Pfong Ka̱za 5
5
Kpa na ba̱ A̱truk Ka̱za nu
1Mbvak yak a̱ntyok swat a̱ntwam dityok u n dyi a̱gba̱dang kpa ta̱ka̱rda ban jem kyang a̱ta̱sa ka bu ka̱yat ka, a̱ si bat a̱ zzu di hatimi a̱tiyring. 2N si bo n dyi a̱kinkreng a̱pfong Ka̱za na̱ sseng a̱ yei da̱ a̱gba̱dang diwan a̱ yya, “A̱nyan a̱ maai a̱ kruk kpa nani a̱ bo seyak hatimi na?” 3Ma ba shya a̱yin ba, ko tazwa ko kyi ka̱byen ko a̱ta̱hwa ka̱byen. A̱yin a̱n shyi a̱ ni maai kruk kpa na ba, ba̱lle na̱ cyang ka̱yat nkpa ka. 4N kun ba̱ssi ba̱gingang ka̱sak ka ban wi shya a̱yin nu a̱ maai a̱ yrang kpa na ni ko na̱ cyang ka̱yat kpa ka. 5A̱yanyet ka̱yat ba̱nekwo nswak nhwa bu ba̱ naai u a̱ hywa da̱ nzuk, “Ryok kun ba. Cyang, Zaki nsot Yahuda na yemi, ka̱mbvon Dawuda ka, nu a ka̱n za nasara a̱ si tyak, nu a̱mi a̱ maai yrang kpa na bu hatimi a̱tiyring nkpa na.”
6N bo n dyi A̱truk na̱ sseng a̱katyyi a̱ntwam dityok ka. Nkyang sso iya ba̱ na naai bu ba̱nekwo ba a̱ tyong a̱ ku krang. A̱truk u a̱ ryi anye ba ka̱n ku hywat, a̱ byyi a̱tom a̱tiyring ba̱ a̱ssi a̱tiyring, nna a̱ sseng ka̱nu Tswa Ka̱za ba̱ nji a̱tiyring ba tom mi i ka̱sa ka sa̱rei ni. 7Na̱ nat a̱ si sook kpa na an bvak yak a̱tuba nu a̱ swat a a̱ntwam dityok u ni. 8Ka̱ram ka ban yya a̱mi ni sa̱rei nkyang sso iya bu ba̱nekwo nswak nhwa bu ba̱ naai a̱ ta̱gbok a̱ta̱ssi A̱truk ka, sa̱rei mba koyan a̱ breng zinzom bu turare ka̱yat na̱macwwang nkwano zinariya, a̱duwa ba̱nyet tssup a̱ yemi. 9Ba sook a̱hwai a̱bvom a̱ yya:
“Nwan a̱mi maai sook kpa nani
i wwok hatimi nkpa nu.
Rot ba yi na̱ hywat,
ba̱sok nwan ba a tyyi n san ba̱nyet wrak Ka̱za
a kozan nwap
bu kozan diryem
bu kozan ba̱nyet
bu kozan a̱gba̱dang ka̱byen.
10A ba̱ brak n yya ka̱ryi dityok
ba ga yya Ka̱za pfong di ba̱gado Ka̱za ni,
mba a̱mi a̱ ni yya dityok ti i ka̱sa ka.”
11N si bo cyang n hok na̱wan ba̱pfong Ka̱za ba tyong a̱ krang a̱ntwam dityok u, bu nkyang sso iya bu ba̱nekwo ba. Ka̱tswa ba̱pfong ka a̱ ra̱u cyi kop swak nkrang cyi kop swak. 12Ba bvom di cet a̱ yya,
“A̱truk u ba yin hywat i
a̱ maai san cet, bu shya, bu a̱za̱ncyi, bu cet, bu dityok, bu shii!
Zi ku kok ntong i bu ku dyep!”
13N hok kozan kyang a Ka̱za ka krok i, Tazwa bu ka̱sa ka bu ka̱yabyen ka, sa̱rei bu nkyang a shyi a a̱yuywu ba̱shekwot i, sa̱rei kozan kyang ku bvom yya,
“Zi gwai a̱tuba nu a̱ swrang a a̱ntwam dityok u ni bu A̱truk u,
dityok bu shii bu cet yet nnuu ni
har a̱ba̱da abadin!”
14Nkyang sso iya i shim i hywa “Amin!” Wwon ba̱nekwo ba a̱ ta̱kwut a̱ ku sook ntong.
Currently Selected:
Pfong Ka̱za 5: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
