Англунимос 37

Лэ Иосифостерэ сунэ

1О Яково жувэлас пэ пхув Ханаано, пэ кодыя пхув, кай жувэлас лэско дад. 2Акэ э дума пала Яково тай лэстерэ потомкуря.

О Иосифо, савэсти сас дэшуефта бэрша, праварэлас лэ бакрэн пэ мал екхтанэ пэстерэ пхралэнца, лэ Яковостерэ шавэнца ла Валатар тай ла Зелфатар, э жувля, савэ сас лэ Иосифостерэ дадэсти ромня. О Иосифо роспхэнэлас пэсти дадэсти о вырытимос пэстерэ пхралэнго.

3О Израилё жэ камэлас лэ Иосифос майбут саворэ шавэндар, пала кода ке вов аракхадиля лэстэ по пхуримос. О Израилё стердя важ лэстэ барвалэ шукарнэ гада. 4Кала лэ Иосифостерэ пхрала удикхле, кай лэнго дад камэл лэс майбут, сар аврэн, вонэ линэ тэ вырыцын лэс и лэндэ на вижанас тэ дэн дума лэса мишто.

5Екхвар о Иосифо дикхля суно. Вов роспхэндя пала лэстэ пэстерэ пхралэнди, и вонэ завырыцысардэнас лэс инке майбут. 6Акэ со вов пхэндя лэнди:

— Ашунэн, саво манди снисайляпэ суно. 7Амэ пхандасас э снопуря пэ мал, тай екхвар мэрно снопо вазгляпэ тай вортойпэ, ай тумарэ снопуря тэрдилэ саворэ ригэндар лэстар тай тэлиле лэсти.

8Э пхрала пхэндэ лэсти:

— Со, ту авэса тхагар пар амэндэ? Со, амэ аваса тут тэ кандас?

Тай вонэ завырыцысардэ лэс инке майбут пала лэстерэ сунэ тай пала кадыва роспхэнимос.

9Лэ Иосифости снисайля инке екх суно, тай вов упалэ роспхэндя пала лэстэ пэстерэ пхралэнди:

— Ашунэн, манди снисайляпэ инке екх суно. Акана манди тэлилэ о кхам, о шон тай дэшуекх чергая.

10Вов роспхэндя о суно най кати лэ пхралэнди, ай и лэ дадэсти, тай о дад мустрисардя лэс:

— Со када за суно тути снисайля? Со када, мэ, тери дэй тай терэ пхрала чячес аваса тай тэлюваса тути жы каринг э пхув?

11Э пхрала ритярэнас холи пэр лэстэ, ай о дад сэрэсарда када.

Э пхрала битинэн лэ Иосифос

12Э пхрала жылэтар тэ праварэн пэ мал лэ дадэстерэ гуртуря катар о Шэхемо. 13О Израилё пхэндя лэ Иосифости:

— Ту ганэс, со терэ пхрала праварэн пэ мал э гуртуря паша Шэхемо. Мэ камав тэ бишалав тут лэндэ.

— Мишто, — пхэндя о Иосифо.

14Лэско дад пхэндя лэсти:

— Жа дикх, ся сын мишто терэ пхралэнца тай лэ гуртонэнца, тай пхэнэса манди.

Вов припхэндя када лэсти паша лэ Хевроноско машкарплаенго тхан, тай о Иосифо жыля андо Шэхемо.

15Котэ вов родэлас пай маля, жы кала екх мануш дикхляпэ лэса тай пушля лэстар:

— Со ту родэс?

16Вов пхэндя:

— Мэ родав мэрнэ пхралэн. Мангав тут, пхэн манди, кай вонэ праварэн пэстерэ гуртуря?

17— Вонэ жылэтар катар, — пхэндя кодыва мануш. — Мэ ашундэм, сар вонэ дэнас дума: «Авэн андо Дотано».

О Иосифо жыля пала пэсти пхрала тай аракхля лэн паша Дотано. 18Вонэ додикхлэ лэс дэздурал тай, данглал сар вов поджыля каринг лэндэ, допхэндэпэ тэ умарэн лэс.

19— Акэ авэл кодыва, саво дикхэл э сунэ! — пхэндэ вонэ екх екхэсти. 20— Умарам лэс тай шувидаса андэ шуки хаинг, ай пхэнаса, со лэс похаля вэшэско зверо. Тунче дикхаса, со авэла анда лэсти сунэ.

21О Рувимо ашундя када тай фирисардя лэс лэндерэ вастэндар. Вов пхэндя:

— Най, на трэбуй тэ лас лэско жувимос. 22На шорэн о рат. Шувидэн лэс андэ кадыя шуки хаинг андэ пустыня, тай на ваздэн тумарэ васта пэр лэстэ.

О Рувимо камэлас тэ фирисарэл лэс лэндар тай тэ рисарэл лэс палпалэ кай лэско дад.

23Кала о Иосифо поджыля каринг пэстерэ пхрала, вонэ злинэ пар лэстэ э йида — кодыя барвали шукарни йида, кай сас пэр лэстэ, — 24тай шувидэ лэс андэ хаинг. Э хаинг сас шушы, бипаясти.

25Вонэ бэшлэ тэ хан тай додикхлэ, сар э измаильтянуря жан анда Галаадо. Пэ вэрблюдуря сас пхаримата спецыяса, бальзамоса тай ладаноса, савэ вонэ андярэнас андо Египто. 26О Иуда пхэндя лэ пхралэнди:

— Со амэнди колэстар, сар кай амэ умараса амарэ пхралэс тай гараваса када? 27Фэдэр битинам лэс лэ измаильтянонэнди тай на ласа тэ ваздас пэр лэстэ амарэ васта, ке вов амаро пхрал, амаро рат тай амари тила.

Э пхрала канглэ лэс. 28Кала э мидьянея э тинимаря прожанас пашэ, э пхрала вилинэ лэ Иосифос андай хаинг тай битиндэ лэ измаилеенди палай дуйдэша рупунэ ястря. Измаильтянуря линэ лэс андо Египто.

29Кала о Рувимо рисайля, вов дикхля, со лэ Иосифос котэ нинай, тай росшындя пэр пэстэ э йида. 30Вов авиля каринг э пхрала и пхэндя:

— Лэ шаворэс котэ нинай! Каринг мэ акана тэ жав?

31Тунче вонэ линэ лэ Иосифоско гат, шындэ бузнэс тай вымакхлэ о гат лэ ратэса. 32Котар вонэ андярдэ лэ дадэсти о барвало шукарно гад и пхэндэ:

— Акэ со амэ аракхлям. Дикх, када най терэ шавэско гат?

33Вов галярдя лэс тай зацыпий:

— Када о гат мэрнэ шавэско! Лэс халя вэшэско зверо! О Иосифо сас росшындо пэ котора!

34О Яково росшындя пэр пэстэ о гат, ля пэр пэстэ гонэстери йида тай бут деса ровэлас пала шаво. 35Саворэ лэсти шавэ тай э щея авилэ тэ улэн лэс, ай вов на шолас сама тай пхэнэлас:

— Най, мэ кадя грижатар жаватар пэ лэ мулэнди люма, каринг мэрно шаво.

Кадя о дад ровэлас пала пэско шаво.

36Ай андэ кодыя время э мидьянея андярдэ лэ Иосифос андо Египто тай битиндэ лэс лэ раести лэ Потифарости, саво сас кай о фараоно барэдэр пэ фирисаря.

Currently Selected:

Англунимос 37: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб