Bilangan Uram 10
10
Keil perak aryi buu ena si trompet kiknibmai uram deyok
10:1-10
1Er Iya Erebdobnyi biryi Musa bisi ato ebmou, 2“Buu ena si trompet bitinyi keil si perak aryi kiknibdum. Ara, sun Israel ninyi nabkwamaminyi ab, anabdobkwamamunyi ab ati uram buu ebkwandim. 3Bok, a trompet bitinyi nirya aryi buu ebminyi ura, sun Israel ninyi nirya ara Ni ai Kemah Suci ai bisik bublan dam buluryankwanung. 4Bok, tentok buu ebminyi ara ninyi talen sien nang kan dam buluryankwanung. 5Ba, trompet aryi yuma seklo-seklo buu ebminyi ara yaletam keis ol ai dobmangnyi yala ninyi, sun keis ol ai dakoka bobingnyi ura, anabdobkwanung. 6Ba, liki bitinyi dinyi seklo-seklo buu ebminyi ara me youkwetam keis ol ai dobmangnyi yala ninyi anabdobkwanung. Ara, trompet aryi seklo-seklo buu ebminyi ara sun Israel ninyi nirya anabdobkwanung. 7Bok, trompet tentok aryi senglona kum uca weikanun buu ebminyi ara Israel ninyi nirya Kemah Suci ai bublan dam bulubkwanung.
8Ba, a trompet buu ebkwaming nang ara Harun mabwe imam nang aryi buu ebkwanung. A buu ena ati yan memen uram ebman ara iya mabwe odei-odei binkwaminga nirya kunubde binkwaming. 9Ani, sun Kanaan mutuk wengbinkwamunyi ati sun mar ordan nang weikanun iyangasingnyi ura, a buu ena aryi buu ebkwandarur. Ba, Ni Iya Erebdobnyi, sun molonindarurnyi biryi sun mar bon nang dam aryi yandoka lebdeibkwansunun. 10Ani, sun weik kwalina kwalibmamunci, mot seboka kimamunyi tum ababyi ara buu ebkwandarur. Ara, ukuryok wala wengbinmamunyi tum ab, yuk weik uki tum bisam lembu kum, domba kum oboka Niti dama deibmanumunci, uk dabmamunyi tum ab aryi buu ebkwandarur. Ani, sun bisam boyandoka Niti dama deibmanumunyi ura, nong nirya uk dabmamunyi tum ab, sun, ‘Nun malyi kun dinyi kilibsute,’ tenen Imtamnyi ab antanirdana ati bisam boyandoka Niti dama deibmanumunyi uk tum ab, a dama deibmamunyi dinyi tonkwa yibmamunyi tum ab asi buu ebkwandarur. Ato kubmunyi ura, Ni Imtamnyi biryi sun malyi kun dinyi lebdobkwansin. Ni Iya Erebdobnyi sun Molonindarurnyi biryi ebman,” ebmou. Ato kuboka Musa bisi ebdeibmou.
