Luka 6
6
Yiɓǝna Shin Viin Fedna maa Angaa Yahudu
(Mat 12.1-8; Mar 2.23-28)
1Viin fedna maa angaa Yahudu yen, Yesu ɗa angaa byaa mee a bii nggǝr ɗǝn yomaa, pang angaa byaa mee a ɓora yom a vurkǝɗaki pang a shakraki. 2Pang a dǝs maa Farisi ki shee ka, “Yeni ryak pang yin shaa awung kǝ shiiring Musa shee ka koo shii viin fednaa rak paa?” 3Yesu pal yen ta ka, “Yin kori awung kǝ Dauda shii kǝ ɗama kap ma ɗaa angaan kaa ɗǝ mee rakghaa? 4Lǝri kǝshiin lokng Vitora, naa ta cir pampam mang kaa ˈyii Vitor maa pang rii, pang naa amarn sǝra mee, mang kǝ kun kaa sungwarin Vitor ni rii en.” 5Yesu ɓan yen ka, “Fan Sum ni Mulokng viin fedna.”
Yesu Bar ɗǝ Mu Kwak Shanggad
(Mat 12.9-14; Mar 3.1-6)
6Ta vii ɗakghai mang fedna maa Yahudu, kǝ lǝr arang Shamang shii maa angaa Yahudu, ng ta maksa asum maa yaa, ta tang sum yen ta mang kǝ kwak tǝshen mee ɓwak kuu yaa. 7Pang angaan maksan shiiring Musa ɗaa Farisi, a fur yis kaa ɓee koo Yesu bara ɗaa asum viin fedna ma Yahudu yaa, tung kaa sok awung kaa kaɓa ma taa. 8Tung ka Yesu ɓwak yok awunan Kǝng taa aɗoo yena. Pang Yesu ɓan sum ki ka, “Nanzu kaa shambal tǝɗoo maa sum maa.” Pang sum ki nanzu shambal ta tang. 9Shee Yesu ɓan yen ka, “Ng yiɓǝna yin, yeni pang shiiring Musa shee ka kaa shii viin fyedna paa? Kaa shii awuu zar nyaa, koo kaa shii vishii maa awuu nyaa? Kaa ɓwak sum nyaa, koo kaa wun ma nyaa?” 10Pang cir yis ɓee yen ta nzup yen, shee ɓan sum ki ka, “Nap kwak mu.” Shee sum ki nap kwak mee, shee kwak ki bar. 11Pang tura kap angaan Maksan shiiring Musa ɗaa Farisi pang a kap ɓana maa ɗakghai yen nung shiin awung kaa shaa ɗǝ Yesu.
Yesu Varshii Awan Tokghaa Mee Ware Nyar Mɓaa
12Taa yisa nbana, Yesu turi agenakghaa tung kǝ kwarshii Vitor, pang yis kwarsan Vitor ta tang. 13Kǝ ara tashii, pang tokshii angaan byaa mee, shee varshii ware nyar mɓaa ta kǝshii yena pang tok yen ka awan tokghaa mee. 14A yeni a Siman (mang kǝ na ma tǝsak ka Biturus), ɗǝ zǝǝ mee Andarawus, ɗǝ Yakub ɗǝ Yohana, ɗǝ Filibus, ɗǝ Batilomi, 15ɗǝ Matiyu, ɗǝ Toma, ɗǝ Yakub fan Halfa, ɗǝ Siman (mung kǝng ruɗa ndar mee), 16ɗǝ Yahuda fan Yakub, ɗǝ Yahuda Iskaryoti, mung kǝ taa cir Yesu ryap.
Yesu Makshii Asum maa Bar ɗaa Angaan Womnak
17Pang Yesu jiri ɗǝ angaan kǝ varshii yen, ta shambal taa arang kǝ banjin ɓobci ta, ɗǝ asum pyak angaan byaa ma. Ta tang asum damai kaa war ta ndar maa Yahudiya ɗǝ Urushalimaa nzup ɗǝ angaan ndarng Taya ɗǝ Sidon mang kaa nung kuɓoraa. 18A tari tung kaa yir ma, tung kaa sok bara taa nzup maa womnak yena. A bar ɗaa angaan kaa vishii maa yiɓi vǝvǝra yen. 19Nzup yen a daaraki ka kaa wuu sok gunji ma, tung sheednang kǝng waraki ndus myaa ng baraki ɗaa sum nzup.
