Ruth 1
1
Ruth mu Naomi Nie Dze
1Thiedzü capiko bu mha kekhakecü teiki, rüna nu pekrie vorta, sitse Juda nu Bethlehemmia puoe puo kimia mu puo nuo thepfumia kenie sa di Moabmia kijü nu vo di lhou tuota. 2Siro themiau za Elimelek, puo kimia za Naomi, siro puo nuo thepfunie za Mahlon mu Kilion; ukoe Juda nu Bethlehem nunu kevor Efratmia. Mu ukoe Moabmia rüna nu vo di sünu lhou bata. 3Derei Naomi nupfu Elimelek siata, sidi Naomi bu puo nuonie ze themita. 4Tsiu unie Moabmiapfü lie phrelie; miapfü puo za Orpa mu kekreipfü za Ruth. Derei uko teicie ker sünu bakelie sie, 5Mahlon mu Kilion unie rei siata, sidi Naomi-e puo nuonie mu puo nupfu rei tuo mota di lhou.
6Siro puoe Moab kijü nu keba ki Jihovae kecüca pelhoupie puo themiako tsüshü bata ükecü sishü tse, puo miepfünie ze di puo rüna nu la votatuoü dojülie. 7Sidi puoe puo miepfünie ze di uko lhou keba rünau nunu tuota, mu ukoe Juda kijü nu votatuo üdi cha nu vozhü. 8Ru Naomi-e puo miepfünie ki, “Nnie kenienie rei nnie zuonuo ki la votacie, nnie kesiamia gei, tsiu a gei chükeshü tuoi Jihova bu nnie gei tseiüvishülie. 9Siro Jihova bu nnie mia puopuokecü gei nnie nupfunuo kekrei kinu kerülei khashükelieu chüliecie.” Sidi puoe unie meboshü tse, unie krakhouita. 10Sidi unie sie puo ki, “Mo, hienie n ze n themiako ki votatuolie.” 11Sirei Naomi-e sie, “Lata zoyi, a nuopfünie, nnie kiüdi a ze votieya mu? Nnie nupfunuo chülieketuo a va nu thepfumia ba saluoü memu? 12Lata zoyi, a nuopfünie, nnie thuo nnie kitsa la votayi, u nupfunuo puo nyi laketuo la we a tsathorte. Mhanuü ae kemerü baluo ücü lesie zo rei, mu mhanuü tsiezhü a nupfu nyilie di thepfunuomia penuolie zo ürei; 13nnie unie zha siekelie pfhelietuo üdi nyü? Nnie nyhü mo di sünie pfhe balietieya ünyü? Mo zolie, a nuopfünie sizomonyü nnie la a noukemezhiekuote, kekreilamonyü Jihova dzie-e sie a petsou baketa la.” 14Sitse unie pfhephra di krakhoui lata, süsie Orpae puo niapfü meboshü derei Ruth we puo siemedzita.
15Sirei Naomi-e sie puo ki, “Harie, n siezepfüe puo themia mu puo rhuoko ki la votazhie; mu no rei n siezepfü medzi votayi” sita. 16Derei Ruth-e sie,
“A bu n khawanu morei n siemedzi hienu a ketshü sa hietacie!
No kirapuo votuo shi, a rei süra vo zotuo;
tsiu no kirapuo batuo shiü, a rei sünu ba zotuo,
n themia pie a themia chütuo,
tsiu n Kepenuopfü pie a Kepenuopfü chü zotuo.
17No kirapuo nu siatuo shiü,
süra nu a rei siatuo,
mu süra nu a khru zotuo.
Kesia thuo n kinu a chükhowa zotuoü moro,
Jihova bu sükemhiei tsiu sü kezie rei chüpie a gei shü üthienyü.”
18Ruth-e puo ze vota zotuoü le terütakecü Naomi ngushü tse, puoe mha pu sa mota.
19Sidi unie-e Bethlehem nu tsolie kemochie tuo zo vor. Tsiu unie Bethlehem nu vorlie tse, rüna nu themia pete unie dze kepu bouta; sidi thenupfükoe sie, “Hapfüha Naomi zo memu?” 20Sitse puoe uko ki,
“A üse Naomi ü#1:20 Süu U kenei. sa hietacie,
a üse Mara#1:20 Süu Kepfhü. üliecie,
kekreilamonyü Kekuotho-u#1:20 Ibri nu Shaddai idi se vor. a bu kemezhie hi vorte.
21A ketshu chü di pra,
derei Jihova a bu methuo di a ze la a kinu vor;
kiüdi a üse Naomi üdi kielietuo mu?
Jihovae a pechü phishüte,
mu Kekuotho-ue kekakemhe se a tsüshüe.”
22Sümhiei di Naomi-e Moab kijü nu la vorta; tsiu Ruth, Moabpfü, puo miepfü sa puo ze vor. Unie-e barli re sede baketa ki Bethlehem nu vorlie.
Currently Selected:
Ruth 1: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More