Isaías 1
1
Jteclum Judá, jsa'mulilot c'ot ta j'ech'el
1Ti Isaías xnich'on ti Amose, caj'ac'bat sna' ta yalbel sc'oplal ti c'usitic ta xc'ot ta stojol ti Judae xchi'uc ti jteclum Jerusalene, ti c'alal ja' o tiq'uilic ta ajvaliletic ta Judá#Mi 1.1. ti Uziase,#2 R 15.1-7; 2 Cr 26.1-23. ti Jotame,#2 R 15.32-38; 2 Cr 27.1-9. ti Acaze,#2 R 16.1-20; 2 Cr 28.1-27. xchi'uc ti Ezequiase.#2 R 18.1—20.21; 2 Cr 29.1—32.33.
2Ch'ul vinajel, banomil, a'yio ava'iic ti xi ta xal ti Diose: “Ch'i c'opojic cu'un ti alab nich'nabiletique, c'u stu un, lic stoy sbaic ta jtojol. 3Ti vacaxe xojtiquin ti yajvale, ti burro xtoque sna' bu oy ac'bil yavil sve'eb yu'un ti yajvale. Ja'uc ti Israel ti ja' jteclumale, mi ja'uc xa xiyojtiquinicun, mi ja'uc xa'ibeic xchiquinal.”#Jer 8.7.
4Mu xa ono'ox cha'bel un, jsa'mulil jnaclejetic, yalab xnich'nab jchopol joletic, jsoquemal jolil nich'nabiletic. Laj anamajes abaic ta stojol ti Ajvalile, laj aq'uej abaic, laj atenic comel ti Ch'ul Dios yu'un ti Israele. 5Ti vo'oxuque avac'ojbeic yipal ti toyobbaile, mi ja'uc xa oy bu jutebuc xocol yavil yu'un ti tsitsel ti abec'tal atacopalique. Yayijem scotol ti ajolique, ch'abal xa ta j'ech'el ti avipique. 6Lic ta avacanic, c'ot c'alal to ta ajolic, mi ja'uc jutebuc ma' ti mu'yuc ti xchamele. Scotol yayijem, majbil, t'omemic yu'un ti syayijemale. Mi ja'uc juteb oy buch'u xpoxtaoj, ti oy buch'u xpixoje. Mi ja'uc oy buch'u ta xjaxbe aceite ta syambel ti yavanele.#Jer 30.12-15.
7Yu'un lic xa joybijuc ta sbajtical banomil ti ateclumalique, ti natic no'ox leb c'oc' ta xchiq'uel ti alumalique. Yu'un ti c'usitic oy avu'unic ti slubel xchamel ti avoc ac'obique, ta aba ta asatic aq'uelojic ta sve' ta stunesic ti avajcontraique. Yu'un scotol ta xc'ot ta sbajtical banomil jech c'u cha'al c'ot ta jteclum Sodoma ti c'alal laj yich' lilinele. 8C'ajomal xa stuc setel ta xcom ti jteclum Sione, ti co'ol xa s'elan jbej axibalna oy ta yut ts'unubal uvae, ti co'ol xa s'elan jbej snail yavil c'usitic ta xtun ti oy ta yut ts'unubal melone, ti c'ajomal xa no'ox stuc lum ti joyobtabil yu'un ti yajcontrae. 9Ti manchucuc laj to yictaotic comel jun chibuc ti Dios ti scotol xu' yu'une, jech laj jtabetic stasal jech c'u cha'al c'ot ta stojol ti Sodomae xchi'uc ti Gomorrae.#Gn 19.1-29; Ro 9.29.
Ti bats'i yich'el ta muc' ti Diose
10Ti co'ol atalelic jech c'u cha'al ti banquilaletic yu'un ti Sodomae, a'yio ava'iic sc'opojel ti Diose. Ti co'ol atalelic jech c'u cha'al ti jteclum Gomorrae,#Jer 23.14. ts'etano achiquinic ta ya'yiel ti c'u s'elan ta xchanubtasoxuc ti Dios cu'untique. 11Yu'un ti Diose xi ta xale: “¿C'usi xtun o ti ep ta xavich'beicun talel ti milbil matanale? Xtaet xa ta xca'i ti chic'bil matanal chij ta xavac'beicune, xchi'uc xepu'al ti ch'in chijetique. Mu xa jc'an jq'uelbe sat xch'ich'eltac ti tot vacaxetique, ti chijetique, xchi'uc ti ch'in tentsunetique. 12Ti vo'oxuque ta xtal ava'an abaic ta jtojol, ja'uc le' une, ¿buch'u laj yalboxuc ava'iic ta xtal ateq'uic ti camaq'ue? 13Mu xa xavich'beicun talel matanaletic ti mu'yuc xa sc'oplal cu'une. Mu xa ts'icbaj ta xca'i ti xch'ailale. Ti vo'oxuque ta xatsobic talel ta svolel ti jteclum ta spasbel sq'uinal ti ach' ue, xchi'uc sc'ac'alil ti cuxob o'ntonale, ja'uc le' une, mu ts'icbaj ta xca'i sq'uinic ta spasic ti jchopol jnaclejetic ti mu xicta sba ta spasel ti c'usi chopole. 14Mu jc'an jq'uelbe sat ta spasbeic sq'uinal ti jujun ach' ue, xchi'uc ti tsoblej yu'unique. Mu xa x'ech' ta xca'i yu'unic, mi ja'uc xa ts'icbaj ta xca'i yu'unic.#Jer 6.20; Am 5.21-22.
