Lûm 3

1Wù nyiə fyiə kə kiə̀ ani dòʼò wè Dzû ə? Wù nyiə fyiə kə kìə̀ â ghu ani gwùmì we ə? 2Namə kiy də ŋwô anə ndə̀mə̀ tə tə dzə̀lə! I yiə i səsə yiy də nə̀, Zə̀kìy kə kwe na yə̀ ntwùm ə̀ we awò àghě Dzû yìy. 3À də̌ ìsoŋə̀ yìy nə̀ ghu àliy kə kə̀ bɛmə dzə̂ nəway ntwùm ə̀ Kə̀zə̀ ìghà yə̀. Ì yû myìŋə̀ nə̀ Zə̀kìy kî zəŋə way fyiə kə ù tɛb na nəniy ani zəŋi, yəə ghu kə də kwu way ibɛmə yiy ə̀? 4Ndzə̀m ndzə̀m, à wày dzə ghii! Zə̀kìy kî zəŋə ŋwò ayiə yə àdzə̀m ù dzày na nəniy nə̀ ghe kî zəŋə ŋwò, yəə aghê tsəm də kə aghê guw àdzə̀m. I twâ dòʼò nəniy anə ŋwàʼà k-a-zə̀ nə̀,

“Abu wò dzə̀ŋə̀ nəniy, aghê àdzə̀m kwu ani zuw kəli tsə nə̀ wò dzìy àyiə àsoŋə̀ yìy tə̀

abu ghu saʼ nəniy wô a ndàw isaʼ, ghu saʼ nyə̀ â wò.”

5Ŋgà də ani dzày tsə nə̀ìndiə, abu ayiə àbɛbə ŋgàŋ ə̀ dê bə̂ nəniy nə̀ Zə̀kìy də tsitsi ə? Zə̀kìy kə̀ kpe nəway ani ŋə̀m nə̀ fòŋ anə yiə ŋgàŋ àbɛbə yiy, ù nyə̀ sòʼò ŋgàŋ nə̀ mfəm ə̀? À yù də̌ ndzòʼò ìbəb yə wù mbyi də ani bəb. 6I way ani dòʼò kòʼ aghii! Bəə Zə̀kìy də wày tsitsi, ù də̀ ani saʼ mə̀yə mbyi?

7Bəə ayiə àguw yam yiy zəŋə nəniy nə̀ aghê nyiə̀ mə̀ŋkwiʼi awò Zə̀kìy dè bə̀ nə̀ Zə̀kiy ndzəmə̀ nia ŋwò tɛb kə we kiy, Zə̀kìy kî namə kwu ani saʼ wiy miə dzîy nə̀ mə də wù ù bɛbə̀ wìy iyî kìə̀? 8Yəə i də nəniy ghii, ghà də ani dzày nə̀, “Ŋgà zəŋi ayiə àbɛbə yiy, tə̀ iyiə ìdzoŋə̀ ìliy nì də ani fyi ate!” Aghê liy boʼò kwi ghəd dzìy nə̀ à dzày ghə̀d ayiə ghè yə̀. Zə̀kìy kî kwu ani saʼ wiy gha.

Wù lìy wìy wày dzə tsitsi anə sə k-a-zə̀

9Yəə i də nəniy ghii, ŋgaŋ aghee Dzû, ŋgà kə̀ tsîy fyi dzə̂ nəway aghû yə̀ ghu də wày aghee Dzû. A kə̀ tsîy fyi dzə̂! Mə mə dzày tsìy nə̀ aghee Dzû nə̀ àghù yə̀ ghu də wày aghee Dzû yìy nə̀ ibɛb i kwu kədaʼa azoŋə̀ ghu. 10I twâ dòʼò nəniy anə ŋwàʼà k-a-zə̀ nə̀,

“Wù lìy wìy wày dzə tsitsi anə sə k-a-zə̀, ùmòʼ ŋgəmi wày dzə.

11Wù ùmòʼ wày dzə ù zuw kəli iyiə yə i də nəniy tsitsi

moo ù liə nəniy ani kəli wù wə̀ Zə̀kìy də nəniy we.

12Aghê àdzə̀m mə kyèmì ŋwò bə̀ akə̀lə̀ Kə̀zə̀,

ghu kâm kwu fàʼ kìy â Zə̀kìy.

Wù ùmòʼ wày dzə ù zəŋə nəniy ayiə àdzoŋə̀ yìy.

Ùmòʼ ŋgəmi wày dzə.

13Ghu dzîy təŋə kə àyiə yə a də ani zəŋi wù pfə.

Dzìy təŋə kə àyiə yə a də way àsoŋə̀ yìy.

Ayiə ghu à dzii yiy də yəə à də̌ mfe tə zwə.

14Ghu kwu kə ani nyə̀ ùntyiə ùbɛbə wiy awò àghè.

15Aghee ghà yə̀ zə̀àŋə̀ ŋə̀mə̀ kə nə̀ fòŋ, ghu wiy sòʼò àghù.

16Ghu byɛbə ù fyiə a lòʼo tə ghu zê nəniy ate, nìy bə̀ sòʼò ùtswə̀d azoŋə̀ àghè liy.

17Ghu kwu way yəə ghu də ani mùə̀ ate ani ibvay,

18ghu kamə̀ tsəŋə sòʼò way Zə̀kìy.”

