Luka 6
6
Ba̱ryat ka̱tuk A̱sa̱ba̱t
(Matta 12:1-8; Markut 2:23-28)
1Ka̱tuk A̱sa̱ba̱t ka̱yaan, nom pfwi ba̱nyet Yahuda na yemi, Yesu bu na̱won pfong nu na ba cong a̱ si nwa i ka̱byen yak a ban yei alka̱ma ni. Na̱won pfong a a̱ nwa pfut alka̱ma nu a̱ ya. 2Ba̱nyet Ba̱farisa ba̱yaan a̱ hywa, “A̱nzan a̱n byyi yin yya kyang a Truwang njit zi tyong yya ka̱tuk A̱sa̱ba̱t ni?”
3Yesu a̱ hywa da̱ mba, “Yi si wu ka̱n twang kyang a Dawuda bu ba̱nyet ka̱cyet nu ba ba yin yya ka̱ram ka ba yin hok cihywat a ni e? 4Dawuda a̱ nwa i bat Ka̱za na a̱ si sook kyangya na ba wrak Ka̱za ni, a̱ ya a̱ bvat a̱ nang ba̱nyet ka̱cyet nu ba. Ma Truwang njit ji n bvwo a̱yin a̱ ya kyangya iya, seko bu ba̱gado Ka̱za bamba.”
5A̱ si bo hywa da̱ mba, “Nzuk Ka̱won A̱neywu n yet A̱ntyok Ka̱ryi A̱sa̱ba̱t u.”
Yesu a̱ creng a̱ntyok a̱ta̱kwu mbvak
(Matta 12:9-14; Markut 3:1-6)
6Ka̱tuk A̱sa̱ba̱t ka̱yaan Yesu a̱ si nwa zzek i bat a̱duwa na ba yin yei sinagog u ni. A̱yanyet a̱ yin shyi ka̱ yemi, bvak yak a yin kwu. 7Ba̱malam Truwang ba̱yaan bu ba̱nyet Farisa ba̱yaan a̱ ma̱ yin shyi. Ba shyi i ku cam ba̱rurwok a̱ cat hywak a ba nin ku pyyem ni. Ba tot a̱ ryi ki a̱ ni creng a̱yin ka̱tuk A̱sa̱ba̱t ka. 8Ma Yesu a̱ bvwo a̱huhwa mba nu sa̱rei, a̱ yei a̱ntyok a̱ta̱kwu mbvak u a̱ hywa da̱ nu, “Wruk sseng kyi a̱ta̱ssi koyan!” A̱ntyok a̱ywu a̱ ta̱za a̱ si sseng ka̱ yemi. 9Yesu a̱ ba̱ zzim, “A̱nzan Truwang ji zi cat zi yya ka̱tuk A̱sa̱ba̱t ka? Zi yya a̱tsatsak, ki zi yya a̱ka̱tuk? Zi san sso, ki zi hywat sso?” 10A̱ brak a̱ ba̱ cyang a̱ krang sa̱rei a̱ hywa da̱ a̱ntyok a̱ta̱kwu mbvak u, “Neyak bvak nwan na.” Na̱ neyak bvak a ku creng.
11Ndya ba̱nyet Farisa na bu ba̱malam Truwang ba i byyan, ba nwa ya zzim kyang a ba ni yya Yesu mi ni.
Yesu a̱ tssa ba̱pfong swak bu ba̱hwa
(Matta 10:1-4; Markut 3:13-19)
12A̱zi nom iya Yesu a̱ wrak a̱ nat tazwa ntsok a̱ si tyak ka̱tuk ka, na̱ yya a̱duwa a̱ naai Ka̱za. 13Ka̱ntson a̱ wo tat na̱ yei ba̱nyet ba a̱ ku tssup ni a̱n tssa ka̱yat mba ba̱nyet swak bu ba̱hwa, a̱ ba̱ yei ba̱pfong. 14A̱yiyrek mba na: Siman a̱ bo yin ku yei Bitut, Andrawut a̱wumba Siman nu, Yakubu, Yohana, Filibut, Batalomi, 15Matta, Toma, Yakubu a̱hwai Alfayat, Siman nu ban yei a̱ntyok nswam ba̱nyet nu, 16Yahuda a̱hwai Yakubu, bu Yahuda Iskariyoti, nu a̱mi a̱ yin cong a̱ bu ryap Yesu.