Israel ninyi Sinai mutuk kon dam aryi anabdobmai uram deyok
10:11-36
11Mesir mutuk aryi anaboka yangaramnyi ani kwalina bitinyi kimbinmouci, wala bitinyi kuboka uki nungna 20 baryi tum berekmou. Ura, duwa bum Kemah Suci ai dub aryi anabdobmou. Ara, Er Imtamnyi biryi, “Ukubdarur-ukuna mem,” en uram deirin ai aryi anabdobmou. 12Ura, sun Israel ninyi yini mutuk Sinai dam aryi anabdobmai. Ara, Er Iya Erebdobnyi biryi yan memebdeiamwe to kuboka anabdobmai. Ura, a mutuk bini-a mutuk bini baramnyi ani, a duwa bum ara yini mutuk si Paran dam bindoka tiklobmou. 13A kubmou to ara yuma kobdob aryi Er Iya Erebdobnyi biryi Musa dam ebdeibmou to kuboka sun Israel ninyi kunubmai. 14Yuma kobdob ara Lewi yala nang mikbaryi aryi Er Imtamnyi biryi, “Ukubdarur-ukuna mem,” en uram deirin co sangkol boboka menengnamnyi. Ura, Israel yala nang nirya baramnyi nang yuma menekoka baramnyi nang ara Yehuda yala nang menekoka sun aling kwilila boboka baramnyi. A yala sienyi kiamunyi bira Aminadab mi si Nahason sienyi kibmou. 15Ba, Zuar mi Netaneel biryi Isakhar yala nang sienyi kibmou ura, sun aling kwilila boboka menengnamwe. 16Ba, Helon mi Eliab biryi Zebulon yala nang sienyi kibmou ura, sun aling kwilila boboka menengnamwe. Ba, Zebulon yala nang aminda tingnamnyi. 17Sirya ukubmai ura, Kemah Suci ai dakmai. Ba, a keis ol ai ara Lewi yala nang bok Gerson yala nang ab, Merari yala nang ab aryi boboka anabmai. 18Ura, Ruben yala nang anabmai. Ba, Ruben yala nang sienyi bira Syedeur mi si Elizur biryi Ruben yala aling kwilila boboka menekmou. 19Ba, Simeon yala nang boboka menekmou sienyi bira Zurisyadai mi si Selumiel biryi Simeon yala aling kwilila boboka menekmou. 20Ba, Gad yala nang sienyi bira Rehuel mi si Elyasaf kiamwe. Ura, sun yala aling kwilila boboka Gad yala nang menekmou. 21A sirya ura, Lewi yala nang bok Kehat yala nang anabmaici, Kemah Suci ai bona-bona, beterdongona kum dinyi bobmai. Kehat yala nang bisik dam banman talak ara yuk Lewi yala nang Gerson yala nang ab, Merari yala nang ab aryi mabkwamangnyi mutuk minob Kemah Suci ai doramnyi. 22A nang sirya anabni ura, sun dam ara Efraim yala nang anabmai. Efraim yala nang ara Amihud mi Elisama biryi Efraim yala aling kwilila boboka menekmou. 23Ba, Manasye yala nang sienyi bira Pedazur mi si Gamaliel kiamuryi, bobde menengnamwe. 24Ba, Benyamin yala nang ara Gideoni mi si Abidan biryi sienyi kiamuryi, bobde menengnamwe. 25Aminda kobdob dangdoramnyi yala nang ara sun yala aling kwilila Dan yala nang baramnyi. A yala nang sienyi kiboka bomenengnamunyi bira Amisyadai mi si Ahiezer biryi boboka menengnamwe. 26Ba, Asyer yala nang weik sienyi kiboka bomenengnamunyi bira Okhran mi si Pagiel boboka menengnamwe. 27Ba, Naftali yala nang weik sienyi kiboka bomenengnamunyi bira Enan mi si Ahira biryi boboka menengnamwe. 28Ato kuboka Israel ninyi sien nang aryi sun yala yuk-yuk ninyi taleboka-taleboka baramnyi. A kubmai to akwe sun Israel ninyi anabkun ura, iya ukuboka baramnyi.