19A kwu ŋwô nyiə nə̀ ayiə àdzə̀m a twâ dòʼò nəniy anə kəlàŋ, ghu kə twà na awò àghù yə̀ ghu kə muə nəniy anə daʼa k-a-làŋ. Lâŋ kìy kə ghî dzìy ani zəŋi tsə nə̀ wè mbyi ùlìy ki də wày ani dzày nə̀ ghe kamə kə̀ zəŋi bɛb dzə̂. Zə̀kìy ni saʼ mbyi idzə̀m. 20Yəə i də nəniy aghii, Zə̀kìy kî kòʼ dzə̀ wày nə̀ wù lìy də̌ wù tsitsi wiy anə sə kə we aŋwòə ù nia kə̀làŋ. Lâŋ kìy də ani fày ŋgàŋ nə̀ ŋgà si koʼo kyilə yəə ayiə ŋgàŋ àbɛbə yiy.

Dzəd yə Zə̀kìy koʼò kyilə nəniy nə̀ wù də̀ tsitsi anə sə kə we

21Zə̀kìy mə zəŋi nə̀ ŋgà kəli tsə dzəd yə ù zəŋə nəniy nə̀ aghê dòʼò tsə tsitsi anə sə kə we. Dzə̀d ì ghà yə̀ kwu dzə̀ way iyiə ìliy yiy ani zəŋi nə̀ lâŋ kìy. Ulâŋ wə̀ Musîs kə twâ nə̀ àyiə yə aghee ntwùm ə̀ Kə̀zə̀ kə twâ na nəniy, a kə màŋ tyi dzày bə̀ yəə ŋgà də ani dòʼò tsitsi ate anə sə k-a-zə̀. 22Ndzòʼò ìbɛmə yə wù kwu nəniy azoŋə̀ Yesù Kə̀litò à də̀ ighe i zəŋə nəniy nə̀ wù dòʼò tsitsi anə sə k-a-zə̀. Zə̀kìy faʼa ghii nə̀ àghù yə̀ àdzə̀m ghu bɛmə nəniy awò Yesù, aŋwòə ghu kâm kwu dzə̀ way kwuni kə̀liy kiy. 23Aghê àdzə̀m mə zəŋi ibɛb yiy, ghu kâm kwu wày ŋkwiʼi miy ani dòʼò aghê sòŋə̀ anə yiə yə zə̀kìy kə liə nəniy. 24Zə̀kìy mə kwuni zəŋi anə fôŋə we ìdzòŋə yiy nə̀ ŋgà ə doʼò tsə tsitsi abidzəmə̀ Yesù Kə̀litò wə̀ ù kə kûm fyi nəniy ŋgàŋ. 25-26Zə̀kìy kə sà yə̀ Yesù nə̀ ù dòʼò tsə dzəd yə ghe nîyzə̀ə̀ nəniy bɛb tə ghù tìy ate. Zə̀kìy nìyzə̀ə̀ bɛb tə ghù anə kàŋ tə Yesù bòʼ ìbɛmə yə ghu kwu nəniy azoŋə̀ we. Zə̀kìy kə zəŋi ghii ani dè tsə nə̀ ù də̀ tsitsi. Səsə, Zə̀kìy kə kwè tsə̀ fòŋ, u nìyzə̀ yə̀ bɛb tə ghù. A Kwuni bû nyiə, ù nyə̀ mfəm â ghù yə̀ ghu zəŋə ayiə àbɛbə yiy, ani dè tsə nə̀ ù də̀ tsitsi. Ani dè tsə nə̀ Zə̀kìy də tsitsi, ù zəŋə tsə nə̀ wù wə̀ ù bɛmə dzə̂ â Yesù nə̀ ù dòʼò tsitsi anə sə kə we.

27Ŋgà də ani fənə ikiykiy kwùmə̀ yə̀ nə̀ kìə̀? Iyiə ìliy tsəb wày dzə. À də̌ anə yiə ŋgà nia nəniy lâŋ kə Musîs kìy ə̀? Hǎy! À də̀ anə yiə yə ŋgà bɛmə dzə̂ â Yesù. À də̀ ighe i zəŋi nəniy nə̀ Zə̀kìy bii ŋgaŋ. 28Ŋgà kəli tsə nə̀ à mày kə ìbɛmə i zəŋə nəniy nə̀ wù dòʼò tsitsi anə sə k-a-zə̀, à wày dzə̀ nə̀ wù zəŋə àyiə yə lâŋ kìy dzîy nəniy. 29Zəkìy də təŋ kə Zə̀ kə aghě Dzû ə̀? Ù wày soʼo Zə̀ kə ghù yə̀ ghu də wày aghee Dzû ə̀? Ù də̀ soʼo ŋwô Zə̀ kə ghù yə̀ ghu də wày aghee Dzû. 30Zə̀kìy də kə kə̀mòʼ, ù nìy nia bə̀ àghě Dzû nə̀ ghu dòʼò tsə tsitsi bòʼ ìbɛmə i ghu, u nìy na bə̀ sòʼò aghè yə ghu də way aghee Dzû nə̀ ghu dòʼò tsə tsitsi bòʼ ìbɛmə ighu soʼo. 31I ghî də nə̀ ŋgà byɛbi maʼà yə̂ ùlàŋ nyiə anə ibɛmə yə ŋgà kwu nəniy ə̀? Hǎy, i way dzə ghi, ŋgà fələ̀ zəŋə nə̀ ayiə yə lâŋ kìy dzîy nə̀ a bû fyi àsoŋə̀ yìy.

Currently Selected:

Lûm 3: isu

Highlight

Compare

Copy