APOSTOLO 18

1Kulutwe lia yino yuma, Paulu wakatukile Ku Atene, wayile ku Korindu.

2Wawanyine umwe Ka-Yunda, jina lienyi Akwila, mukwa Ponta ku munyachi wenyi, te hakatuka shimbu likepe wika ku Italia, ni mukwo-pwo Prisela; mumu te Kelautiu hahana shimbi A-Yunda eswe akatuke ku Roma: iye walifutwile no; 3se apwile akwa milimo yimuwika, Watwamine hamwe no, nikulinga; mumu apwile ku milimo yo akwa kutunga mbalaka. 4Iye wahanjikile kuli atu mu sunangonga ha masambata eswe, wakunwine A-Yunda ni A-Ngresia.

5Muze Saila ni Timoteu apalumukine ku Masendoniya, lie liji lialemene Paulu, nikushindakenya chikolo ni mbunge yeswe kuli A-Yunda, ngwenyi, Yesu iye mwe Kristu. 6Alioze se alimikine nikushililika, wakukumwine mazalo jenyi, ngwenyi, Manyinga jenu akapwe ha mitwe ya yenwene; yami ngunasambe: chize ku haliapwila ndo ku miaka munguya kuli akwa mavungu. 7Iye wakatukile kuze, wanjilile mu zuwo lia umwe mutu, jina lienyi Titu Justo, mukwa kuwayila, zuwo lienyi lialihachile ni sunangonga. 8Alioze Krisepu, mukwa kuyula sunangonga, wafulielele Mwene, ni akwa zuwo lienyi eswe; ni anji a kuli A-Korindu, ha kwivwa, yafuliela, yaapapachisa. 9Mwene wambile kuli Paulu ha ufuku mu usolwelo ngwenyi, Kanda ukevwa woma, alioze hanjika, kanda ukahola: 10mumu nguli hamwe ni yena, ni mutu niumwe kechi kakukwata mukukulinga chipi: mumu atu anji nguli no mu limbo lino. 11Iye watwamineko kumi lia tukweji ni tukweji nake, nikulongesa liji lia Zambi hakachi ko.

12Alioze muze Ngaliu apwile nguvulu ya Akeya, A-Yunda ni mbunge yimuwika akatukilile Paulu, nikumutwala ku chitwamo cha upatwilo, 13ngwo, Yono kakukununa atu kuwayila Zambi ngwe kuchalitele ni shimbi. 14Alioze muze Paulu ambile kupakula kanwa lienyi, Ngaliu wambile kuli A-Yunda ngwenyi, Kachi chamwenemwene chinakapwa chitela chimwe, hanji mulonga wa utanganyanyi, kachi changutamba kulihumikiza ni yenu, A-Yunda. 15Alioze se hichapwa yihula ha maliji ni majina ni shimbi ya yenwene, chitalenu yenwene; yami chisolo kusopa yino yuma. 16Iye waahumine ku chitwamo cha upatwilo. 17O eswe akwachile Sosetene, mukwa kuyula sunangonga, amulambile kulutwe lia chitwamo cha upatwilo, ni Ngaliu kasele mbunge ha nichimwe cha ku yino yuma.

18Paulu, se watwamine kulutwe lia chino hindu matangwa anji, washikile ni mandumbu, wendele mu ulungu ku Seria, ni hamwe nenyi Prisela ni Akwila; Paulu te wakambile mutwe wenyi mu Senekwea, mumu chilakenyo wapwile nacho. 19Iye wahetele ku Efwesu, waahichikileko: alioze iye mwene wanjilile mu sunangonga nikuhanjika kuli A-Yunda. 20Muze amulembele, atwame no shimbu, katayileko: 21alioze washikile no, ngwenyi, Changutamba kuhichika yuma yeswe ngukapwe ku chiwanyino chize muchizaho ku Yerusaleme; alioze kumungukahiluka kuli yenu kachi Zambi mapala, iye wakatukile ku Efwesu nikwenda mu ulungu.

22Muze te haheta ku Sesarea, yakanduka, yameneka chikungulwila, yapalumuka ku Andiakia. 23Muze hatwamako shimbu, wakatukile, wayile ndusu mu chifuchi cha Ngalashia ni Fwijia, limbo ni limbo, nikutakamisa tumbaji.

24Achi, umwe Ka-Yunda, jina lienyi Apolu, mukwa Alezandre ku munyachi wenyi, mukwa kulongoloka, wahetele ku Efwesu; iye mukwa tachi mu yisoneko. 25Yono wafumbiwile mu jila ya Mwene; iye se wazangumioka mu Spiritu, wahanjikile, nikulongesa pundu yuma ya kutwala kuli Yesu, alioze kananyingika wika upapachiso wa Yoano: 26iye waputukile kuhanjika ni hamu mu sunangonga. Alioze muze Akwila ni Prisela amuvwile, amutwalile hamwe no, washindunwine kuli iye pundu nawa jila ya Zambi. 27Muze ahalile kuya ku Akeya, mandumbu amukwashile, asonekene kuli tumbaji akamutambule. Muze aheteleko, wakwashile chikolo waze te ku vumbi afulielele. 28Mumu wakumikine chikolo A-Yunda, ni chize kumeso ja atu eswe, nikulweza ku Yisoneko Yesu iye mwe Kristu.

Currently Selected:

APOSTOLO 18: Csa

Highlight

Copy