Lûm 13

Ghà kwu ani zuw yə awò àghù yə̀ ghu də nəniy utuw wiy

1Ghà kwu ani zuw yəə awò àghù yə̀ ghu də nəniy utuw wiy, aŋwòə aghee utuw à liy màŋə̀ bè dyòʼò dzə̀ wày nə̀ à Zə̀kìy ghu kə̀ na nəway. À ghu nia bə̀ Kə̀zə̀ nə̀ ghu ki lia aghû yìy. 2Aghû yə̀ ghu də zuw way awò aghee utuw yiy, ghu ghî ŋwunə awò àyiə yə Zə̀kìy zəŋi na nəniy, nìy bə̀ mfəm anə iwè i ghu. 3Aghù yə̀ ghu zəŋə ayiə àdzoŋə̀ yìy, ghu tsəŋə dzə̀ wày aghû yə̀ ghu də nəniy utuw wiy. À kwuni tsəŋə àghù yə̀ ghu zəŋə nəniy ayiə àbɛbə. Wò liə ŋwô ani dòʼò nə̀ wò kwu dzə̀ way itsəŋ yiy awò àghù yə̀ ghu də nəniy utuw wiy yə̀? Wǒ zəŋə yə̀ àyiə yə a də nəniy àdzoŋə̀ yìy tə̀ ghu ki kyali wô. 4Aŋwòə ghu də aghee kəfàʼ ə Kəzə̀ ani fày ghà. À də̌ fàʼ kə ghu ani yemə̀ azoŋə̀ ghà. Abu ghà zəŋi tsə iyiə ìbɛbə yiy, ghà kwu ani də nə̀ itsəŋ yiy awò ghu, aŋwòə aghee utuw yə̀ ndzə̀m kwu ŋwô daʼa kiy ani nyə̀ ghà nə̀ mfə̀m. Ghu də aghee kəfàʼ ə Kəzə̀ ghu nyiə̀ nəniy mfə̀m awò àghù yə̀ ghu zəŋə ayiə àbɛbə yiy. 5I dê tsə nə̀ ghà kwu ani zuw yə awò àghě utuw wiy, aŋwòə ghà kwu ŋwô nə̀ à də̀ iyiə yə i də nəniy tsitsi awò ghà ani zəŋi. Ghà kə kaʼi zuw dzə̀ awò ghu nə̀ ghà tsəŋə nə̀ ghǎ nì kyilə mfəm.

6À yù də̀ ighe ghà tsuw nəniy ŋwàʼà kìy awò ghu, aŋwòə yəə ghu faʼà nəniy fàʼ kə ghu kiy, ghu faʼà â Zə̀kìy. 7Ghà ki tsəə myaa yə fyiə kə ghà kwu nəniy ani tsə awò ghu. Abu à də kə ŋwàʼà kə̀ tsuw kiy, ghǎ tsuw yə̀. Abu à də kə ani tsə ukhiy anə iyiə ìliy yiy, ghǎ tsə yə̀. Abu à də kə ani nyə̀ mə̀ŋkwiʼi â ghu, ghà nyə̀ yə̀.

I dee yə nənìy iliə yiy awo aghè dzə̀m

8Ghà kə kəli dzə̌ wè lìy nə̀ ndàŋ kə̀ liy kiy. Zəŋi tsə nəniy iliə yiy doʼò tsə yəə à də̀ kəndàŋ ghà kwu nəniy awò aghè dzə̀m! Abu wù dè nəniy iliə yiy awò àghè àdzə̀m, à ki də nə̀ ù mə zəŋi mà ayiə yə lâŋ kìy dzîy nəniy nə̀ ù zəŋi. 9Lâŋ kìy dzîy nə̀, “Kə̀ nəŋì dzə̀ nə̀ wù wə̀ ù də wǎy wiy yiə̀ moo ŋəm yiə̀, kə̀ wiy dzə̌ wù, kə̀ tsoŋ dzə̀, kə kəli dzə̀ ìliə yiy ani kəli fyiə kə à də nəniy kə wè lìy kìy.” Ulâŋ wə̀ ùdzə̀m nə̀ ùliy wiy, u təm dòʼò dzəŋi anə làŋ kə̀ kə dzîy nəniy nə̀, “Liə yə̀ aghê dzə̀m anə ayiə yə̀ wò liə nəniy uwee niə wìy ate.” 10Abu wò liə nəniy wù, wò wày dzə ani zəŋi we nə̀ ìyiə ìbɛbə ìliy yiy. Ì yû dè tsə nə̀ abu wù dè nəniy iliə yiy awò àghù yìy, a də̌ nə̀ wò mə na ayiə yə lâŋ kìy dzîy nəniy.

11Ghà kwu ani zəŋə yəə ayiə yə mə dzây nəniy awò ghà, aŋwòə ghà kwu ŋwô nə̀ soŋə fiy mə kpe ani təmi kə anə ifwe. Soŋə fiy mə swəd awò Zə̀kìy ani bii fyi ŋgaŋ. Soŋə fə ghè fə̀ kwùlì dòʼò bə̀ ŋwò tsìy fyi yəə fə kə də nəniy ate a sòŋə fə ŋgà kə bɛmə nəniy ate awò Zə̀kìy. 12Fəkəmə̀ ləm kiy tsîy ŋwô, asə àzwe yiy mə swəd bə̀. Ŋgà bwi na ani zəŋi ayiə təŋə kələm. Ŋgà kwuni byay tsə iwee yəə à də̌ sǔgôʼ tə̀ ghu byay na dzə̂ ìwee yiy ani ŋwày anə asə àzwe yiy. 13Ŋgà kwu ani faʼa yə ayiə yə a də nəniy tsitsi dzwàbə̀ sòʼò yəə à də̀ aghû yə̀ ghu muə anə asə àzwe yiy. Ŋgà kwu dzə̀ way ani zee anə lòʼo tə udzəŋə tə̀ bɛbə tə ghu nyiə, muə kee sòʼò mə̀nlwù ate, ŋgà kwu dzə̀ way ani mu ke, ŋgà kwu dzə̀ way ani bwiy mwàŋ tìy. Ŋgà kwu dzə̀ way ani nìy kə iwee i ŋgàŋ, zəŋə àyiə àbɛbə yiy ate. Ŋgà kwu dzə̀ way ani zwaʼa anə iwè. Ŋgà kwu dzə̀ way ani kəli kəghòʼ. 14Ghà kwuni kəli tsə ndzòʼò ùmwamə wə Mwe ə̀ mbyi Yesu Kə̀litò kwu nəniy, tə̀ ghà ki də wày ani faʼa ayiə àbɛbə yə gûw tə iwè təli tiy dzîy nə̀ ghà zəŋi.

Currently Selected:

Lûm 13: isu

Highlight

Compare

Copy