29Ura, Musa biryi er ka Midianyi Rehuel mi si Hobab bisi ato ebmou, “Er Iya Erebdobnyi biryi Israel nang ati uram talak ebdeibwe teleb mutuk wengbinkwayeb. Ati, kanda nun ab tonkwa bibyi ura, nunci kansi teleb akwe kubdeibkwankib,” ebmou. 30Uca, er ka Hobab biryi ato ebmou, “Ni sun ab tonkwa kum binkwamab, eda ni atei tamurbiniryi ni yala nang asi bindobkwaman,” ebmou. 31Uca, Musa biryi ato ebmou, “Kanda yini mutuk nun ai dobnin binkwayeb dikum ara nirya bingdum. Ani, kanda nun binkwayeb bisik bobde menengsinanyi kibkwandim. Ati, kan nunsi deibloboka basina mem! 32Kan nun ab tonkwa binkwayebyi ura, Er Iya Erebdobnyi biryi teleb dinyi karesurur to kanbabyi nunci telebto akwe kubkwankib,” ebmou. 33Ura, sun Israel ninyi aryi mutuk kon Sinai, Er Iya Erebdobnyi kuramwe ai aryi anabdobmaici, uki winiryi nirya barmururamnyi. Ba, a barmururamnyi karin ara Er Iya Erebdobnyi biryi, “Ukubdarur-ukuna mem,” ebdeiamwe co sangkol aryi boboka menengnamwe. Ara, sun Israel ninyi mabkwaman ai ati Er Iya Erebdobnyi biryi ingkirikde menengnamwe. 34Ba, Israel nang a doboka mabman ai akiryi anabdobkun ura, Er Iya Erebdobnyi duwa bum ara sun deici binkwamanto kuboka banmai. Ba, kitingtam nirya ara sun dam bobde menengnamwe.
35Bok, a duwa bum asi anabnaryi, Lewi yala nang aryi Er Iya Erebdobnyi co sangkol erebdobni ura, Musa biryi ato ebmou, “Nai Iya Erebdobnyi, nunci Kan mabwe aryi Kan mikib ati dib tenenub. Ati, Kan tikokminci, Kan mar ordan nang sunsi bokwalwalabdeibdum. Ba, Kansi li tenekunung ninyi nirya ara Kan dam akiryi cungbindobkwaming,” ebmou. 36Ba, a duwa asi tiklobni ura, Musa biryi ato ebmou, “Nai Iya Erebdobnyi, Kanci sun Israel weika yubwa-yubwa 1.000 baryi ninyi ati tamuryanmarimci, nunsi kalikmasirim,” ebmou.
Currently Selected:
Bilangan Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
Bilangan Uram 10
10
Keil perak aryi buu ena si trompet kiknibmai uram deyok
10:1-10
1Er Iya Erebdobnyi biryi Musa bisi ato ebmou, 2“Buu ena si trompet bitinyi keil si perak aryi kiknibdum. Ara, sun Israel ninyi nabkwamaminyi ab, anabdobkwamamunyi ab ati uram buu ebkwandim. 3Bok, a trompet bitinyi nirya aryi buu ebminyi ura, sun Israel ninyi nirya ara Ni ai Kemah Suci ai bisik bublan dam buluryankwanung. 4Bok, tentok buu ebminyi ara ninyi talen sien nang kan dam buluryankwanung. 5Ba, trompet aryi yuma seklo-seklo buu ebminyi ara yaletam keis ol ai dobmangnyi yala ninyi, sun keis ol ai dakoka bobingnyi ura, anabdobkwanung. 6Ba, liki bitinyi dinyi seklo-seklo buu ebminyi ara me youkwetam keis ol ai dobmangnyi yala ninyi anabdobkwanung. Ara, trompet aryi seklo-seklo buu ebminyi ara sun Israel ninyi nirya anabdobkwanung. 7Bok, trompet tentok aryi senglona kum uca weikanun buu ebminyi ara Israel ninyi nirya Kemah Suci ai bublan dam bulubkwanung.
