2 Juan 1
1
Sc'oplal ti melele xchi'uc ti syail xc'uxul o'ntonale
1Ti mol jtunelune ta jts'ibabot talel ti jvun li'e, ti vo'ot xchi'uc ti avalabe, ti t'ujbiloxuc yu'un ti Diose. C'uxoxuc ta co'nton ta j'ech'el. Ma'uc no'ox ti vu'une, ja' jech xtoc, c'ux ta xa'ioxuc ti buch'utic laj xa yojtiquinic ti bu ja' melele. 2C'ux ta xca'ioxuc ta sventa ti oy ta co'ntoncutic ti bu ja' melele, ti jech oy ta jtojoltic sbatel osile. 3Ti Jtotic Diose xchi'uc ti Cajvaltic Jesucristo Xnich'on ti Jtotic Diose, ac'o sva'an sba ta atojolic ta yac'beloxuc ti slequilal yutsilale, xchi'uc ti slamajemal avo'ntonique, ti jech oy ta atojolic ti bu ja' melele, xchi'uc ti syail xcuxul avo'ntonique.
4Ximuyubaj xa avu'un c'alal laj ca'ibe sc'oplal ti oy jun chib avalab#3 Jn 3. ti jech yacalic ta spasel jech c'u cha'al ti melel ti yalojbotic ti Jtotic Diose. 5Ti jech c'uxoxuc ta co'ntone, Jchi'iltac, ta jc'anboxuc vocol ta atojolic, ti x'ech'uc to me c'uxuc xca'i jbatic ta jujun tal.#Jn 13.34; 15.12,17. Ti jech ta jts'iba talel ti jvun ta atojolique, ma'uc jun ach' mantal; ja' ono'ox ti mantal laj ava'iic talel ta sliquebale. 6Ti syail xc'uxul o'ntonale, ja' ti yich'uc xch'unel ti c'u s'elan ta xal smantaltac ti Diose. Ti mantale, ja' ono'ox ti xi laj ava'iic talel ta sliquebale: oyuc ti syail xc'uxul avo'ntonique.#Jn 14.15,23-24; 1 Jn 5.3.
Sc'oplal ti jlo'lavanejetique
7Yepal no'ox jlo'lavanejetic ta xanavic ta banomil ti mu xalic ti tal yich' sbec'tal ti Cristo jech c'u cha'al junuc vinique. Ti buch'u jech yo'ntonic taje, ja' jlo'lavanej, yajcontra ti Cristoe.#Mt 7.15; 1 Jn 2.18; 4.1-3. 8Bijanic me un yo' mu nacauc ech' jvocolcutic ti li'abtejcutic ta atojolique, ja'uc c'otuc ta pasel ti lecuc chapal sc'oplal ti matanal ta xavich'ique.
9Buch'uuc no'ox ti ta syanijesbe smelol ti c'u s'elan chanubtasvan ti Cristoe, mu'yuc Dios ta stojol. Ja'uc ti buch'u mu syanijesbe smelol ti c'u s'elan chanubtasvan ti Cristoe, oy ta stojol ti Dios Totile, xchi'uc ti Nich'onile.#1 Jn 2.22-23; 4.15. 10Mi oy buch'u ta svu'lanoxuc ta anaic ti mu co'oluc ta xal ti c'u s'elan chanubtasvan ti Cristoe, mu xavac' ochuc ta yut anaic, mi ja'uc xavich' ta muc'. 11Yu'un ti buch'u ta xich' ta muq'ue, ta stabe ta maquibel ti c'usi chopol ta spase.
Sc'oplal ti stsutseb c'ope
12Yepal no'ox ti oy c'usi ta jc'an ta xcalboxuc ava'iique, ti ma'uc xa ta vun ta jts'iba talele. Yu'un jpatoj co'nton ta xtal jq'ueloxuc yo' ta jchi'in jbatic ta lo'il,#3 Jn 13-14. yo' jech xijmuyubaj jcotoltic.
13Ti yalabtac avix ti t'ujbil yu'un ti Diose, chabanucoxuc xayalbeic. Jechuc.
Currently Selected:
2 Juan 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000