Yesu a̱ zzek a̱ bo creng ba̱nyet
(Matta 4:23-25)
17Na̱ bu kyrek bu ba̱pfong ba nyyai tazwa ntsok ka a̱ sseng a a̱titaat ka̱byen bu ka̱tswa ba̱nyet ka a̱ yin ku tssup ni. Ba̱nyet ba̱gingang a̱ tung nyyai Urushalima bu sa̱rei ka̱byen ba̱nyet Yahuda, nta̱mak ka̱byen Sur bu Saida ka a̱ shyi ka̱nu kei bahar ka ni. 18Ba yin ba na̱ bu ba̱ zzek a̱ bo ba̱ creng nhywu mba na. Ba̱nyet ba a̱ sswa ka̱bvung ba̱ a̱ka̱tuk tswa ni a̱ ba na̱ bu ba̱ creng. 19Koyan a̱ kwan zwang ku byram, cet ku wwut da̱ nu creng ba̱nyet sa̱rei.
Ba̱gwai bu rya byyan
(Matta 5:1-12)
20Yesu a̱ cyang na̱won pfong nu na a̱ hywa da̱ mba,
“Nyin ba̱nyet dizot, yi shyi bu gwai
rot Dityok Ka̱za yet tinyiin.
21Nyin ba̱nyet swat cihywat, yi shyi bu gwai
rot yi ni shya diswak.
Nyin ba̱nyet ba shyi i ka̱nak ni, yi shyi bu gwai
rot ka̱tuk ka̱yaan yi ni mai.
22“Yi shyi bu gwai, ki ba̱nyet a̱ rak ya ryi, a̱ ya pfwei, a̱ bo ya trung a̱ka̱tuk a̱yiyrek, a̱zi hywak nzuk Ka̱won A̱neywu. 23Yi gyrep ba̱t i zzop hwwut, rot zang nyin ji Tazwa shii ba̱t. Ba̱tyyi mba ba a̱ yin yya ba̱rimi bu ba̱nyet tyyei ba̱ryat Ka̱za ba.
24“Ma nyin ba̱nyet nzwa, yi shyi bu ka̱bvung,
yi ka̱n tyak hok ansham nyin na.
25Kaito nyin ba̱nyet ba a̱ hyong diswak ba̱nyying ni,
cihywat ya bai.
A̱mi meyang nyin ba̱nyet shyi i dimrang,
yi ni kun i rywei mbvak ta̱sang.
26“Kaito nyin ba̱nyet ba a̱ shai dyep ba̱nyet ni. A̱mi ba̱tyyi a̱kwop mba ba ba yin dyep ba̱nyet ba a̱ yin bvei diraa i diyrek Ka̱za ni.”
Swat bu ba̱ra̱ndwan
(Matta 5:38-48; 7:12a)
27“Ma nyin ba̱nyet ba n pfong ni, kyang a n ya tyyei ni: yi gwai ba̱ra̱ndwan nyin; ba̱nyet ba a̱ ya rak ni yi ba̱ yya a̱tsatsak; 28ba̱nyet ba a̱ ya pfwei ni, yi ba̱ pfwa nda; ba̱nyet ba a̱ ya yya na̱kpot ni, yi ba̱ yya a̱duwa. 29Ka̱ a̱yin a̱ na̱ zzu i shok yring, bu ku brak yring a na̱ bo zzu. A̱yin nu a̱ na̱ sook a̱godo ni, ku ryok na̱ sook a̱tro nwan nu a̱nta̱mak. 30Koyan a̱ na̱ naai kyang, ryok n ku bvwo ba. Ka̱ a̱yin a̱ ma̱n san kyang nwan di cet, ryok ku tssup ba. 31Yi yya ba̱nyet i, ka̱sak ka yin cat ba ya yya mi ni.
32“Ki bu ba̱nyet ya gwai a̱mi yi ma̱n gwai, to, zang nzan yin byyi? Ko ba̱nyet a̱ka̱tukyya ma ba gwai ba̱nyet ba a̱ ba̱ gwai ni. 33Ki bu ba̱nyet ya yya ansham ba̱ mba yi ma̱ ba̱ yya mi, to, zang nzan yi nin shya? Ba̱nyet a̱ka̱tukyya ma a̱ ma̱n yya a̱mi. 34Ki bu ba̱nyet ba yi hwa ba ni maai ya tan ni yi ni ba̱ jyet kwap ji, to, zang nzan yin byyi? Ko ba̱nyet a̱ka̱tukyya ma a̱ na ya jyet kwap a̱ ga bu ssang cicrak. 35Ma nyin, yi gwai ba̱ra̱ndwan nyin i ba̱ yya a̱tsatsak. Yi wwat kwap i ryok n byyi rya se ba ya tan ba. Yi ni shya zang ba̱gingang i bu yet na̱won A̱gba̱dang A̱gwam, rot nu a̱ pfong dizot ba̱nyet byyai nkyang bu ba̱ka̱tuk ba̱nyet. 36Yi pfong dizot da̱ A̱tyyi nyin nu a̱ shyi Tazwa na̱n pfong dizot ni.”