Katlang Karkǝɗoo ɗǝ Awuu Visa
20Yesu cir yis ɓasa angaa byaa mee ta pang shee ka,
“Yin ɗaa angaan nggen kal ni, yin ni kǝ yin ɗaa angaa shoor,
tung ka tǝruun Vitor mayin ni!
21Yin ɗaa angaa nggen kal ni, yini kǝ yin yira ɗama zheri,
tung ka teeli yin shiilak!
Yin ɗaa angaa nggen kal ni, yini kǝ yin shiidnaki zheri,
tung ka yin shiishalak.
22Yin ɗaa angaa nggen kal ni, ng asum ni vana yin,
a puna yin ta kǝshii yenna, a porsa yin,
a ɓaa yin ka yin ɗaa angaa visa ni, tung Fan Sum!
23“Ng yin ni ɓee kaɓan, shaan kaltla maa ɗoo ta vii pana, ɗaan ɗǝ wusungaa maa ɗoo. Tung ka ɓagham yin ng damai ni ta toora, tung ka adaa yen shii kaɓan ni ɗaa angaa fwan nung Vitor.
24“Nakghaa awung vishii ta yinaa, yini kǝ yin ɗaa awung kwak,
tung yin ɓwak yir wusungaa yinaa tii!
25Nakghaa awung vishii ta yinaa, yinaa angaan kǝ teeli yin shiila zheri,
tung ka yin taa ɗaa ɗǝ ɗama!
Taa nakghaa awung vishii ta yinaa, yinaa angaan kǝ yin shiishalaki zheri,
tung ka aɗoo yin taa yarsak, yin taa shiidnak!
26Taa nakghaa awung vishii ta yinaa, yinaa mang kaa sum makghaa yin,
tung kaɓan ni pang a daa yen shii ɗaa angaan fwan nung ɓet.
Kǝ Yin Rud Angaa Vana Yin
27“Ng ɓaa yin, angaa yira min, kǝ yin rud angaan kaa vana yin, kǝ yin shii awu zar angaan kaa vana yin maa. 28Kǝ yin foo myak zar angaan kaa porsa yin maa, kǝ yin kwarshiku Vitor tung angaan kaa vǝvǝra yin. 29Ng muɗakghai ni vuk ku kwak ngwarang gaat ɗaa, shiiɓǝl maa ɗakghai ki, ng muɗakghai ni ɓwak ku maa kǝrɓǝt ɗǝng mu, na ma mang kǝshii ki ket. 30Nzup mung kǝ mee ni kwarshii ku awu ɗakghai, na ma. Mung kǝ mee ni yal kumaa awuɗakghai kaa yiɓǝn ma rak, kaa kala ma ɗǝ mee. 31Shaan asum maa awung kǝ yin ruɗaki kaa shii yin maa ket.
32“Yin ni ruɗa angaan kaa ruɗa yin ni en, shaa kacee ni pang yin ɓyaa kwakng Vitor paa? Angaan shaan ram a ɗǝ ruɗa aɗakghai yen ket! 33Ng yin ni shaa awuu zar angaan kaa shaa yin ni maa en, shaa kacee ni pang yin ɓyaa kwakng Vitor paa? Angaan shaan ram a ɗǝ shaaki kaɓan ket. 34Yin ni naa awu angaan ka shama pǝra yin ni en, shaa kacee ni pang yin ɓyaa kwakng Vitor paa? Angaan ram a ɗǝ naa aɗakghai yen tung ka kaa pǝr yen ta. 35Nzup ɗǝ kaɓan, kǝ yin rud angaan kaa vana yin, kǝ yin shii yen maa awuu zar, naan yen awen kǝ yin ˈyii yis tung pǝraki rak. Shaan kaɓan ki, ryakghaa kǝ yin sok ɓagham yin pyak, yin nakghaa awan Vitor mu ɗǝng, tung ka Vitor ng sum zar ni, taa angaan kaa shaa katla maa aɗoo rak, ɗaa angaan visa. 36Kǝ yin ɗǝ kǝ ɓyaa shoor maa ɗakghai yin, kan kee mang kǝ dǝ yin Vitor ɗǝ ɓyaa shoor yin.
