MUKANDA WAMUCHIALI WA TIMOTEU 2
2
1Kashika yena, mwanami, takama mu vumbi lize lili muli Kristu Yesu. 2Ni yuma yize hiunevu kuli yami kumeso ja yela anji, yino kulijika kuli malunga amwenemwene, waze makahasa kufumba akwo nawa. 3Nyongonona ni utunu ndusu mu yipi, ngwe swalale mupema wa Yesu Kristu. 4Swalale niumwe malilimba ni yuma ya mwono uno; hanga akapemene kuli yoze hanamusela ku uswalale. 5Nyi kachi umwe malinjika ha kuheha, keshi kumusa chipangula shina malinjika nikulita ni shimbi yacho. 6Njimi yoze makilikita, chamutamba kulianga kutambula chihanda cha mihuko. 7Zewula chize ngunambe; mumu Mwene kumakakwaha malinjekela ha yuma yeswe.
8Iwuluka Yesu Kristu amuhindwishile hakachi ka afu, wa ku munyachi wa David, nikulita ni sango liami lipema. 9Mu chuma chino nakwivwa lamba, nguli mu malenge ngwe mukwa kulinga yipi; alioze liji lia Zambi kuliakashiwile. 10Ha chikuma chino nakunyongonona mu yuma yeswe, mumu hali waze hanaatongola, hanga akazuke ulamwino uze uli muli Kristu Yesu, hamwe ni uhenya wa mutolo. 11Liji lino liamwenemwene ngwo,
Mumu kachi twafwile hamwe nenyi, kachi mutukapwa ni mwono hamwe nenyi.
12Kachi mutunyongonona mu lamba kachi mutukayula hamwe nenyi nawa:
kachi mutulikala iye, kachi iye nawa makalikala yetu.
13Kachi yetu hi tuli amwenemwene ko, iye katwama wamwenemwene;
mumu kahashile kulikala mwene.
14Ewuhvise yino yuma ni kwaaha koki kumeso ja Mwene ngwe kanda akahangujola ha maliji, chize kuchishi kufumbuka nichimwe, kuchakulimbwisa waze akwivwa. 15Lipupwise kulitumbikila ngwe umwe hanamusela Shindakenyo yipema kuli Zambi, mukwa milimo yoze keshi nacho nichimwe cha kumuvwisa sonyi, kanapatula kanawa mu liji lia umwenemwene. 16Alioze China kumbambula chamokomoko cha ujiluke: mumu kumakasenya kulutwe ku utanganyanyi Wahiana. 17Ni liji lio kumulikambungumuka ngwe mbongola: a kuli ayo kanapu Hemene ni Fwiletu. 18Ano ha kutwala ku umwenemwene hanapiasuka, ngwo, Uhindukilo hiwapalika kulu, kanalimbwisa Ufulielo wa amwe. 19Hindu fundamentu yingunu ya Zambi kuyakola, yikwete Chijikilo chino ngwo, Mwene kananyingika ninyenyi; chikwo ngwo, Mweswe mavuloka jina lia Mwene akakatuke ku uhenge.
20Achi, mu zuwo linene muyili yikwachilo, hi ya oru ni ya prata wika ko, alioze muyili nawa ya mutondo, ni ya uma; yimwe ku ulemu, ni yikwo ku ulelu. 21Kashika kachi mutu malipemesa ku yino, kachi makapwa chikwachilo ku ulemu, musandu, wa kutela uvumbiko wa mwata, wa kululika ha yitanga yeswe yipema. 22Alioze China usolo wa ukweze, ukakaule ululi, ni Ufulielo, ni zango, ni sambukila, hamwe ni waze akutambika hali Mwene ni mbunge yipema. 23Alioze lituna yihula ya uhepuke ni yize kuyishi kulumbunuka, se unanyingika ngwe kuyakuneha ndombo. 24Kuchatambile ndungo ya Mwene kuneha ndombo, alioze akapwe chimbovu kuli eswe, mukwa kujama ha kulongesa; chihumikiji; 25ni Spiritu ya kushimbika, afumbe waze akulimika; kachi hanji Zambi makaaha kulikonyeka, akahete ku yinyingi ya umwenemwene. 26Akalaule, akachine ku kambwila lia Ndiapu, (waze hanakwachika kuli iye mukulinga upale wenyi).
Currently Selected:
MUKANDA WAMUCHIALI WA TIMOTEU 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
