1 Bitut 1
1
1Wasika a̱ni a̱ nyyai da̱ nzuk Bitut, a̱pfong Yesu Kristi, a̱ naat di ba̱nyet ba Ka̱za ka tssa ni, ba̱nyet ba ba ta̱tsrang a̱ rot a̱ hwwei a̱ nwa na̱byen Fantat bu Galatiya bu Kafadokiya bu Asiya bu Bitiniya, 2ba̱nyet ba Ka̱za A̱tyyi njit ka bvwo nyyai gba̱gbang mba ka tssa di bvwo nka. Ba̱nyet ba Tswa Ka̱za zi gang tun ba tssup ba̱ryat Yesu ba ni a̱ bo shya jrang i ba̱sok nu ba.
Ka̱za a̱ ya wwon nda bu myyi rya ba̱gingang.
N breng rya na yet a̱cet i
3Zi dyep Ka̱za mi, a̱tuba nu a̱ yet Ka̱za a̱ bo yet A̱tyyi A̱gwam njit u Yesu Kristi ni. Rot a̱gba̱dang pfong dizot nu nu a̱mi na̱n za ryi a̱hwai sucet i ka̱sak ka na̱n yrek Yesu Kristi nyyai yabyen ni. Ku tyyi n breng rya na zin breng a nu ni ku swat yet ba̱ a̱cet. 4Rot a̱mi zi tyyi a̱ssi njit a i san digado ti Ka̱za ka sak ba̱nyet nka ba mi ni. Digado iya ba ya sak da̱ nti Tazwa ka̱bvwa ka ti nin bwi ko ti byyan, ko ti hwwi ni ba. 5Ka̱za a̱ ya cam ka̱yat cet nka rot yi wrak ka̱ryong. Ka ni ya ryi sucet a ba sak a̱ ni tyyei a a̱ngbom ka̱ram u ni.
6Se yi gwai a nkyang ani, ko kun yet dolet yi yen sswa ka̱bvung ba̱nyying ni rot a̱duniya ka̱me nu yi nwa ni. 7Ka̱me kani a̱ yet ka̱nying bvwo i tyyi rya nyin na yet nying ka̱ryong. Ko zinariya kyang a ni byyan ni ba na ku mak an dong; ba̱lle ka̱ryong nyin ka ka ra̱u zinariya nu ma, dolet ba ka̱ mak ka ga wruk a̱ sseng, yi gi bu shya dyep bu shii bu dityok ka̱tuk ka Yesu Kristi na̱ nin brek ni. 8Ko yi ka̱n ku ryi ni ba, ma yi ku cat. Ko yin ku cyang nani ni ba, ma yi ku ryi ndya nyin na, i ku gwai, ba̱gwai ba a̱ seyak ka̱bvwa ryat i, da̱ni di gwai a nyyai Tazwa ni, 9rot i hywak iya a̱mi yi nssang sso nyin ji, nkpa a̱mi yet zang tyyi ndya nyin ji.
10Ba̱ryat sucet bani a̱mi ba̱nyet tyyei ba̱ryat Ka̱za ba ba yin ka̱ tssup a̱ zzim a̱ bo tyyei ka̱sak ka Ka̱za ka nin ya tom di za̱nang nka ji ni. 11Tswa Kristi ji yin shyi ka̱yat mba ni yin ba̱ tyyei ka̱bvung Kristi ka bu shii a ri bai ni, ba kwan a̱ bvwo ka̱ram ka nkyang ani na nin ba ni. 12Ka̱za a̱ yin tyyei ba̱pfong iya ba bvwo pfong a ba yin yya ni ba yin yya a̱ccu mba mi ba, ma ba yin yya a̱zi hywak nyin. A̱mi ba yin dyat tazwa nkyang ka yi huhok ani ni di ba̱nyet ba a̱ ya tyyei Ka̱sham Ba̱ryat ka ni. Ba yin tyyei ka̱yat cet Tswa Ka̱za ba tom nyyai Tazwa. Ba̱pfong Ka̱za ma ba cat bvwo nkyang ani.
Ba za yei zi swat a̱zizrak swat
13Rot a̱mi se yi ya rop i sseng di cet i tyyi ndya nyin sa̱rei a ka̱nu-a̱tan nu Ka̱za ka ni ya ryi ka̱ram ba Yesu ka ni. 14Yi tssup Ka̱za i ryok wwon ndya nyin na i tssup nkyang a yi yin cat ka̱ram ka yi yin yet ba̱gbyik ba̱nyet ni ba. 15Kozan kyang yi yya, seko yi yya ba̱ a̱zizrak ndya, da̱ni di Ka̱za ka a̱ ya yei ni kan yet a̱zizrak ni. 16Ba̱ryat Ka̱za a̱ hywa, “Yi ni yet ba̱zizrak, rot nzuk n yet a̱zizrak.”
17Ki yi yya a̱duwa yi na ku yei A̱tyyi, nu a̱mi a̱ yya sa̱rei shirya ba̱cicrak, ba̱cicrak bu kyang a koyan na̱ yya ni. Rot a̱mi kpikpit ka̱ram a yi ri bvat i ka̱sa ka ni yin ku tyong. 18Rot yi bvwo zang ji ba tan a̱n ya san a̱ tun a a̱ka̱tuk swat u yi bu shya di ba̱tyyi nyin ba ni. Ku yet kyang a tyyai shok nkpa ni da̱ni di zinariya bu a̱zurfa ni ba. 19Ba yin ya san a̱ wwon di ba̱sok Yesu ba a̱ byyi tsada ni, nu a̱mi a̱ yin dyi di bvon-tsaap ji sang huhwuk i. 20Nu a̱mi Ka̱za ka tssa nyyai ba ka̱n yya ka̱sa ka ba, a̱ wruk da̱ nu a a̱ngbom nom u a̱zi hywak nyin. 21Nu a̱mi a̱ yet ryen na yin wrak Ka̱za ndya nyin na ni, nka a̱mi a̱ ku shyek nyyai a̱yabyen ka a̱ ku ryi shii; rot a̱mi yi wrak ka̱ryong di Ka̱za i bu tyyi ndya nyin na a nka.
22Da̱ni naani yin tssup ba̱ryat ka̱ryong ba, nkpa n byyi ban ya tssu yi shya gwai ba̱yaan di ka̱ryong. Yi cat ba̱yaan di ka̱ryong bu rya yring. 23Rot ba̱ryat Ka̱za ba a̱ yet a̱cet i di ba byyi tyak ni ba, ba bo ya tyei di na̱won A̱tyyi nu a̱ ni wi kwu ni. 24Da̱ni di ba̱ryat Ka̱za ban hywa ni,
“Sa̱rei ba̱nyet ba a̱ ryi di ba̱pyyi ka̱yit i,
shisham mba ji i ryi di nkpyat ni.
Ba̱pyyi ba a̱ na shyik, nkpyat a ta̱kwut weyang,
25ma ba̱ryat Ka̱za a̱ sseng har a̱ba̱da.”
Ba̱ryat bani mba yet Ka̱sham Ba̱ryat ka ba yin ya tyyei ni.
Currently Selected:
1 Bitut 1: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