15“C'alal xnubulet avoc ac'obic ta xac'opoj ta xati'inique, ta jq'uej batel ti jsat ta atojolique. Ac'o mi jal ta j'ech'el ta xac'opoj ta xati'inique, mi ja'uc ta jchiquintaboxuc, yu'un balom ch'ich' ti ac'obic ta scoj ti amilvanejalique. 16Poco, tuso abaic. Tenic jipic loq'uel ta jba ta jsat ti achopolalique. Ictao abaic ta spasel ti chopole. 17Chanic ta spasel ti c'usi leque, Ac'beic yipal ta spasel ti c'usi oy yutsil stuq'uil ta q'uelele, tic'o abaic ta scoltael ti buch'u ta xich'ic ilbajinele, tic'o abaic ta spojel ti buch'u mu'yuc buch'u oy yu'unique, tic'o abaic ta xchapanel sc'op ti c'usi oy yu'unic ti me'unal antsetique.”#Ex 22.21-22; Dt 24.17-21; 27.19.
18Yu'un ti Diose xi ta xalboxuc ava'iique: “La'ic li'e, lo'ilajcutic xchi'uc ti c'op taje. Ac'o mi cuxul mulil ta j'ech'el ti c'u s'elan ataojique, sac ts'ayan no'ox ta xac'otic cu'un jech c'u cha'al ti bote. Ac'o mi jun to cuxul tsajal poc' s'elan ti lamal c'otel ta atojolique, sac mesan no'ox ta xac'otic cu'un jech c'u cha'al ti saquil tsotse. 19Mi teq'uel ta xc'ot avo'ntonic ti jch'unej-mantaloxuque, ta xatun xalajesic ti c'usitic lec ta xloc' ta banomile. 20Yan ti mi avac'ojbeic yipal ti toyobbaile, ta jbel sc'oplal unbi, ta xachamic ti c'alal xyaquet ti letovajele”, xi laj yal ti Ajvalil Diose.
Ti Diose ta smes ta stus ti jteclum Jerusalene
21Vi to ca s'elan lac'ot un, jteclum, ti c'alal jun to ox ajol avo'ntonique, lac'ot jech c'u cha'al junuc ants ti sna' sbolomalin sbae.#Jer 3.6-10; Ez 16.15-36; 23.1-49. Ti ta vo'ne ti jnaclejetic avu'une, sq'ueloj to ox sbaic lec ti c'u s'elan ta xcuxiique, ti oy stuq'uil ti c'usi ta spasique, ja'uc avi tana le' une, naca xa jmilvanejetic un. 22Co'ol a'elan ta q'uelel to ox jech c'u cha'al ti platae, avi tana une, lac'ot jech c'u cha'al junuc c'a'ep. Co'ol a'elan ta q'uelel to ox jech c'u cha'al ti vinoe, avi tana une, lac'ot jech c'u cha'al junuc vo'. 23Ti ajvaliletic avu'une, naca jtoyobbaetic, ti lec xil sbaic xchi'uc ti j'eleq'uetique. Yu'un scotolic lec xa'iic stsaquel ti mich'ob c'abale, ti yac'oj batel satic ta stojol ti buch'u ta x'ac'batic ti matanaletic yu'unique. Mi ja'uc xa ta stic' sbaic ta spojel ta xchapanel ti buch'u mu'yuc buch'u oy yu'unique. Mi ja'uc xa ta stic' sbaic ta xchapanel sc'op ti c'usi ja' yu'un ti me'unal antsetique.
24Jech o xal ti Dios ti scotol xu' yu'une, ti banquilal jpojvanej yu'un ti Israele, xi ta xal ta jamale: “Ch'an xa chanic, ta jq'uel jtuc ti c'usi ta xcut ti jcontrataque. Ta jpacbeic sutel ya'iic ti c'usi ta spasique. 25Ta ach' ta xlic jyales ti coc jc'ob ta scontrainelote, ta xchiq'uel ta j'ech'el ti ac'a'epale, ta smesel stusel loq'uel scotol ti achopolalique. 26Ta xc'ot ta pasel cu'un ti ta xcac' talel jchapanvanejetic ta atojol jech c'u cha'al ta vo'nee. Ta xcac' taluc jbijubtasvanejetic jtojobtasvanejetic ta atojol jech c'u cha'al ta ba'yele. C'alal mi c'ot xa ta pasel cu'un ta atojolic une, ta xlic albatan ‘Xa'ibeic sni' xchiquinal ti jteclum le'e’, ‘mu'yuc c'usi sna'ic ti lum le'e’,#Zac 8.3. xi ti ac'oplalique.
27“Ti buch'u ta sutic talel ta jtojole, ta yutsilal jol co'nton ta jtic' jba ta spojel, ta scoltael ti jnaclejetic yu'un ti jteclum Sione. 28Ja'uc ti jtoyobbaetique, ti jsa'muliletique, ta jtsutsesic ya'iic ta j'ech'el, ti buch'u ta xistenicun comel ta j'ech'ele, ta xchamic.
29“Ta xlic q'uexavanic yu'un ti tulanetique, ti yavil ts'unobil nichim ti toj c'upil sba ta xavilique, ti bu laj anijan laj achiman abaic ta yich'el ta muc' ti c'usitic meltsanbil ta c'abale. 30Ti vo'oxuque jech ta xac'otic jech c'u cha'al ti tulan ta xtaquij ta xnucultaj ti yanale, co'ol ta xac'otic jech c'u cha'al junuc yavil ts'unubal nichim ti ch'abal ta xich' ac'bel ti ya'lele. 31Xi s'elan ta xc'ot ta stojol ti tsatsal vinic xa'i sbae: ta xjoybij ta jun c'a' jobel, xvajet no'ox xnich ta xlic tiluc ti yabteltaque, ta jech to yepal ta xlic c'ac'uc ti xchibal taje, mi ja'uc junuc oy buch'u ta xtub yu'un ti c'oq'ue.”
Currently Selected:
Isaías 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000