Lûm 16
16
Itwoŋə zuw i Pôl
1Mə dziy dzây bə̂ awò ghà nə̀ àzə̀ ə̀ ŋgàŋ ùyəŋi Fùɛbè, ù də̌ wù ùdzòŋə̀ yəə ghà ni fâʼ fwumi nə̀ we. Ù də̌ wè kə̀fàʼ a ndàw Kə̀zə̀ a Sìŋkliyèl. 2Ghà ŋgwam na tsə we anə izəd i Mwe ə̀ mbyi anə yiə aghee Kəzə̀ yìy kwu ani zəŋi ate. Ghà fây kə soʼò we anə iyiə yə ù kì liə nə̀ ghà fây we ate, aŋwòə ù mə ŋge fày ndə̀mə̀ àghù, fày dyaŋi sòʼò mìə̀.
3Ghà toŋə zuw tsə Plìsilìyà we nə̀ Àkwilà, ghu də sòʼò aghee kəfàʼ a Yesù Kə̀litò yəə à də̀ miə. 4Ghu kə pfə kè anə iyiə yam. Mə ŋge nyìə̀ zòŋə̀ kə ghu. À kaʼi wày dzə miə mə nyiə̀ nəniy ghu nə̀ zòŋə̀ kìy. Aghee Kəzə̀ anə àghù yə̀ ghu də wày aghee Dzû, ghu nyiə̀ sòʼò zòŋə̀ kə ghu. 5Ghà toŋə zuw yə̂ aghee Kəzə̀ yə̀ ghu təmə dzəŋə a ndaw Àkwilà nə̀ Plìsilìyà.
Ghà toŋə zuw yə̂ Èpenetùs fwu wam ùtaw wìy. Ù kə də̌ wù ùsəsə wiy ani bɛmə awò Kə̀litò a mbwòʼ ə̀ Esìyà 6Ghà toŋə zuw sòʼò Mə̀li, ù mə ŋge fàʼ nə̀ daʼa kiy awo ghà. 7Ghà toŋə zuw soʼò Àndonikùs we nə̀ Dzunìyà, ghu də sòʼò aghee Dzû, ghu kə də fwumi nə̀ mìə̀ a ndàw ntsaʼ. Aghee ntwùm ə̀ Kə̀litò ŋge kwu ghu. À kə bɛmə ghu Zə̀kìy isə azoŋə̀ mìə̀.
8Ghà toŋə zuw soʼò Àmplìyatùs, ù tòʼò də̌ àzə̀ wam ù sòŋə̀ wìy, ù bɛmə nəniy awò Mwe ə̀ mbyi. 9Ghà twoŋə zuw soʼò Ùlbanùs, ù fàʼà dzəŋə nə̀ ghə̀d awò Kə̀litò, nə̀ Stakìs, ù də fwu wam u sòŋə̀ wìy. 10Ghà toŋə zuw soʼò Àpelès, ù dè bə̂ nəniy anə imùə̀ iwe nə̀ ghe mə bɛmə awò Kə̀litò. Ghà toŋə zuw soʼò ìsəd i ndaw i Àlìstobùlùs. 11Ghà toŋə zuw Helodìyòn, ù də̀ sòʼo wè Dzû, Ghà toŋə zuw soʼò àghù yə̀ ghu bɛmə nəniy awò Mwe ə̀ mbyi anə isəd i ndaw Nàsisùs.
12Ghà toŋə zuw soʼò Tìfenà we nə̀ Tìfosà, ghu də aghee kəfàʼ ə Mwe ə̀ mbyi. Ghà toŋə zuw soʼò fwu wam ù dzòŋə̀ wìy Pelsìs. Ù mə ŋge fàʼ nə̀ daʼa kiy awò Mwe ə̀ mbyi. 13Ghà toŋə zuw Lufùs, ù tòʼò də̌ wè kə̀fàʼ ùsòŋə̀ wìy awò Mwe ə̀ mbyi, ghà toŋə zuw soʼò zə̂ we, ù ba kwu miə tee à də̌ wà we. 14Ghà toŋə zuw Àsiŋklitùs, nə̀ Flegòn, nə̀ Helmès, nə̀ Pàtobàs, nə̀ Helmàs, nə̀ aghee liy yə à dzə̀m ghu bɛmə nəniy awò Zə̀kìy. 15Ghà toŋə zuw tsə Fìlologùs nə̀ Dzuliyà. Ghà toŋə zuw soʼò Nelìyùs, nə̀ àzə̀ we ùyəŋi. Ghà toŋə zuw Olimpàs nə̀ àghě Mwe ə̀ mbyi yə àdzə̀m ù də dzəŋi nə̀ ghu.
16Ghà myaŋi kəli yə̂ wù ùmoʼ umòʼ anə uzə ghii ani dè tsə nə̀ ghà kwu iliə. Aghê dzə̀m anə ndaw tə udzəŋə tə Kə̀litò, ghu tyoŋə zuw bə̀ ghà.