37“Kǝ yin ɗǝ kǝ koma nung shiin ram maa ɗakghai yinaa rak, a koma nung shiin ram yinaa rak. Kǝ yin nak ɓyaa ngiivi ma ɗakghai rak, a ɓyaa ngiivi yin nak ket. Porsan nzup maa ram kǝ yin furyang, a porsa furayang yin maa ket. 38Naan, a naa yin ket, a shiilsa ma, kaa tapshii ma kǝ shiil zuk zuk kǝng jiraki, kaa shiiɓǝl yin maa ta kǝrɓǝt ɗaa. Tung ka gorokng kaa kama ta mee ni pang a kama ku ma ta.”
39Yesu ɓan yen agara mari: Shee ka, “Rup ɗǝkǝ zhakgha rup gwarshii nyaa? Mɓaa yen, a pira agobɓa raa? 40Fan maksa ɗǝ kǝ ɓyakghaa mung kǝng maksan maa rak, nzup ɗǝ kaɓan mung kǝ makshii yokghai, nakghaa kan kee mung kǝ makshii ma ta.
41“Tung yeni pang a ɓyaa pwarin Kǝng yising ɗakghai mwaa paa? Nzup ɗǝ kaɓan a ɓasak koning kǝng ta yis mwaa rakghaa? 42Shaa kacee ni pang a ɓaa ɗakghai mu ka zǝǝ min, ‘Kala kǝng vuk ku maa pwarin kǝng ta yis mwaa,’ wokghai ka shama ɓyaan koning Kǝng ta yis mwaa rakghaa? Wokghai mu tǝlǝm mɓaa vuk koning Kǝng ta yis mwaa, ka sok ɓee ara ta, tung kaa sok vuk ɗakghai mu maa awung Kǝng ta yis mee yaa ta.
A Yokgha Kǝtǝr ta Dugur Myaa ni
43“Kǝtǝr zar shaa vishiin dugur rak. Vishiin kǝtǝr shaa dugur zar rak. 44A yokgha kǝtǝr taa dugur myaa ni. A sokghaa dugur kooni kǝtǝr puri rak, koo dugur njumun kǝtǝr buna rak. 45Sum zar shaa awuu zar, tung awu zar ni kǝshiin aɗoo myaa, mu visa shaa awuu visa, tung awuu visa ni kǝshiin aɗoo mee ya, tung awung Kǝng karkǝɗoo mee ya ni ng waraki nung mee ya.
Asum Mɓaa kaa Lok Lok
46“Tung yeni pang yin tokghaa mi ka, ‘Mulok, Mulok,’ nzup ɗǝ kaɓan yin ɗǝ shaa awung kǝng ɓana yin rak paa? 47Nzup mung kǝ taa ta makghai yaa, ng mee ni yira nung min, kǝng shaa awung kǝng shee ka kǝ shii, ng ɓaa yin ɓǝrkǝtng sum pan. 48Ng kan kee sum yen ni mang kǝ foo dat lok mee shii maa pǝpara ri. Ng kǝ kuɓor ɓyaksal min taa wun ma shii ma awen nak. Tung ka dadng lok ki shiin pǝpara ni. 49Ɗǝ kaɓan mung kǝ mee ni yiran mi rak, kǝng byaa awung kǝng shee kǝshiin nung mi naa rak. Ng kan kee mung kǝ lok, lok mee shiin nyasa ni, kuɓor ni wutaak min taa rumza ma, rumza ki kuna ɓyaa rak.”
Currently Selected:
Luka 6: (Boi) Tiyaa
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation