Johan 21
21
Jisue Pethakelie Thenie Pengukeshü
1Mha hako sie Jisue Tiberia Dzükezhau khieki nu puo khapie pethakelieko pengu lashü; mu puo uko pengukeshü hamhie. 2Süki Simon Pitor, Thoma nuobi#21:2 Gk Didymus. ükezhau, Galil Kanamia Nathaniel, Zebedi nuonie mu Jisue pethakelie kekrei kenie rei sa keze tuo. 3Simon Pitor sie uko ki, “A tsu khuotetuo.” Sitse uko puo ki, “Hie rei n ze tsutuo,” sita. Uko tuo vo di rou puo nu pfülie, derei uko süzhü mhapuorei telie mo.
4Süsieduü teiso pi par tse, Jisue dzükezha khieki keso nu tha di ngulie, derei pethakelieko süu üse Jisu ücü silie mo. 5Sitse Jisu uko ki, “A nuonuoko, nieko khuo puorei telie mo me?” Uko sie puo ki, “Molie.” 6Sitse puo sie uko ki, “Nieko jal kelhoupie rou tsei thezatsa shücie, sitse nieko khuo huo ngulietuo ho,” sishü. Süla uko jal kelhoupie sütsashü ru uko süu teshülie lhota, khuo krathorketa la. 7Süki Jisue puo khrie kevor pethakelieu sie Pitor ki, “Puo Niepuu ta zo,” sishü, Pitor süu Niepuu ükecü silie tse puo methuo tuokecü la puo boulie selie di prou dzükezha nu leta. 8Derei pethakelie kekreiko rou kecü nu lelie di khuo tshu pfüketuo jal merhashüse dzükezha khie vota, uko keso nu vorketuo thu krie kenie zie ba moketa la.
9Sidi uko keso nu parlie tse, mizhü pie mi kechü siro sügei khuo mu niekhrüda kezhü ngulie. 10Jisu uko ki, “Nieko tsie nu tekelie khuoko huo se vorcie.” 11Süla Simon Pitor vo khuo kezhazha krie di hiepengouese ketuo jal-u merhashü keso nu parlie, mu khuo süthede tuo rei jal-u rürhata mo. 12Jisu uko ki, “Vor di mhacüliecie,” sishü. Süki pethakelieko miapuorei puo üse “No supuo ga?” icü ketso nreita, kekreilamonyü uko puo Niepuu zo ükecü silieketa la. 13Sidi Jisu vor niekhrüda chülie di pie uko tsüshü mu sümhie khuo rei pie uko tsüshü. 14Hauha Jisue kesia nunu rheikelie sie pethakelieko pengukeshü va seu.
Jisu mu Pitor
15Uko mhacükelie sie, Jisu sie Pitor ki, “Johan nuou Simon, no hako ki a khriekuoya mo?” Puo sie puo ki, “N zo, Niepuu no a n khrieya ücü si ba.” Jisu sie puo ki, “A kuonuoko vachüliecie,” sita. 16Siro va kenieu va rei puo la sie puo ki, “Johan nuou Simon, no a khrieya mo?” Puo sie puo ki, “N zo, Niepuu no a n khrieyakecü si ba.” Jisu sie puo ki “A kuokoyo pfheliecie,” si. 17Puo va seu puo ki, “Johan nuou Simon no a khrieya mo?” Pitor Jisu va se puo ki, “No a khrieya mo?” iketa la puo nousuota. Jisu sie puo ki, “A kuoko vachüliecie. 18A n ki pu toushütuo, no n khriesaki n thuo n chie phapfü di no vo kenyüra vo ze. Derei no tsata tse n dzienie yhashü di mia bu n chie phashü di n ze no vo nyü kemora rei votuo.” 19(Puo hau pukeshü puo kedipuo se chü di Ukepenuopfü za chü kemeyietie shicü thakeshü zo.) Süsie puo sie puo ki, “A siemedziliecie,” sishü.
Jisu mu Pethakelie Kekreiu
20Pitor reipra ru Jisue puo khrie kevor pethakelie kekreiu uko mhacü keba ki Jisu khieki mizhü vakhriepfü di, “Niepuu supuo n teshütuo üya ga?” ikeshüu puo medzi vorkezhü ngulie. 21Pitor puo ngukeshü ki, Jisu üse, “Niepuu, siro themia hau bu kedipuo chü ta?” 22Sitse Jisu sie puo ki, “A la vor kemochie puo bu ba zoketuo a medo liro, süu n la kedipuo mu? No a siemedzi zolie!” 23Süla pethakelieu siatalie lho ükeshü süu themia#21:23 Gk Siezedzürieko donu. donu diekrie pu vota. Sirei Jisu puo üse siatalie lho zo üdi pu mo, derei, “A la vor kemochie puo bu ba zoketuo a medo liro, süu n la kedipuo mu?” ikeshü zo.
24Pethakelie hau mha hako dze pushü, mu süko rei sa thukeshüu, mu hie puo zhapuu ketho zo ükecü si touta zo. 25Sizomonyü Jisu mha kekrei kekra rei sa chüshü; mu süko puopuo di thutuo üro a lekecü leshüdako la kijü hanu puo chü jütatuo.
Currently Selected:
Johan 21: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More