Pôl nyiə̀ gwùŋì tsə itswû
17Mə bwoʼo kə̀wo awizə̂ yamə, nə̀ ghà nîy tsə iyɛmì azoŋə̀ àghù yə̀ ghu zəŋə nə̀ ghà salì doʼò, ghu fwələ myaʼà nəniy aghê anə ibɛmə i ghu, kwuni tyi dè ghà nə̀ àyiə àŋwoə̀ yìy, twe myàʼà yə̀ àyiə yə ghu tyi dê awò ghà kwùmə̀ yə̀ nə̀ Kə̀litò. Kə̀ nə ghu təmdzəŋə dzə̀. 18Aŋwòə aghû yə̀ ghu zəŋə nəniy ndzòʼò àyiə yə, ghu faʼà dzə̀ wày awò Mwe ə̀ mbyi ə̀ ŋgàŋ Kə̀litò. Ghu kwuni fàʼà àyiə unìə̀ u ghu. Ghu nɛbə kyabə tsə̀ àghù yə̀ ibɛmə yiy lay nəniy. 19Aghee Kəzə̀ àdzə̀m mə zuw yəə ghà gaʼ na nəniy fôŋ tìy ate anə ntwùm ìdzòŋə̀ yìy. À yù də̀ ighe mə dyoʼo nəniy nə̀ ghà. Mə liə nə̀ ghà kəli tsə utwab ani fàʼ àyiə àdzoŋə̀ yìy, ghà kə kwe wo kəli kiy anə iyiə ìbɛbə ìliy yiy. 20Fəkəmə̀, Zə̀kə̀ kə nyiə̀ nəniy ibvay yiy, ù dyemi maʼà Satàn a təŋə ifwe ghii.
Mə gwuŋə̀ nə̀ Mwe ə̀ mbyi ə̀ ŋgàŋ dè ghà nə̀ fòŋə̀ we ìdzòŋə̀ yìy.
21Timotì, Wù wə̀ mə faʼà dzəŋə nəniy fàʼ k-a-zə̀ kìy nə̀ we, ù tyoŋə zuw bə̀ sòʼò ghà we nə̀ Lusìyùs, nə̀ Dzasə̀n, nə̀ Sòsìpatà, ghu də nəniy aghee Dzû yìy.
22Miə, Tetìyùs wə̀ twâ nyiə̀ nəniy ŋwàʼà kə̀, mə twoŋə zuw bə̀ sòʼò ghà.
23Gayòs wə̀ mə suki nəniy a ndàw we a lòʼo kə aghee Kəzə̀ yìy bê dzəŋə nəniy ate, ù tyoŋə zuw bə̀ sòʼò ghà. Elastùs wə̀ ù nia nəniy mbè kə ukhiy kə inaʼ kiy, nə̀ azə̀ ŋgàŋ Kwatùs, ghu tyoŋə zuw bə̀ sòʼò ghà. 24Mə gwùŋə̀ nə̀ Mwe ə mbyi ŋgàŋ Yesù Kə̀litò ù dè fòŋə we ìdzòŋə yìy awò ghà. I doʼò kə ghii.#16.24 Ùŋwàʼà ù liy wiy kwu ŋwô kəmə̀ fə̀ 24.Mə gwùŋə̀ nə̀ Mwe ə mbyi ŋgàŋ Yesù Kə̀litò ù dè fòŋə we ìdzòŋə yìy awò ghà. I doʼò kə ghii.
Pôl kəd tsə anə igwùŋì
25Ŋgà nyiə̀ ùkali awò Zə̀kìy aŋwòə à də̀ we ù nyə̀ nəniy ghà nə̀ daʼa kiy nə̀ ghà təmi taw tsə anə ibɛmə ghii. Anə yiə yə mə kə dzây awò ghà a sòŋə fə mə kə naʼà nəniy ntwùm ìdzòŋə̀ kwùmə̀ nə̀ Yesù Kə̀litò awò ghà. Ntwùm ìdzòŋə̀ yə̀ də̌ nù tə ayiə tə̀ soŋə̀ tə̀ Zə̀kìy kə nû na nəniy. 26Abû nyiə, ayiə yə aghee ntwùm ə̀ Kə̀zə̀ yìy kə twâ na nəniy anə ŋwàʼà k-a-zə̀ a mə kwuni zəŋi nə̀ aghê dzɛ̀mə̀ kəli iyiə ìsoŋə̀ yìy anə ayiə yə Zə̀kìy dzây na nəniy, Ù də̌ Zə̀kə̀ kə muə nəniy anə nsòŋə indzə̀m, ani zəŋi tsə nə̀ aghê dzə̀m ə̀ kəli tsə ibɛmə, ghu ki zuw yə soʼo awò Zə̀kìy.
27Ŋgà nyiə̀ mə̀ŋkwiʼi awò Zə̀kìy abidzəmə̀ Yesu Kə̀litò kə anə nsòŋə indzə̀m! À kwu Kəzə̀ utwab u dzə̀m. I doʼò kə ghii.
Currently Selected:
Lûm 16: isu
Highlight
Share
Compare
Copy
Want to have your highlights saved across all your devices? Sign up or sign in
© CABTAL 2023
