichika ku chimeso chetu, twendele ndo ku Seria, twahetele ku Teru; mumu kuze ulungu te himalongolola yiteli yawo. 4Ni se twawanyine tumbaji, twasalileko matangwa shimbiali: waze ambile kuli Paulu ku tachi ja Spiritu ngwo, Kanda ukakanduka ku Yerusaleme. 5Alioze muze te hitwatwama matangwa, twakatukile, twayile mu wenyi wetu; o eswe ni akwo-mapwo ni ana, atushinjikilile ndo haze lia limbo, mba nikuliumba makungunwa ha ngenge ya kalunga twalembele, twalishikile umwe ni mukwo ni mukwo; 6twanjilile mu ulungu alioze o ahilukile ku mahio.

7Muze te hitwamanununa jila ya kukatuka ku Teru, twahetele ku Tolemaise. Muze twamenekene mandumbu twatwamine tangwa limuwika hamwe no, 8tangwa likwo twakatukile, twahetele ku Sesarea; twanjilile mu zuwo lia Fwilipe, mukwa kwambujola sango lipema, iye wapwile umwe wa kuli e shimbiali, mba twatwamine hamwe nenyi. 9Achi, yono wapwile ni anenyi a mapwo awana, waze kanda aya ulo, akwa kuprofeteza. 10Shimbu twatwamineko matangwa amwe, kwakatukile ku Yundeya umwe profeta, jina lienyi Angavu. 11Iye yeza kuli yetu, yanda muya wa Paulu, yalikasa moko jenyi ni molu jenyi mwene, yamba ngwenyi, Chocho anambe Spiritu Musandu ngwenyi, Chocho A-Yunda a mu Yerusaleme kumakasa mwenya muya uno, kumamukunjika ku moko ja akwa mavungu. 12Muze twevwile yino yuma, ni yetu ni enyembo, twaliumbile kuli iye, kanda akakanduka ku Yerusaleme. 13Alioze Paulu wakumbulwile ngwenyi, Kuchi nunalingi, nikulila, nikushiha mbunge yami? Mumu ngunahase hi kukashiwa wika ko, alioze kufwa nawa ku Yerusaleme ha jina lia Mwene Yesu. 14Muze katayileko, twaholele, ngwetu, Upale wa Mwene ukalingiwe.

15Kulutwe lia matangwa ano, twakashile yuma yetu, twakandukile ku Yerusaleme. 16Mba amwe a kuli tumbaji a ku Sesarea ayile hamwe ni yetu, nikutwala hamwe no umwe Nasone wa ku Saipuru, kambaji mukulu, yoze matuzeka.

17Muze twahetele ku Yerusaleme, mandumbu atusambililile. 18Mba ha tangwa likwo, Paulu wayile hamwe ni yetu kuli Tiangu; ni makulwana eswe apwileko. 19Muze te haameneka, wambulwile chimwe ha chimwe yuma yize alingile Zambi hakachi ka akwa mavungu ku uvumbiko wenyi. 20O muze achivwile, achichimiekene Zambi; ambile kuli iye ngwo, Unamono, ndumbu, ngwe yizavu yipwa haha kuyili ya A-Yunda waze hanafuliela; ni eswe kakusela mbunge jo ku shimbi: 21hanaambulwila ha kutwala kuli yena, ngwe wakulongesa A-Yunda eswe hakachi ka akwa mavungu kwehuka Mose, nikwakanjisa kupwisa ngalami ana jo, nikwakanjisa kwenda nikulita ni ndako ja A-Yunda. 22Kuchi muchipwa kashika? Makevwa ngwo, Heza. 23Linga kashika chize tunambe kuli yena: ngwetu, Malunga awana tuli no, waze chilakenyo ali nacho; 24uatwale, ukalipemese hamwe no, ukaafwetele kongo lio, hanga akatewule mitwe yo: mba eswe makanyingika umwenemwene wakuhi niumwe ha yize aambulwilile ha kutwala kuli yena, alioze yena mwene wakwenda nikululika nikufunga shimbi. 25Alioze ha kutwala kuli akwa mavungu waze hanafuliela, twatumine mukanda, nikupatula ngwetu, Akalifunge ku yuma yize hanayitambula ku mahamba, ni ku manyinga, ni ku tushitu a kuhonda, ni ku utanji. 26Hohene Paulu watwalile e malunga, ni ha tangwa likwo, ha kulipemesa hamwe no, wanjilile mu tembele, nikusolola ngwe kumanunuka cha matangwa a kupemesa, ndo malambula chitapo hali ayo eswe mutu ni mutu.

27Muze te matangwa shimbiali himamanunuka, A-Yunda a ku Eshia, muze amumwene mu tembele, avundwile mbunga yeswe, o amukwachile, 28akololokele ngwo, A-Izalele, tukwasenu: mwe mutu yono kakulongesa atu eswe kweswe kulimika ni e atu, ni je shimbi, ni zuwo lino; chikwo nawa, hananjisa A-Ngresia nawa mu tembele, hanachishi muma muno, musandu. 29Mumu amwene kulu Trofwimu, Ka-Efwesu, hamwe nenyi mu limbo, iye ashinginyekene ngwe Paulu hamunjisa mu tembele. 30Limbo lieswe liapwile ni Chizungozungo, atu akungulukile; akwachile Paulu, amumbulumwine haze lia tembele; haze hene ajilile mapito. 31Shimbu afupile kumushiha, liji liahetele kuli manjolo wa chihuji cheswe, ngwo, Limbo lieswe lia Yerusaleme linazunguluka. 32Hohene watwalile hamwe nenyi maswalale ni tupitau, wapalumukine fuji kuli ayo: o muze amwene manjolo ni maswalale alitwaminyine kulamba Paulu. 33Hohene manjolo wakundamine, wamukwachile, wambile amukase ni malenge aali; iye wahulile jina lienyi, ni chize alinga, 34alioze amwe akalumiokene chuma chimwe, amwe akalumiokene chuma cheka hakachi ka mbunga: muze kahashile kunyingika pundu mumu ha vunda, wambile amunjise mu mbonge. 35Muze ahetele ku ndondelo, amumbachile kuli maswalale mumu ha kupupula cha mbunga. 36Mumu chizavu cha atu akawile nikukololoka ngwo, Muchizenuko.

37Alioze shimbu te himamunjisa mu mbonge, Paulu yamba kuli manjolo ngwenyi, Ngutayize kama ngwambe chuma chimwe kuli yena. Iye wambile ngwenyi, Yena unahanjika Ngresia, nyi? 38Yena hi uli Ka-Engitu ko yoze kunyima lia matangwa ano wavundwile atu, watwalile haze mu puya tununu awana a malunga yingalwe, nyi? 39Alioze Paulu wambile ngwenyi, Yami nguli Ka-Yunda wa ku Tarsu, mwenya limbo lilemu lia mu Selishia; ngunaliumbu kuli yena, ngutayize kama nguhanjike kuli atu. 40Muze te hamutayiza, Paulu, nikumana ha ndondelo, walahwile ni kwoko lienyi kuli atu; o muze te hahola kulu, wahanjikile kuli ayo mu limi lia Hepreu, ngwenyi,

Currently Selected:

APOSTOLO 21: Csa

Highlight

Copy