8Ba, a trompet buu ebkwaming nang ara Harun mabwe imam nang aryi buu ebkwanung. A buu ena ati yan memen uram ebman ara iya mabwe odei-odei binkwaminga nirya kunubde binkwaming. 9Ani, sun Kanaan mutuk wengbinkwamunyi ati sun mar ordan nang weikanun iyangasingnyi ura, a buu ena aryi buu ebkwandarur. Ba, Ni Iya Erebdobnyi, sun molonindarurnyi biryi sun mar bon nang dam aryi yandoka lebdeibkwansunun. 10Ani, sun weik kwalina kwalibmamunci, mot seboka kimamunyi tum ababyi ara buu ebkwandarur. Ara, ukuryok wala wengbinmamunyi tum ab, yuk weik uki tum bisam lembu kum, domba kum oboka Niti dama deibmanumunci, uk dabmamunyi tum ab aryi buu ebkwandarur. Ani, sun bisam boyandoka Niti dama deibmanumunyi ura, nong nirya uk dabmamunyi tum ab, sun, ‘Nun malyi kun dinyi kilibsute,’ tenen Imtamnyi ab antanirdana ati bisam boyandoka Niti dama deibmanumunyi uk tum ab, a dama deibmamunyi dinyi tonkwa yibmamunyi tum ab asi buu ebkwandarur. Ato kubmunyi ura, Ni Imtamnyi biryi sun malyi kun dinyi lebdobkwansin. Ni Iya Erebdobnyi sun Molonindarurnyi biryi ebman,” ebmou. Ato kuboka Musa bisi ebdeibmou.
Israel ninyi Sinai mutuk kon dam aryi anabdobmai uram deyok
10:11-36
11Mesir mutuk aryi anaboka yangaramnyi ani kwalina bitinyi kimbinmouci, wala bitinyi kuboka uki nungna 20 baryi tum berekmou. Ura, duwa bum Kemah Suci ai dub aryi anabdobmou. Ara, Er Imtamnyi biryi, “Ukubdarur-ukuna mem,” en uram deirin ai aryi anabdobmou. 12Ura, sun Israel ninyi yini mutuk Sinai dam aryi anabdobmai. Ara, Er Iya Erebdobnyi biryi yan memebdeiamwe to kuboka anabdobmai. Ura, a mutuk bini-a mutuk bini baramnyi ani, a duwa bum ara yini mutuk si Paran dam bindoka tiklobmou. 13A kubmou to ara yuma kobdob aryi Er Iya Erebdobnyi biryi Musa dam ebdeibmou to kuboka sun Israel ninyi kunubmai. 14Yuma kobdob ara Lewi yala nang mikbaryi aryi Er Imtamnyi biryi, “Ukubdarur-ukuna mem,” en uram deirin co sangkol boboka menengnamnyi. Ura, Israel yala nang nirya baramnyi nang yuma menekoka baramnyi nang ara Yehuda yala nang menekoka sun aling kwilila boboka baramnyi. A yala sienyi kiamunyi bira Aminadab mi si Nahason sienyi kibmou. 15Ba, Zuar mi Netaneel biryi Isakhar yala nang sienyi kibmou ura, sun aling kwilila boboka menengnamwe. 16Ba, Helon mi Eliab biryi Zebulon yala nang sienyi kibmou ura, sun aling kwilila boboka menengnamwe. Ba, Zebulon yala nang aminda tingnamnyi. 17Sirya ukubmai ura, Kemah Suci ai dakmai. Ba, a keis ol ai ara Lewi yala nang bok Gerson yala nang ab, Merari yala nang ab aryi boboka anabmai. 18Ura, Ruben yala nang anabmai. Ba, Ruben yala nang sienyi bira Syedeur mi si Elizur biryi Ruben yala aling kwilila boboka menekmou. 19Ba, Simeon yala nang boboka menekmou sienyi bira Zurisyadai mi si Selumiel biryi Simeon yala aling kwilila boboka menekmou. 20Ba, Gad yala nang sienyi bira Rehuel mi si Elyasaf kiamwe. Ura, sun yala aling kwilila boboka Gad yala nang menekmou. 