Yakubu 4
4
Dirywai bu ka̱sa
1A̱nzan a̱ ya cong di zwang bu zok? Rot cat hok ansham nyin na nyyai ka̱yat ndya nyin ka ni, nkpa kwak zwang ka̱yat nyin kozan ka̱ram. 2Nkyang n shyi yi cat, ma yi na̱ shya ba; rot a̱mi yi cat ryen hywaai. Nkyang n shyi yin tyyi rya ni shya, da̱ nyin ba shya ba; rot a̱mi yi nwa zok bu zwang. Nkyang a yi cat i yi na̱ shya ba, rot yi naai Ka̱za ba. 3Ka̱ram ka yi naai ni yi san ba, rot yi byyi a̱ka̱tuk; yi naai i gin hok ansham a̱ccu nyin. 4Nyin di ba̱nyet kan-a̱naan ni, yi bring da̱ a̱yin nu a̱ cat ya byyi bu ka̱sa ka ni a̱ nwa dira̱ndwan bu Ka̱za a? Rot koyan a̱ cat ya byyi bu ka̱sa ka, seko na̱ ya byyan bu Ka̱za. 5Ryok sook ba̱ryat Ka̱za ba ba yet diraa ba ba hywa, “Ka̱za a̱ cat zi ka̱ ryi ndya njit a, a̱ pfong swam ki zi tyyi ndya njit a ka̱rek ka̱yaan.” 6Ma za̱nang Ka̱za ji i ra̱u tyyi ndya njit a. Da̱ni di ba̱ryat Ka̱za ba ban hywa ni,
“A̱yin nu a̱ yet diccu nu ni Ka̱za a̱ na ku rak i;
ma a̱yin nu a̱ ywwai diccu nu ni, za̱nang Ka̱za yet nnu.”
7Rot a̱mi, yi wrak Ka̱za a̱ccu nyin na. Yi rak a̱gwam a̱ka̱tuk tswa, i ryi na̱ tyong a̱ ya wwon. 8Yi shek shishrek bu Ka̱za, ka ma̱ shek shishrek ba̱ nyin. Yi tssu mbvak nyin na, nyin ba̱nyet a̱ka̱tukyya! Yi ryang ndya nyin na, nyin ba̱nyet ka̱tswa a̱huhwa! 9Se yi hok dizot a̱ccu nyin, i hok rya byyan, i kun; dimrang nyin ti i tyyi rya byyan, rya sai nyin na i brak tyyi ndyen! 10Yi ywai a̱ccu nyin ka̱bvwa A̱gwam Ka̱za, na̱ ga ya yrek.
Byat ba̱yaan
11Ba̱wumbeyang nzuk, yi ryok byat ba̱yaan ba. A̱yin nu a̱ byat a̱wumba nu ni ko a̱ ku yya shirya ni a̱ shyak bu a̱tuba nu a̱ byat Truwang ji ni ba. Rot a̱yin nu a̱ byat Truwang ji ni a̱ za̱ tssup ba, ma a̱ za̱ yya shirya. 12Ka̱za ba̱diyin a̱mi a̱ yet a̱ntyok wwat Truwang nu, nu a̱ bo yet a̱ntyok shirya nu. Nu ba̱diyin a̱ maai san ko na̱ byyan. Nwan a̱nyan ni yya ba̱yanyet shirya?
Ba̱nyet cin a̱ccu mba
13Yi cyang, nyin ba̱nyet ba na hywa, “Ka̱pfun ko ka̱ntson zi naat a̱gba̱dang ka̱nkrang, i si tyak dirya i yya za i shya krum ba̱gingang.” 14Yi bvwo kyang a yi wu yet ka̱ntson ni ba. Yi ryi di bvwu ni, nji ki ba za̱ ryi ma-mang ba zi ta̱wai. 15Kyang a myim yi hywa ni nkpa yet, “Ki Ka̱za a̱ shim a̱ za ryi sso zi ni yya nga̱ma bu nga̱ma.” 16Ma nyin ba ya yet, yacin. Kozan taka̱i yacin yet ka̱ywap.
17Seko yi bvwo, a̱yin nu a̱ bvwo kyang a myim na̱ yya ni a̱ rak kpo yya na, a̱ nwa a̱ka̱tukyya.
Currently Selected:
Yakubu 4: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
