John 11
11
Ali7aazara Hayquwaa
1Biitaaniyaa giya qeeri katamaan Ali7aazara giya itti bitani harggeedda; he katamay Mayraamanne izi michchatta Martta de7eedda katamaa. 2Godaa gediyaa shittuwaa okkaade, bare binnanaan A gediya qucceeddawunna he Mayraamo; harggeeddawe qassi izi ishaa Ali7aazara. 3Hewaa diraw, michchatuu, <<Godaw, neeni siiqiyaawe harggeedda>> giide Yesuusaw kiitteeddino.
4Yesuusi hewaa siseedda wode, <<Taani Xoossaa Na7ay harggiyaa gaasuwan bonchchettana mala, Xoossaa bonchchuwaassi ha harggii Ali7aazara oyqqeeddappe attin, wodhiyaa harggiyaa gidenna>> yaageedda.
5Yesuusi Martto, izi michchattonne Ali7aazara siiqee; 6Ali7aazar harggeeddawaa Yesuusi siseedda wode, bare de7iya sa7an laa77u gallassaa peesheedda. 7Hewaappe guyyiyan, Yesuusi barena kaalliyaawantta <<Laa7enthuwaa Yihudaa gadiya boytte>> yaageedda.
8Yesuusa kaalliyaawanttu zaariide, <<Tamaarissiyaawoo, guutha wodiyaappe kase Ayihudatuu neena shuchchan caddanaw koyyeeddino; qassikka yaa baanii?>> yaageeddino.
9Yesuusi, <<Itti gallassan tammanne laa77u saati de7enneeyee? Gallassi hamettiyaa asay dhubettenna; ayissi gooppe, I ha sa7aa poo7uwaa be7ee. 10Shin qamma hamettiyaa uray de7ooppe, poo7uu aani baynna diraw, dhubettee>> yaageedda. 11Yesuusi hewaa geeddawaappe guyyiyaan, qassikka unttunttussi, <<Nu dabbu Ali7aazar gemi77isheedda; shin gemi77ishuwaappe A denthanaw Taani bay>> yaageedda.
12Yesuusa kaalliyaawanttu zaariide, <<Godaw, I gemi77isheeddawaa gidooppe, aw lo77anawaa>> yaageeddino.
13Ali7aazar hayqqeeddawaa Yesuusi odeedda; shin Ali7aazar gemi77ishiide giseeddawaa odeedda giide, unttunttu qoppeeddino. 14Hewaa diraw, Yesuusi geeshshiide unttuntta, <<Ali7aazar hayqqeedda. 15Hinttenttu ammanana mala, taani he sa7an de7ennawoo, hinttenttu diraw nashettay. Shin denddite; aakko boytte>> yaageedda.
16Hewaappe guyyiyan, manttiyaa geetettiyaa Toomaasi bare laggethatuwaa Yesuusa kaalliyaawantta, <<Yesuusanna hayqqanaw nuunikka qassi boytte!>> yaageedda.
Yesuusi, Dendduwaanne De7uwaa
17Yesuusi gakkiya wode, Ali7aazaraw moogettoodeppe oyddu gallassa gideeddawaa demmeedda. 18Biitaaniyaa katamay Yeerusalaameppe heezzu kiilo miitiriyaa keenaa haakkee. 19Daro Ayihudatuu Marttonne Mayraamo unttunttu ishay hayqqeeddawoo menthethanaw yeeddino.
20Martta Yesuusi yeeddawaa sisaadde, A mokkanaw kessaaddu; shin Mayraama gollen attaaddu. 21Martta Yesuusa, <<Godaw, neeni hawaan de7eeddawaa gidintto, ta ishay hayqqenna. 22Shin neeni woossiyaawaa ay gidooppenne, Xoossay new haray atto ha77ikka immanawaa taani eray>> yaagaaddu.
23Yesuusi, <<Ne ishay hayquwaappe denddana>> yaageedda.
24Martta, <<Wodiyaa wurssethaan #11:24 Wodiyaa wursethaan: Xoossay asaa zerethaa ubbaa pirddaw shiishshiyaa wode guussaa. dendduwaa gallassi, I hayquwaappe denddanawaa taani eray>> yaagaaddu.
25Yesuusi iziw, <<Taani dendduwaanne de7uwa; Taana ammaniyaa uray haray atto, hayqqoppekka de7uwan de7anawaa. 26Qassi de7uwan de7iya uraynne Taana ammaniyaa uray ubbay ubbaakka hayqqenna; hewaa neeni ammanay?>> yaageedda.
27Martta zaaraadde, <<Godaw, E taani ammanay; neeni Xoossaa Na7aa, sa7aa yaanaw de7iya Kiristtoosa gidiyaawaa taani ammanay>> yaagaaddu.
28Martta hewaa geeddawaappe guyyiyan, baade bare michchattiw geeman xeessaade, <<Tamaarissiyaawe yiide, neena koyyee>> yaagaaddu. 29Mayraama hewaa siseedda wode, elleela dendda eqqaade Yesuusakko baaddu. 30Yesuusi Martta A mokkeedda sa7an de7eeppe attin, biro qeeri katamaa gakkibeenna. 31Mayraamo menthethiidde, gollen izinna de7iya Ayihudatuu, iza ellekka dendda eqqaade kare kesiyaawaa be7iide, Ali7aazar moogetteedda duufuwaa baade yaani yeekkanaw hanaw yaagiide, izo kaalliide keseeddino.