21A sirya ura, Lewi yala nang bok Kehat yala nang anabmaici, Kemah Suci ai bona-bona, beterdongona kum dinyi bobmai. Kehat yala nang bisik dam banman talak ara yuk Lewi yala nang Gerson yala nang ab, Merari yala nang ab aryi mabkwamangnyi mutuk minob Kemah Suci ai doramnyi. 22A nang sirya anabni ura, sun dam ara Efraim yala nang anabmai. Efraim yala nang ara Amihud mi Elisama biryi Efraim yala aling kwilila boboka menekmou. 23Ba, Manasye yala nang sienyi bira Pedazur mi si Gamaliel kiamuryi, bobde menengnamwe. 24Ba, Benyamin yala nang ara Gideoni mi si Abidan biryi sienyi kiamuryi, bobde menengnamwe. 25Aminda kobdob dangdoramnyi yala nang ara sun yala aling kwilila Dan yala nang baramnyi. A yala nang sienyi kiboka bomenengnamunyi bira Amisyadai mi si Ahiezer biryi boboka menengnamwe. 26Ba, Asyer yala nang weik sienyi kiboka bomenengnamunyi bira Okhran mi si Pagiel boboka menengnamwe. 27Ba, Naftali yala nang weik sienyi kiboka bomenengnamunyi bira Enan mi si Ahira biryi boboka menengnamwe. 28Ato kuboka Israel ninyi sien nang aryi sun yala yuk-yuk ninyi taleboka-taleboka baramnyi. A kubmai to akwe sun Israel ninyi anabkun ura, iya ukuboka baramnyi.
29Ura, Musa biryi er ka Midianyi Rehuel mi si Hobab bisi ato ebmou, “Er Iya Erebdobnyi biryi Israel nang ati uram talak ebdeibwe teleb mutuk wengbinkwayeb. Ati, kanda nun ab tonkwa bibyi ura, nunci kansi teleb akwe kubdeibkwankib,” ebmou. 30Uca, er ka Hobab biryi ato ebmou, “Ni sun ab tonkwa kum binkwamab, eda ni atei tamurbiniryi ni yala nang asi bindobkwaman,” ebmou. 31Uca, Musa biryi ato ebmou, “Kanda yini mutuk nun ai dobnin binkwayeb dikum ara nirya bingdum. Ani, kanda nun binkwayeb bisik bobde menengsinanyi kibkwandim. Ati, kan nunsi deibloboka basina mem! 32Kan nun ab tonkwa binkwayebyi ura, Er Iya Erebdobnyi biryi teleb dinyi karesurur to kanbabyi nunci telebto akwe kubkwankib,” ebmou. 33Ura, sun Israel ninyi aryi mutuk kon Sinai, Er Iya Erebdobnyi kuramwe ai aryi anabdobmaici, uki winiryi nirya barmururamnyi. Ba, a barmururamnyi karin ara Er Iya Erebdobnyi biryi, “Ukubdarur-ukuna mem,” ebdeiamwe co sangkol aryi boboka menengnamwe. Ara, sun Israel ninyi mabkwaman ai ati Er Iya Erebdobnyi biryi ingkirikde menengnamwe. 34Ba, Israel nang a doboka mabman ai akiryi anabdobkun ura, Er Iya Erebdobnyi duwa bum ara sun deici binkwamanto kuboka banmai. Ba, kitingtam nirya ara sun dam bobde menengnamwe.
35Bok, a duwa bum asi anabnaryi, Lewi yala nang aryi Er Iya Erebdobnyi co sangkol erebdobni ura, Musa biryi ato ebmou, “Nai Iya Erebdobnyi, nunci Kan mabwe aryi Kan mikib ati dib tenenub. Ati, Kan tikokminci, Kan mar ordan nang sunsi bokwalwalabdeibdum. Ba, Kansi li tenekunung ninyi nirya ara Kan dam akiryi cungbindobkwaming,” ebmou. 36Ba, a duwa asi tiklobni ura, Musa biryi ato ebmou, “Nai Iya Erebdobnyi, Kanci sun Israel weika yubwa-yubwa 1.000 baryi ninyi ati tamuryanmarimci, nunsi kalikmasirim,” ebmou.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)