Yi ryok yya ba̱yaan shirya ba
(Matta 7:1-5)
37A̱ bo hywa da̱ mba, “Ki yi yya ba̱yaan shirya ba, Ka̱za a̱ ma̱n ni ya yya shirya ba. Ki yi tyei ba̱nyet a̱bvun ba, Ka̱za a̱ ma̱n ni ya tyei a̱bvun ba. Ki yi kaai wwon ba̱nyet ba a̱ ya yya a̱bvwun ni, Ka̱za a̱ ma̱ ya kaai a̱ wwon. 38Ki yi wwat ba̱nyet, Ka̱za a̱ ma̱n ni ya ryi a̱ kpo tyyit a̱n tyyi nhywat ku zzwam. Rot kyang a yi mai ba̱nyet ba mi ni nkpa Ka̱za ka nin ya mai i.”
39A̱ bo ba̱ zzim a̱za̱n gan a̱ hywa, “Yi ka̱n dyi a̱ntyok a̱tutwan na̱ kwak a̱yaan shan o? Se ba si kwei i bvong ba̱sa̱rei mba. 40Ka̱won makaranta a̱ ka̱n da̱u malami nka ba; ma ki ka tyak makaranta nka nuyya shirya ba. Ki yi tyei ba̱ny, ka ni ba ba̱cicrak bu malami nka nu.
41“A ni yya ni n cyang ka̱bacincong kon ka a̱ kpa i dissi a̱wumba nwan ni, da̱ nwan ba kula bu dikum kon ti shyi i dissi nwan ti ni ba. 42Ka ni yya ni n hywa da̱ a̱wumba nwan nu, ‘Tyyi n na̱ tun kyang a kpa i dissi nwan ti ni,’ da̱ nwan ba yen dyi dikum kon ti shyi i dissi nwan ti ni ba? Ha̱ba̱, a̱ntyok tyong a̱ssi ba̱nyet! Yen yet ka̱son tun dikum kon ti shyi i dissi nwan ti ni, i gi maai ryi cincong kon ji shyi i dissi a̱wumba nwan ti ni.”
Ka̱kon bu disum nka
(Matta 7:16-20; 12:33-35)
43“A̱tsatsak ka̱kon a̱n sum a̱ka̱tuk disum ba, da̱ a̱ka̱tuk ka̱kon na̱n sum a̱tsatsak disum ba. 44Rot ba na bvwo kozan ka̱kon i disum ti ka sum ni. Ba ka̱n kpyei a̱bvap i ka̱jyim ba, di ba ka̱n kpyei a̱lemu a a̱tyin a̱shyim ba. 45A̱tsatsak a̱yin a̱ wwut da̱ a̱tsatsak nkyang nyyai ka̱yat mpfwa nu ka; a̱ka̱tuk a̱yin a̱ ma̱n wwut bu a̱ka̱tuk nkyang nyyai ka̱yat mpfwa nu ka.”
Na̱tsan dinok na̱hwa
(Matta 7:24-27)
46A̱ bo hywa da̱ mba, “A̱nzan a̱n byyi yi ni n yei ‘Malam’, da̱ nyin ba wu yya nkyang a n ya tyyei ni ba? 47A̱yin nu a n tssup a̱ bo pfong ba̱ryat nzuk ba ni n ni ya tyyei kyang a na̱ yet ni: 48a̱ ryi di a̱yin nu a̱ naat nok ka̱ryi a̱ rung ka̱byen ka a̱ si sin tuk dinok ti an kpang ni. Ka̱ram ka ba̱shekwot ban wruk ni, a̱ si vum ka̱ryi ka; ma ka̱ryi ka a̱ kpa ba, rot ba yin ka̱ tuk a̱tsatsak tuk. 49Ma a̱yin nu a̱ pfong ba̱ryat nzuk ba ni a̱ rak ba̱ san a̱ sak i rya ni, taka̱i a̱yin iya a̱ ryi di a̱yin nu a̱ naat dinok a̱ rak tuk dityin dinok ti ni. Ka̱ram ka za zin bvwa ba̱shekwot a̱ wruk ni i si kup ka̱ryi ka, ka nat a̱ si kpa bururum!”
Currently Selected:
Luka 6: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.