32Mayraama Yesuusi de7iyaasaa baade Yesuusa be7eedda wode, A gediya bollan kunddaaddu; <<Godaw, neeni hawaan de7eeddawaa gidintto, ta ishay hayqqenna shin!>> yaagaaddu.
33Yesuusi iza yeekkiyaawaanne qassi izinna yeedda Ayihudatuukka yeekkiyaawaa be7iide, bare wozanaan daro seeletteedda; qassi tookki shemppeedda. 34Unttuntta, <<Haqan moogeedditee?>> yaagiide oochchina, <<Godaw, yaade be7a>> yaagiide zaareedino.
35Yesuusi afoxxeedda. 36Hewaa diraw, Ayihudatuu, <<Ali7aazara I ay keenaa siiqintto be7ite!>> yaageeddino.
37Shin unttunttuppe ittu ittu, <<Hawe qooqa bitaniyaa xeelisseeddawe ha bitani hayqqennaadan udanaw danddayennee?>> yaageeddino.
Yesuusi Ali7aazara Hayquwaappe Dentheedda
38Yesuusi qassikka wozanaappe qarettiide, Ali7aazar moogetteedda duufuwaakko beedda; he duufuu gonggoluwaa gidiide shuchchan qum77etti utteedda. 39Yesuusi, <<Shuchchaa diggite!>> yaagiide azazeedda.
Hayqqeedda bitaniyaa michchatta Martta, <<Godaw, I hayqqoodeppe oyddu gallassa gideedda diraw, ha77i xinqqanawaa!>> yaagaaddu.
40Yesuusi Martto, <<Ammaniyaawaa gidooppe, neeni Xoossaa bonchchuwaa be7anawaa Taani new odabeykittaa?>> yaageedda. 41Unttunttu shuchchaa dentheeddino; Yesuusi saluwaa pude xeelliide, <<Aawoo, Taani giyaawa neeni siseedda diraw, neena galatay. 42Neeni ubba wode sisiyaawaa Taani eray; shin hawaan yuuyyi aadhdhiide eqqeedda asay neeni Taana kiitteeddawaa ammanana mala, hawaa Taani unttunttu diraw gay>> yaageedda. 43Yesuusi hewaa geeddawaappe guyyiyan, bare qaalaa dhoqqu udiide, <<Ali7aazaraa, haa kessa!>> yaageedda. 44Hayqqeedda Ali7aazara kushiinne gedi shaluwaan qashetti uttiide A deemuuka afilan kametti utteeddawe kesina Yesuusi unttuntta, <<Billii aggite! Bo!>> yaageedda.
Kiristtoosa Bolla Maqqetteeddino
(Mat 26:1-5; Mar 14:1-2; Luq 22:1-2)
45Hewaa diraw, Mayraamikko yeedda Ayihudatuwaappe coratuu Yesuusi ootheeddawaa be7iide, A ammaneeddino. 46Shin unttunttuppe ittu ittuu Parisaawatuwaakko biide, Yesuusi ootheeddawaa unttunttussi odeeddino. 47Hewaappe guyyiyan, qeesatuwaa kaappatuunne Parisaawatuu yaa7aa shiishshiide, <<Ha bitani daro wolqqaama malaataa oothiyaa diraw, ayaa oothanee? 48Nuuni A co77u giide, aggooppe, asay ubbay A ammananawaa; qassi Roome gadiya asatu yiide, nu Geeshsha Golliyaanne nu asaa dhayissana>> yaageeddino.
49Unttunttuppe ittu Qayaafaa giyaa, he laythi qeesatuwaa ubbatuwaa kaappo gideeddawe, <<Hinttenttu aynne erikkita! 50Asay ubbay dhayiyawaappe asa ubbaa diraw, itti asay hayqqiyaawe lo77a gidiyaawaa hinttenttu akeekite?>> yaageedda. 51I hewaa bareppe gibeenna; shin he laythi qeesatuwaa ubbatuwaa kaappo gidiyaa diraw, Yesuusi Ayihuda asaa diraw hayqqanaw bessiyawaa Nabii odeedda. 52Qassi Yesuusi Ayihuda asaa xalalaw hayqqenna; shin laaletti de7iya Xoossaa naanaa ittuwaa udi shiishshanaw hayqqanawaa.
53He gallassaappe doommiide, unttunttu A wodhanaw maqqetteeddino. 54Hewaa diraw, Yesuusi Ayihudatu gidduwaan qoncciyaan yaa haa hamettibeenna; shin mela biittaa gaxaan de7iya gadiya, Efireema geetettiyaa katamaa beedda. Barena kaalliyaawanttunna hewaan takkeedda.
55Ayihudatuu Paasigaa bonchchiya gallassay mateedda; qassi daro asay barena geeshshanaw, Paasigaa bonchchiya gallassay gakkanaappe kase dumma dumma saappe Yeerusalaame beedda. 56Unttunttu Yesuusa koyyiino; Geeshsha Golliyaan eqqiide, <<Ayaa qoppiitee? Paasigaa bonchchiyaasaa Yesuusi yeennee?>> yaagiide ittu ittuwaa oochcheeddino. 57Qassi qeesatuwaa kaappatuunne Parisaawatuu Yesuusa qachchanaw, I de7iyaasaa eriyaawe ooninne barenttoo odana mala azazeeddino.
Currently Selected:
John 11: dwrNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa