Johan 17
17
Jisue Pethakelieko la Chakecü
1Jisu die hako pukeshü sie, puo tosie teigei meho di sie, “Apuo, puoteiu vorte; Nuou bu n chüpie zayie chüshülieketuo la no Nuou pie zayie chüshücie, 2No themia#17:2 Gk Uchü. pete mho kekuo pie puo tsüwa di puo bu kechachie kerhei pie süko tsülieketuo chüshüwaketa la. 3Siro uko bu ketho Kepenuopfüe puo rübei zokecü mu noe puo ketsekeshü Jisu Khrista sikelie süusü kechachie kerhei zo. 4No a bu chünukeshü mhatho-u chü tseiwa di a kijü nu n za chü kemeyieshüwata zo. 5Süla Apuo, kijüu chükelie mhodzü a n ze zayie chü kevor tuoi tsie a bu n ze zayie chüliecie.
6“No kijü hau nunu themia khapie a ketsüko ki a n zau pie pesipengushüwate. Süko n vie ze, mu no süko khapie a tsüshü, tsiu ukoe n die ze vor zo. 7Uko tsie we no mha khapie a ketsü peteko n kinu vor zo ükecü siliete; 8kekreilamonyü no se a tsükeshü dieko a pie uko tsüshüwate, mu uko süko zelie, sidi ukoe a n kinu vor kethota zo ükecü siliete; mu uko noe a ketseshü zo ücü pelete. 9A uko sou nu chaya; a kijüu sou nu chaya mo, derei no pie a ketsüko sou nu chaya, kekreilamonyü ukoe n vie. 10A vie pete n vie, mu n vie pete sü a vie zo; mu a uko geinu zayie chü bata zo. 11Tsiu tsie a kijü nu ba salie lhote, derei uko kijü nu ba zotuo, mu a n ki vortazhie. Kemesa Puou, no khapie a tsükeshüko, süko bu avu tuoi puo chülieketuo la no n za nunu süko rüguo ze tuoliecie. 12A uko ze ketuo chie no khapie a ketsüko n zau nu uko khapie baliete. A uko rüguo se tuo zo, mu kethodie bu tseilieketuo la kataketuo nuou#17:12 Gk Mha kepeka nuou zo kemosie. zo kemosie miapuorei pejüwa mo. 13Derei tsie a n ki vortatuoü bate, mu a keneiu bu uko ketshu chülieketuo la kijü nu baluokecü nu mhako pushüwate. 14A n dieu se uko tsüwate, mu kijüu uko ngumecüya kekreilamonyü a kijüu nunu vor kemo tuoi uko rei kijüu nu mia mocü la. 15A n bu kijüu nunu uko chüseta monyü kerüzhüu kinu uko rüguose balienu di chaya. 16A kijüu mia kemo tuoi, uko rei kijüu mia mo. 17Ketho-u se uko chü kemesaliecie, n dieu ketho zo. 18No a ketsepie kijü nu keshü tuoi, a rei uko ketsepie kijü nu shüwate. 19Uko bu rei ketho-u nunu u chü kemesalieketuo la uko la a thuo a chü kemesa se tuo zo.
20“A hako rübei la zomonyü uko die nunu a pelelieketuoko la rei chaya, 21uko pete bu puo chülieketuo la. Sidi Apuo, a n nou ba mu no a nou keba tuoi uko bu rei avu nou baliecie; sidi kijüu bu no a ketseshükecü peleliecie. 22Avu puo zokecü tuoi uko bu rei puo chülieketuo la no zayie pie a ketsüu a khapie uko tsüwate. 23A uko nou ba mu no a nou ba, süu geinu uko bu keze puo chü tseilieketuo siro kijüu bu no a ketseshü ükecü mu no a khrieyakezha tuoi uko khrieya ükecü silieketuo la. 24Apuo, no uko khashü a ketsüko a uko bu rei a kebara ba nyüya, sidi uko bu no kha a ketsü zayieu meholieketuo la, kekreilamonyü no kijüu chükelie mhodzü rei a khrie tuotakecü la.
25“Kemiatho Puou, kijüu we n siya mo, derei a we n si ba, mu no a ketseshü ükecü hako we si ba. 26A uko bu n zau siliete, mu süu mia silie zotuo, sidi no se a khrie vorkecü kekhrieu bu uko nou balie mu a bu uko nou balieketuo la.”
Currently Selected:
Johan 17: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More