2 PETULU 2
2
1Alioze kwapwile aprofeta a kwonga nawa hakachi ka atu, chizechene ngwe hakachi kenu nawa kumukukapwa alongeshi a kwonga, ku tenga kumakaneha longeso lia kuhandununa lia kwonwona, nikulikala chipwe Mwata yoze waalanjile, ni kuneha hali ayo ene kwonwona cha susumuku. 2Ni anji kumakakaula yilinga yo ya ujila; mumu hali ayo makashililika jila ya umwenemwene. 3Ni ku kuzo, ni maliji a ulembekese, makanupwisa yuma ya kusepa nayo: upatwilo wo chize ku shakulu kuushi kushimbula, ni kwonwona cho kuchishi kufungunuka.
4Mumu kachi Zambi kavwilile keke angelo muze avulumwine, aiioze waanyashine mu #2.4 “Tartaru” wina wa milima. Tartaru, waakunjikile ku malenge ja milima mukwafunga ndo ku upatwilo. 5Iye kavwilile keke akwa hashi ha shakulu, aiioze wafungile hamwe ni shimbiali akwo, Noe, kanganda ka ululi, muze anehene sanga lia meya hashi hali yitanganyanyi. 6Wajindwolele membo ja Sondome ni Ngomora ku uto, waahishile ni kupupa, se waapwishile chilweza kuli waze menda ni utanganyanyi. 7Wapulwile Lote, mukwa ululi, wamwene lamba ku kwenda cha ujila cha yingulungulu; 8(mumu yoze mukwa ululi se watwamine hakachi ko, nikumona, nikwivwa, Wapinjishile mbunge yenyi ya ululi tangwa ha tangwa ni yitanga yo ya Utanguko). 9Mwene kananyingika kupulula akwa kuwayila ku cheseko, ni kufunga yihenge kushi lia lamba ndo ku tangwa lia upatwilo; 10aiioze kuhiana chikolo waze akwenda nikulita ni musunya ni usolo wa luchisa, akulelesa ulemu.
Akwa kuhunuka, akwa pami, keshi woma wa kutuka alemu. 11Alioze angelo, chipwe kanaahiana ni ngolo ni tachi, keshi kwakumisa hi maliji a kutuka kumeso ja Mwene. 12Alioze wano ngwe tushitu yipama, akwa chisemewa, kanasemuka akaakwate akaashihe, kanahanjika chipi ha yuma yize kayinyingikine, kumatoka mu kupola cho ene, kumatambula fweto ya uhenge wo. 13Kakuchinyonga chiseke kuhungumuka ni yipi ha mwalwa, yipeka ni tupalia, kanahungumuka mu yongo yo shimbu akuliangana ku yiteleka hamwe ni yenu. 14Kali ni meso a tò ni utanji, keshi kuhasa kulitwamina ku shili; nikusongojola atu aze kajikijile; nikupwa ni mbunge ja kulifumba ni kuzo; akwa shingo. 15Se hanehuka jila ya kululama, hanapianguka, se hanakaula jila ya Mbalau, mwana Mbeore, yoze wazangile fweto ya uhenge. 16Alioze amwámbilile ha Utanguko wenyi mwene: chimbulu kamama wahanjikile ni liji lia mutu, wakanjishile uzaluke wa profeta.
17Wano anapu mafuji waze keshi meya, malelwa a kuhungumioka ku kakundukundu: hanaalulikila kulá cha milima. 18Mumu nikuhanjika maliji anene a kulivwimba amokomoko, kakusondojola mu usolo wa musunya, ni ujila, waze anambe kwomboka kuli waze akwenda mu maliji a kupiangula. 19Kakwalakenya utuswilo, shimbu ayo ene anapu ndungo ja kupola; mumu ku chize makumba mutu, ku chize nawa mamupwisa ndungo. 20Mumu kachi muze te homboka ku luchisa wa hashi ku chinyingi cha Mwene kanda Chilamwina chetu Yesu Kristu, malimbalimbamo cheka nawa, akaakumbe, muhela wo wa kusula hiwapwa upi Wahiana. 21Mumu hapwa hali ayo kachi kanyingikine jila ya ululi, shina, muze te hayinyingika, kuchinduluka ku liji lisandu lia shimbi lize aakunjikile. 22Alioze hichinaawane nikulita ni chishima chamwenemwene ngwo, Kawa hanahilukila ku yisaza yenyi mwene; chikwo ngwo, Ngulu wa kusanyisa hanahilukila mukusandumioka mu malowa.
Currently Selected:
2 PETULU 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
